កីឡា

លីគវិលត្រឡប់មកវិញ ក្លិប៥នៅមានឱកាសប្រជែងតំបន់ Top 4

បានផុស

១១ ខែ មុន

នៅ

ថ្ងៃសុក្រ ២៩ មីនា ២០២៤

ដោយ

ក្លិបបាល់ទាត់ព្រះខ័នរាជស្វាយរៀង និង ភ្នំពេញក្រោន មានសុវត្ថិភាពហើយនៅតំបន់កំពូលទាំង៤ (Top 4) ក្នុងខេមបូឌានព្រីមៀរលីគរដូវកាល២០២៣-២៤ ខណៈនៅមានក្លិប៥ទៀតនៅមានឱកាសប្រជែងនៅតំបន់នេះ បើទោះបីជាជុំទី៣នៅសល់តែ៣ប្រកួតទៀតប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្លិបបាល់ទាត់ វិសាខា បឹងកេត អាយអេសអាយ ដង្កោសែនជ័យ ក្រសួងការពារជាតិ និងណាហ្គាវើលដ៍ នៅមានឱកាសប្រជែងនៅតំបន់កំពូលទាំង៤។ ឆ្លងកាត់២៤សប្តាហ៍កន្លងទៅ វិសាខា មាន៣៨ពិន្ទុ នាំមុខតែ៤ពិន្ទុប៉ុណ្ណោះលើក្រុមលេខ៤ បឹងកេត និងលេខ៥ អាយអេសអាយ ដង្កោសែនជ័យ ដែលមាន៣៤ពិន្ទុស្មើគ្នា។ ក្រុមទាំងពីរនេះមានភាគរយខ្ពស់ក្នុងការឡើងតំបន់កំពូលទាំង៤។

ចំពោះក្រុមលេខ៦ ក្រសួងការពារជាតិ មាន៣០ពិន្ទុ និងលេខ៧ ណាហ្គាវើលដ៍ មាន២៧ពិន្ទុ ដូច្នេះមិនទាន់អស់ឱកាសក្នុងការឡើងទៅកាន់តំបន់ទាំង៤ទេ។ ប្រសិនបើ ក្រុមទាំងពីរនេះទទួលបានជ័យជម្នះទាំងអស់ដែលនៅសល់៣ប្រកួតក្នុងជុំទី៣ ពួកគេនឹងទទួលបាន៩ពិន្ទុបន្ថែម ហើយក្រុមចំណាត់ថ្នាក់លេខ៣ លេខ៤ និង លេខ៥ ធ្វើមិនបានល្អ។ គ្រាន់តែថា ក្រសួងការពារជាតិ និងណាហ្គាវើលដ៍មានភាគរយតិច។

រហូតដល់ពេលក្លិប ខេត្តព្រៃវែង (២៣ពិន្ទុ) អង្គរថាយហ្គឺរ (១៨ពិន្ទុ) និង គិរីវង់សុខសែនជ័យ (១៧ពិន្ទុ) អស់ឱកាសប្រជែងតំបន់កំពូលទាំង៤ហើយ បើទោះបីជានៅសល់៣ប្រកួតទៀតក្នុងជុំទី៣។

សម្រាប់ការប្រកួតជុំទី៤ (Top 4) មានតែ៣ប្រកួតប៉ុណ្ណោះ គឺក្រុមណាដែលមិនទាន់ធ្វើម្ចាស់ផ្ទះក្នុងជុំទី៣ នឹងធ្វើម្ចាស់ផ្ទះនៅជុំទី៤ ប៉ុន្តែគ្រប់ក្លិបកំពូលទាំង៤មិនប្រាកដថា សុទ្ធតែជាក្រុមមិនបានធ្វើម្ចាស់ផ្ទះនៅជុំទី៣ទេ ពីព្រោះម្ចាស់ផ្ទះនឹងប្រែប្រួលទៅតាមចំណាត់ថ្នាក់។