ព័ត៌មានជាតិ

ទូតរុស្ស៊ីសង្ឃឹម សៀវភៅ «ទំនាក់ទំនងកម្ពុជា-រុស្ស៊ី» នឹងក្លាយជាឯកសារសំខាន់ដល់អ្នកជំនាន់ក្រោយ

បានផុស

១១ ខែ មុន

នៅ

ថ្ងៃពុធ ៦ មីនា ២០២៤

ដោយ

លោក អាណាតូលី បូរ៉ូវិក (Anatoly BOROVIK) អគ្គរដ្ឋទូតសហព័ន្ធរុស្ស៊ីប្រចាំកម្ពុជាបានវាយតម្លៃខ្ពស់និងគាំទ្រយ៉ាងមុតមាំចំពោះគម្រោងមាតិកាស្តីពីការរៀបចំចងក្រងសៀវភៅ «ទំនាក់ទំនង កម្ពុជា-រុស្ស៊ី៖ អតីតកាល បច្ចុប្បន្ន និង អនាគត» ដែលផ្ដួចផ្ដើមឡើងដោយរាជបណ្ឌិត្យសភាកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបពិភាក្សាការងារនៅស្ថានទូតរុស្ស៊ីប្រចាំកម្ពុជា ជាមួយលោកបណ្ឌិត គិន ភា ប្រធានវិទ្យាស្ថានទំនាក់ ទំនងអន្តរជាតិ នៃកម្ពុជា នៃរាជបណ្ឌិត្យសភាកម្ពុជា នារសៀលថ្ងៃទី០៥ ខែមីនា ម្សិលមិញនេះ លោក អាណាតូលី បូរ៉ូវិក បានកោតសរសើរ និងវាយតម្លៃខ្ពស់ចំពោះគំនិតផ្តួចផ្តើមដ៏មានសារសំខាន់នេះ។ មិនតែប៉ុណ្ណោះ លោកបានប្រកាសគាំទ្រយ៉ាងមុតមាំចំពោះគម្រោងសរសេរសៀវភៅនេះ ព្រមទាំងបានចែករំលែកទស្សនៈសំខាន់ៗជុំវិញទំនាក់ទំនងរវាងកម្ពុជានិងរុស្ស៊ី ក្នុងឋានៈជាអ្នកការទូត។

លោកក៏សង្ឃឹមយ៉ាងមុតមាំដែរថា សៀវភៅស្តីពី «ទំនាក់ទំនងកម្ពុជា-រុស្ស៊ី៖អតីតកាល បច្ចុប្បន្ន និង អនាគត» ដែលផ្តើមដោយរាជបណ្ឌិតសភានេះ នឹងក្លាយជាឯកសារដ៏មានសារៈសំខាន់សម្រាប់អ្នកសិក្សាស្រាវជ្រាវ និងអ្នកការទូត ដែលមានបំណងសិក្សាស្វែងយល់អំពីសច្ចភាពប្រវត្តិសាស្ត្រនៃទំនាក់ទំនងជាប្រពៃណីយូរអង្វែងរវាងប្រទេសទាំងពីរ ដែលឈរលើមូលដ្ឋាននៃការជឿទុកចិត្តគ្នានិងភាពស្មោះត្រង់។

លោកបណ្ឌិត គិន ភា បានអះអាងថា សៀវភៅស្តីពី «ទំនាក់ទំនងកម្ពុជា-រុស្ស៊ី៖អតីតកាល បច្ចុប្បន្ន និង អនាគត» បានពិភាក្សាគ្នាជាមួយវិទ្យាស្ថានសិក្សាចិននិងអាស៊ីសហសម័យនៃបណ្ឌិត្យសភាវិទ្យាសាស្ត្ររុស្ស៊ី ដែលជាដៃគូសហការ នាពេលកន្លងមក ហើយគ្រោងបញ្ចប់ឲ្យបានមុនខួប ៧០ ឆ្នាំ នៃការបង្កើតទំនាក់ទំនងការទូតផ្លូវការរវាងកម្ពុជានិងរុស្ស៊ីនាឆ្នាំ២០២៦៕