ព័ត៌មានជាតិ

មេបញ្ជាការកងរាជអាវុធហត្ថខេត្ត បន្ទាយមានជ័យក្រើនរំលឹកមន្ត្រីទាំងអស់មិនត្រូវយកតួនាទី ឬសិទ្ធអំណាច ទៅគាបសង្កត់ដល់ពលរដ្ឋ ដើម្បីផលប្រយោជន៍ផ្ទាល់ខ្លួន

បានផុស

២ years មុន

នៅ

ថ្ងៃអង្គារ ២៦ កក្កដា ២០២២

ដោយ

បន្ទាយមានជ័យ ៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត បានក្រើនរំលឹកដល់នាយទាហាន នាយទាហាន រង នៃកងរាជអាវុធហត្ថ ទាំងអស់ មិនត្រូវយកតួនាទី ឬសិទ្ធអំណាចជាសមត្ថកិច្ច ទៅគាបសង្កត់ដល់ពលរដ្ឋ ដើម្បីផលប្រយោជន៍ផ្ទាល់ខ្លួន ឡើយ បើមានករណីនេះកើតឡើង ហើយរកឃើញថា មន្ត្រីអាវុធហត្ថណាម្នាក់បានប្រព្រឹត្ត អំពើនេះ នឹងត្រូវប្រឈមមុខ ចំពោះច្បាប់ដោយគ្មានការលើកលែងជាដាច់ខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការក្រើនរំលឹកនេះធ្វើឡើងនៅរសៀលថ្ងៃអង្គារ ទី២៦ ខែកក្កដា ឆ្នាំ២០២២ ក្នុងពិធីប្រកាសតែងតាំងផ្លាស់ប្ដូរមុខតំណែង និងបំពាក់ឋានន្តរសក្ដិដល់យោធិន នៃកងរាជអាវុធហត្ថចំនួន៨៨រូប ក្នុងនោះថ្នាក់អនុសេនីយ៍ឯកចំនួន៣៣រូប ថ្នាក់អនុសេនីយ៍ទោចំនួន៣០រូប ថ្នាក់អនុសេនីយ៍ត្រីចំនួន០២រូប ថ្នាក់នាយចំណង់ចំនួន០៩រូប ថ្នាក់ព្រិនបាលឯកចំនួន០៦រូប ថ្នាក់ព្រិនបាលទោចំនួន០២រូប និងផ្លាស់ប្ដូរមុខតំណែងចំនួន០៦រូប។

នៅក្នុងពិធីដែលលោកមេបញ្ជាការរង លោកនាយសេនាធិការរង លោកប្រធាន អនុប្រធានមន្ទីរ លោកនាយ នាយរងការិយាល័យ មេបញ្ជាការមូលដ្ឋានក្រុង ស្រុក និងនាយទាហាន នាយទាហានរង សរុបចំនួន១២៦រូបលោក ឧត្ដមសេនីយ៍ ត្រី បោន ប៊ិន បានកោតសរសើរចំពោះ នាយទាហាន នាយទាហានរង នៃកងរាជ អាវុធហត្ថ ខេត្តបន្ទាយមានជ័យ ទាំងអស់ ដែលបានខិតខំបំពេញតួនាទី ភារកិច្ច របស់ខ្លួន ដោយបានអនុវត្តតាមបទបញ្ជា និងគោរពវិន័យ របស់ អង្គភាព កងរាជអាវុធហត្ថបានយ៉ាងល្អ ប្រសើរប្រកបដោយទំនួលខុសត្រូវ រហូតទទួលបានការលើកទឹកចិត្តនិងដំឡើងឋានន្តរសក្ដិរបស់ថ្នាក់លើ។

ទន្ទឹមជាមួយគ្នានោះ ដែរ លោក ឧត្ដមសេនីយ៍ ត្រី ក៏បានណែនាំនិងជំរុញបន្ថែម ទៀត ដល់នាយទាហាន នាយទាហានរង នៃកងរាជ អាវុធហត្ថ ទាំងអស់ ត្រូវអនុវត្តឱ្យបានម៉ឺងម៉ាត់ នូវបទបញ្ជា របស់លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ដែលបានដាក់ចេញនូវទិសស្លោកចំនួន៤ គឺ -ប្រទេសជាតិត្រូវតែការពារ -ប្រជាត្រូវតែបម្រើ -ច្បាប់ត្រូវតែគោរព -បទល្មើសត្រូវតែបង្ក្រាប៕

ដោយ ៖ អ.ពៅ