បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់

នៅវេលាម៉ោង១១ព្រឹក ថ្ងៃទី២៩ ខែមីនា ឆ្នាំ២០២៤ មានករណីគ្រោះថ្នាក់ចរាចរណ៍រវាងរថភ្លើងបុកជាមួយរថយន្ដក្រុង៤៥កៅអីដឹកអ្នកដំណើរបណ្ដាលឲ្យមានអ្នករងរបួសធ្ងន់ស្រាល។

តាមរបាយការណ៍ពីអធិការនគរបាលស្រុកក្រគរ បានឲ្យដឹងថា ករណីនេះបានកើតឡើងនៅចំណុចលើផ្លូវដែក ស្ថិតនៅភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់។ លោក មោគ ភារម្យ អធិការនៃអធិការដ្ឋាននគរបាលស្រុកក្រគរបន្ថែមថា ករណីនេះពុំមានអ្នកស្លាប់នោះទេ មានអ្នករងរបួសស្រាលធ្ងន់ចំនួន០៥នាក់ ខណៈប្រជាពលរដ្ឋ និងសមត្ថកិច្ចបានជួយអន្តរាគមន៍រួចរាល់ហើយ នៅឡើយតែរថភ្លើង និងរថយន្តនៅរមូជាប់គ្នានៅឡើយ។

បើតាមលោកអធិការស្រុក ហេតុការណ៍ខាងលើនេះ បានកើតឡើងខណៈរថយន្តក្រុងកំពុងធ្វើដំណើរ ក្នុងទិសដៅពីជើងឆ្ពោះទៅទិសខាងត្បូង លុះមកដល់ចំណុចកើតហេតុ ស្រាប់តែមានរថភ្លើងកំពុងបោះពួយមកពីទិសខាងកើត ឆ្ពោះទៅទិសខាងលិចបុករុញទទឹងរថយន្ត បណ្ដាលឲ្យគៀបជាប់តែម្ដង៕