កម្ពុជាស្ថិតក្នុងលំដាប់ទី ២ នៅតំបន់អាស៊ាន ដែលបានបញ្ជូនស្ត្រី ជាកងកម្លាំងរក្សាសន្តិភាព

ប្រទេសកម្ពុជា ស្ថិតនៅក្នុងលំដាប់ទី ២ នៃប្រទេសដែលបានបញ្ជូនស្ត្រី ជាកងកម្លាំងរក្សាសន្តិភាពនៅក្នុងចំណោមបណ្តាប្រទេសសមាជិកអាស៊ាន។ លោកនាយឧត្តមសេនីយ៍ សែម សុវណ្ណនី អនុប្រធាណគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានឲ្យដឹងថា ចាប់តាំងពីឆ្នាំ ២០០៦ កម្ពុជាបានបញ្ជូនកងកម្លាំងរក្សាសន្តិភាពចំនួន ៨,៣០២រូប។ ក្នុងនោះ ស្រ្តីមានចំនួន ៥៨០រូប នៅក្នុងបេសកកម្មរបស់អង្គការសហប្រជាជាតិ ចំនួន ៩ប្រទេស។

លោកនាយឧត្តមសេនីយ៍ សែម សុវណ្ណនី បានបន្តថា កម្ពុជា គឺស្ថិតនៅក្នុងលំដាប់ទី ២ នៃប្រទេស ដែលបានបញ្ជូនស្ត្រី ជាកងកម្លាំងរក្សាសន្តិភាព នៅក្នុងចំណោមបណ្តាប្រទេសសមាជិកអាស៊ានហើយក្នុងស្មារតី ប្តេជ្ញាចិត្តខ្ពស់ ដើម្បីឈានឆ្ពោះឲ្យសម្រេចបាននូវសមភាពយេនឌ័រ កម្ពុជាគ្រោងបញ្ជូនកងទ័ពមួកខៀវនារីឲ្យបាន ២០ភាគរយ នៅត្រឹមឆ្នាំ ២០២៤ខាងមុខ។

ជាមួយគ្នានេះដែរមូលនិធិ Elsie Initiative របស់អង្គការសហប្រជាជាតិ បានគាំទ្រសម្រាប់ការបញ្ជួនកងកម្លាំងមួកខៀវស្ត្រី ក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ។ មូលនិធិ Elsie Initiative (EIF) បង្កើតឡើងដោយអង្គការសហប្រជាជាតិនៅឆ្នាំ ២០១៩ មូលនិធិនេះ គឺជាមូលនិធិពហុភាគី ដែលបានរួមចំណែកពីរដ្ឋាភិបាលប្រទេស អូស្ត្រាលី កាណាដា ដាណឺម៉ាក ហ្វាំងឡង់ អាល្លឺម៉ង់ ន័រវែស សាធារណៈរដ្ឋកូរ៉េ និងអង់គ្លេស ក្នុងគោលបំណងបង្កើនល្បឿនវឌ្ឍនភាព ឆ្ពោះទៅទទួលបាននូវគោលដៅសូចនាករយេនឌ័រ ដែលស្របជាមួយសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងយុទ្ធសាស្ត្រកាត់បន្ថយគម្លាតយេនឌ័រ នៅក្នុងកងកម្លាំង របស់អង្គការសហប្រជាជាតិ ២០១៨ ២០២៨។

ប្រទេសកម្ពុជា ស្ថិតនៅក្នុងលំដាប់ទី ២៥ ដែលបានបញ្ជូនកងកម្លាំងចូលរួមច្រើនជាងគេបង្អស់ នៅក្នុងការរក្សាសន្តិភាព របស់អង្គការសហប្រជាជាតិ។ បច្ចុប្បន្នកម្ពុជា មានកងកម្លាំងចំនួន ៧៦៦រូប ដែលមាន ១៤ភាគរយ ជាស្ត្រីស្ថិតនៅក្នុងកិច្ចប្រតិបត្តិការ។

លោកស្រី Sarah Knibbs ប្រធានស្តីទី នៃការិយាល័យតំបន់ របស់ទីភ្នាក់ងារសហប្រជាជាជាតិ UN Women សម្រាប់អាស៊ីប៉ាស៊ីហ្វិច បានលើកឡើងថា គម្រោងនេះ គឺជាចំនុចគោលមួយក្នុងការគាំទ្រកិច្ចខិតខំប្រឹងប្រែងរបស់កម្ពុជា បង្កើននូវការចូលរួមរបស់ស្ត្រី ប្រកបដោយអត្ថន័យនៅក្នុងប្រតិបត្តិការរក្សាសន្តិភាព របស់អង្គការសហប្រជាជាតិ។

លោកស្រីសង្ឃឹមថា គម្រោងផែនការនេះ ក៏ជំរុញលើកទឹកចិត្តដល់បណ្តាសមាជិកអាស៊ានផ្សេងទៀត ក្នុងការបញ្ជូនកម្លាំងស្រ្តីទៅក្នុងបេសកកម្មរក្សាសន្តិភាព៕

អត្ថបទ៖ សំអឿន