សម្ដេចតេជោ ហ៊ុន សែន ៖ ដំណើរការកែទម្រង់ប្រជាធិបតេយ្យថ្នាក់ក្រោមជាតិជាមូលហេតុដែលកម្ពុជាមានសិស្សនិទ្ទេស A គ្រប់ ២៥ រាជធានី-ខេត្ត

មានប្រសាសន៍​នៅក្នុងពិធីសំណេះសំណាល​ជាមួយសិស្សនិទ្ទេស A នៅទូទាំងប្រទេស​នាព្រឹក​ថ្ងៃ​ទី០៣ ខែឧសភា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា​បានមានប្រសាសន៍ថា ការដែលប្រទេស​កម្ពុជា​មានសិស្សនិទ្ទេស A គ្រប់ទាំង២៥ រាជធានី ខេត្ត បានឆ្លុះបញ្ចាំងពីប្រសិទ្ធភាព​ នៃដំណើរការកែទម្រង់ប្រជាធិបតេយ្យ​ថ្នាក់ក្រោម​ជាតិ ដែល​បានផ្ដល់​អំណាច​កាន់តែច្រើន​ទៅឱ្យថ្នាក់មូលដ្ឋាន។

សម្តេចនាយករដ្ឋមន្រ្តីបញ្ជាក់យ៉ាងដូច្នេះថា “ថ្ងៃនេះយើងមានសិស្សនិទ្ទេស A គ្រប់២៥ រាជធានី ខេត្ត តើការឆ្លុះបញ្ចាំងពីអ្វីទៅ? វាឆ្លុះបញ្ចាំងពីប្រសិទ្ធភាព នៃដំណើរការកែទម្រង់​ប្រជាធិបតេយ្យ​ថ្នាក់​ក្រោមជាតិនោះឯង។ វាបានបង្ហាញពីប្រសិទ្ធភាពពិតប្រាកដ ដែលយើងផ្ដល់អំណាច​កាន់តែ​ច្រើន​ទៅអោយថ្នាក់មូលដ្ឋាន ហើយថ្នាក់មូលដ្ឋានមានលទ្ធភាពដើម្បីដោះស្រាយបញ្ហានេះ។ 

នៅឯមូលដ្ឋាន ក្រសួងអប់រំបានដាក់ចេញសម្រាប់ការគ្រប់គ្រងថ្នាក់ណាៗ ប៉ុន្តែអ្វីៗដែលស្ថិត​នៅមូលដ្ឋាន​នោះ គឺមូលដ្ឋានទាំងអស់យកការទទួលខុសត្រូវនៅក្នុងក្របខណ្ឌខេត្តរបស់ខ្លួន”។

ជាមួយគ្នានោះសម្ដេចតេជោហ៊ុន សែន បានថ្លែងអំណរ​គុណ និងកោតសសើរ​ទៅដល់អាជ្ញាធរ​គ្រប់​ខេត្តទាំងអស់ ដែលបានចែកជូននូវរង្វាន់ផ្សេងៗ​សម្រាប់សិស្សនិទ្ទេស A ដែលខេត្ត​ខ្លះបាន​ម៉ូតូ និងបាននេះ បាននោះ តាមលទ្ធភាពរៀងៗខ្លួន។

បើតាមសម្ដេចតេជោហ៊ុន សែន នេះបង្ហាញពីការយកចិត្តទុកដាក់គ្រប់កម្រិតទាំងអស់ ទៅលើការ​បណ្ដុះបណ្ដាលធនធានមនុស្ស ដែលនោះហើយផ្ដើមចេញពី​ការអនុវត្តគោលនយោបាយ​របស់រាជ​រដ្ឋាភិបាល ដោយយកចិត្តទុកដក់ទៅលើវិស័យអប់រំ ជាវិស័យអាទិភាព និងទីមួយ នៅក្នុងយុទ្ធ​សាស្ត្រ​ចតុកោណរបស់រាជរដ្ឋាភិបាល ដែលក្នុងនោះយើងបានដាក់វិស័យអប់រំជាមុំទី១ ហើយ​ថវិកា​បានផ្សារភ្ជាប់ទៅនឹងគោលនយោបាយ។

សម្តេចថា រាជរដ្ឋាភិបាលបានផ្ដល់អាទិភាព​ទៅលើវិស័យ​អប់រំ វិស័យសុខាភិបាល ដែលមានទំនាក់ទំនងជាមួយគ្នា ហើយមានតែវិស័យពីរនេះ​ទេ ដែលបាន​អនុញ្ញាតិឲ្យរើសគ្រូបង្រៀន និងរើសគ្រូពេទ្យបន្ថែម។

សូមបញ្ជាក់ថា ការប្រលងបាក់ឌុប ដែលបានប្រព្រឹត្តទៅកាលពីថ្ងៃទី២៧-២៨ ខែធ្នូ ឆ្នាំ២០២១ មានបេក្ខជនប្រលងជាប់មានចំនួន៧២,០១៦នាក់ ស្មើនឹងប្រមាណ៦៥.៦៥ ភាគរយ (បេក្ខជនប្រ​លងសរុប ១១៤,១៨៣នាក់)។

បេក្ខជនទទួលបាននិទ្ទេស A មានចំនួន ១,៧៥៣នាក់ (ឆ្នាំ២០១៩ មានចំនួន ៤៤៣នាក់), និទ្ទេស B មានចំនួន ៥,២១៥នាក់ (ឆ្នាំ២០១៩ ចំនួន ២,៤៣០នាក់), និទ្ទេស C មានចំនួន ១១,៦៣៤នាក់ (ឆ្នាំ២០១៩ ចំនួន ៥,៨៤៧នាក់)​, និទ្ទេស D​ មានចំនួន ២៣,៤៩៩នាក់ (ឆ្នាំ២០១៩ ចំនួន ១៤,១០០នាក់), និងនិទ្ទេស E មានចំនួន ២៩ ៩១៥ នាក់ (ឆ្នាំ២០១៩ ចំនួន ៥៦,២៣២នាក់)៕

អត្ថបទ៖ កោះកែវ