អភិបាលខេត្តកំពង់ចាម ស្នើក្រុមហ៊ុនសាងសង់ប្រព័ន្ធលូ បញ្ចៀសផលប៉ះពាល់ និងស្ថាបនាផ្លូវឡើងវិញឱ្យបានស្អាត 

អភិបាលខេត្តំពង់ចាម លោក អ៊ុន ចាន់ដា បានស្នើដល់ក្រុមហ៊ុនសាងសង់ប្រព័ន្ធលូឱ្យជួយកែសម្រួលឡើងវិញនូវចំណុចដែលខ្វះខាត និងភាពអសកម្មទាំងឡាយធ្វើយ៉ាងណា ត្រូវកាត់បន្ថយនូវផលប៉ះពាល់ និងត្រូវស្ថាបនាផ្លូវឡើងវិញឱ្យបានស្អាត។ លោកបានថ្លែងបែបនេះ ក្នុងកិច្ចប្រជុំស្តីពីវឌ្ឍនភាពនៃគម្រោងសាងសង់ប្រព័ន្ធលូ និងស្ថានីយ៍ប្រព្រឹត្តកម្មទឹកកខ្វក់ក្នុងក្រុងកំពង់ចាម នាព្រឹកថ្ងៃទី២៩ ខែមីនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីមានការ លើកឡើងរបស់អាជ្ញាធរមូលដ្ឋាន ដែលស្វែងមតិដោយចៅសង្កត់ទាំង៤ និង លោក អភិបាលក្រុងកំពង់ចាម ក៏ដូចជា អង្គភាពពាក់ព័ន្ធ លោក អ៊ុន ចាន់ដា បានស្នើដល់ភាគីក្រុមហ៊ុន ពិចារណាមើលនូវភាពអសកម្មទាំងឡាយ ហើយសុំធ្វើការងារឱ្យបានច្បាស់លាស់ ដោយមានភាពទទួលខុសត្រូវ ព្រោះមានការងារច្រើនណាស់ ដែលក្រុមហ៊ុន មើលរំលងអញ្ចឹងទេសូមឱ្យក្រុមហ៊ុនជួយ បំពេញនូវចំណុចដែលខ្វះខាតទាំងនោះផង។

លោកអភិបាលខេត្ត បានស្នើដល់អាជ្ញាធរ សង្កាត់ទាំង៤ ឱ្យបន្តធ្វើការបកស្រាយជូនប្រជាពលរដ្ឋ ពាក់ព័ន្ធនឹងគម្រោងដែលកំពុងធ្វើនេះ គឺត្រូវការប្រើប្រាស់រយៈពេល ២១ខែ តទៅមុខទៀត ទើបបានស្អាត ពេលនោះនឹងលែងមានក្លិនអាក្រក់ទៀតហើយ។ ដូច្នេះ សូមប្រជាពលរដ្ឋមាការអត់ធ្មត់ ហើយចូលរួមទាំងអស់គ្នា ដើម្បីទទួលបាននូវសមិទ្ធផលដែលល្អ ហើយមានរយៈកាលយូរអង្វែង ដែលជាចំណែកមួយ នៃការចូលរួមលើកកម្ពស់គុណភាព ជីវភាពរបស់ប្រជាពលរដ្ឋ នៅក្នុងក្រុងកំពង់ចាម ដែលជាចក្ខុវិស័យវែងឆ្ងាយរបស់រាជរដ្ឋាភិបាល។

ជាមួយគ្នានោះ លោក អ៊ុន ចាន់ដា ក៏បានសង្កត់ធ្ងន់ថា ក្នុងនាមជាអាជ្ញាធរត្រូវតែចូលរួមធ្វើយ៉ាងណា ត្រូវបន្តការគាំទ្រធ្វើឱ្យគម្រោងនេះបានដំណើរការដោយជោគជ័យ និងរលូន ហើយបញ្ចៀសឱ្យបានជាអតិបរមានូវផលប៉ះពាល់ និងការរំខាននានា បូករួមទាំងប្រជាពលរដ្ឋ និងកងវិស្វកម្មនៃក្រុមហ៊ុនផងដែរ៕

អត្ថបទ និង រូបភាព ៖ ឡេក ចាន់ពេជ្រ