គ្រូពេទ្យ​ស្ពាយ​វ៉ាក់សាំង​ការពារ​កូវីដ១៩​ទៅ​ចាក់​ឱ្យនិស្សិត​ដល់​អន្តេវាសិកដ្ឋាន​តិចណូ​

ក្រុមគ្រូពេទ្យស្ម័គ្រ​ចិត្តសម្តេចពិជ័យសេនា ទៀ បាញ់​ និងអាជ្ញាធរ​សង្កាត់ទឹកល្អក់ទី១​ ​ខណ្ឌទួលគោក​ នៅព្រឹកថ្ងៃទី ២៩ ខែមេសានេះ បានស្ពាយវ៉ាក់សាំងការពារជំងឺកូវីដ១៩ យកទៅចាក់ឱ្យក្រុមនិស្សិត​ដល់អន្តេវាសិកដ្ឋាន នៃវិទ្យាស្ថានបច្ចេកវិទ្យាកម្ពុជា (សាលាតិចណូ)។

សកម្មភាពនេះ បង្ហាញឱ្យឃើញ​ពីការយកចិត្តទុកដាក់​ពីសំណាក់​ក្រុមគ្រូពេទ្យ​ អាជ្ញាធរ តាម​អនុសាសន៍​ដឹកនាំ​របស់​សម្តេចតេជោ​នាយក​រដ្ឋមន្ត្រី​ និង​ការ​ដឹកនាំ​បញ្ជា​ផ្ទាល់​របស់​លោក​ ឃួង​ ស្រេង​ អភិបាល​នៃ​គណៈអភិបាល​រាជធានី​ភ្នំពេញ​ ដើម្បីសុខមាលភាពរបស់ប្រជាពលរដ្ឋ។

លោក ប៉ិច សុខឃឿនចៅសង្កាត់ទឹកល្អក់ទី១ បានឱ្យដឹងថា នៅព្រឹកថ្ងៃទី ២៩​ ខែមេសា​ ឆ្នាំ២០២២​នេះ អាជ្ញាធរសង្កាត់ទឹកល្អក់ទី១ បានសហការជាមួយក្រុមគ្រូពេទ្យស្ម័គ្រ​ចិត្តរបស់សម្តេចពិជ័យ​សេនា​ ទៀ​ បាញ់​បានចុះចាក់វ៉ាក់សាំងជូននិស្សិតស្នាក់ដែលកំពុងស្នាក់នៅអន្តេវាសិកដ្ឋានតិចណូ​ ចំនួន៥៧នាក់​ ក្នុងនោះនិស្សិតឡាវ ២៣នាក់​ និស្សិតវៀតណាម​ ១៣នាក់​ និងនិស្សិតខ្មែ២១នាក់​។

គួរបញ្ជាក់ថា ក្រសួងសុខាភិបាល នៅថ្ងៃទី២៦ ខែមេសា ឆ្នាំ២០២២កន្លងមកនេះ បានជូនដំណឹង ពីការបញ្ជូនក្រុមគ្រូពេទ្យចាក់វ៉ាក់សាំងចំនួន១៦០០នាក់ ដើម្បីបង្កើនល្បឿនចាក់ដូសជំរុញ ជូនពល​រដ្ឋ កម្មករ សិស្សនិសិ្សត អ្នកលក់ដូរ នៅតាមបណ្តារាជធានី-ខេត្ត ដើម្បីបង្កើនល្បឿន​ចាក់វ៉ាក់សាំង​កូវីដ-១៩ ក្នុងយុទ្ធនាការចាក់វ៉ាក់សាំងកូវីដ-១៩ ដូសជំរុញ (ទាំងដូសទី៣ និង ដូសទី៤) ជូនប្រជា​ពលរដ្ឋ កម្មករ កម្មការិនី តាមរោងចក្រ ក្រៅប្រព័ន្ធ សិស្ស និសិ្សត អ្នកលក់ដូរតាមទីផ្សារ នៅតាម​បណ្ដារាជធានី-ខេត្ត៕

អត្ថបទ៖ ស្រីរ័ត្ន