លោកជំទាវ ម៉ែន សំអន អំពាវនាវពលរដ្ឋទៅបោះឆ្នោត គាំទ្រគណបក្សប្រជាជនកម្ពុជា ដែលធានាបានទាំងស្រុងចំពោះសុខសន្តិភាព

លោកជំទាវ ម៉ែន សំអន ឧបនាយករដ្ឋមន្ត្រី និងជាអនុប្រធានគណបក្សប្រជាជនកម្ពុជា បានអំពាវនាវដល់ប្រជាពលរដ្ឋទូទាំងខេត្តស្វាយរៀង អញ្ជើញទៅបោះឆ្នោតគាំទ្រគណបក្សប្រជាជនកម្ពុជា ដែលធានាបានទាំងស្រុងចំពោះសុខសន្តិភាព និងការរីកចម្រើនគ្រប់មូលដ្ឋានទូទាំងប្រទេស។

លោកជំទាវ ម៉ែន សំអន បានអំពាវនាវបែបនេះ ខណៈអញ្ជើញជួបសំណេះសំណាល ជាមួយបេក្ខជនពេញសិទ្ធិ និងបម្រុងចំនួន ៩ឃុំ នៅស្រុកស្វាយជ្រំ រួមមាន៖ ឃុំបាសាក់ ឃុំគ្រួស ឃុំស្វាយធំ ឃុំឈើទាល ឃុំស្វាយយា ឃុំស្វាយអង្គ ឃុំអង្គតាសូ ឃុំគោកព្រីង ឃុំស្វាយជ្រំ កាលពីព្រឹកថ្ងៃទី ៣១ ខែឧសភា ឆ្នាំ ២០២២នេះ។

លោកជំទាវ បាននាំនូវការផ្ដាំផ្ញើសួរសុខទុក្ខ និងការនឹករលឹកពីសំណាក់សម្ដេចប្រធាន និងសម្ដេចប្រធានកិត្តិយស ព្រមទាំងថ្នាក់ដឹកនាំគណបក្សប្រជាជនកម្ពុជា ជូនចំពោះបេក្ខជនពេញសិទ្ធ និងបម្រុងទាំងអស់ និងបានជូនសូមពរឲ្យទទួលបានជោគជ័យ សម្រាប់ការបោះឆ្នោតខាងមុខនេះ។

លោកជំទាវ ក៏បានលើកឡើងពីតួនាទី និងភារកិច្ចរបស់ក្រុមប្រឹក្សាឃុំ និងបានណែនាំឲ្យថ្នាក់ដឹកនាំ និងបេក្ខជនគណ បក្ស បន្តការខិតខំបំរើប្រជាពលរដ្ឋឲ្យបានល្អ ដូចដែលគណបក្សបានប្រកាន់យកគោលការណ៍រួមសុខរួមទុក្ខជាមួយប្រជន មិនរត់ចោលប្រជាជន អ្វីៗគ្រប់បែបយ៉ាងដើម្បីជាតិ និងប្រជាជន។

ជាចុងក្រោយលោជំទាវ ម៉ែន សំអន ក៏បានអំពាវនាវប្រជាពលរដ្ឋ អញ្ជើញទៅបោះឆ្នោតគាំទ្រគណបក្សប្រជាជនកម្ពុជា និងស្នើសុំឲ្យគ្រប់ភាគីចូលរួមបង្កលក្ខណៈ ឲ្យការបោះឆ្នោតនេះ បានប្រព្រឹត្តិទៅដោយសេរី ត្រឹមត្រូវ យុត្តិធម៌ និងគ្មានអំពើហិង្សា។ ជាពិសេស ចូលរួមគោរពច្បាប់ចរាចរណ៍ទាំងអស់គ្នា កុំសេពគ្រឿងស្រវឹង និងគោរពទៅតាមការកំណត់ របស់គណៈកម្មាធិការជាតិរៀបចំ ការបោះឆ្នោត រហូតដល់កិច្ចដំណើការ នៃការបោះឆ្នោតក្រុមប្រឹក្សាឃុំ-សង្កាត់ អាណត្តិទី ៥ ត្រូបានបញ្ចប់រួចរាល់ជាស្ថាពរ តែម្ដង៕

អត្ថបទ៖ វិមាន