តុលាការកំពូលរបស់អង្គការសហប្រជាជាតិបញ្ជាឱ្យអ៊ីស្រាអែលបើកលំហូរជំនួយមនុស្សធម៌ទៅតំបន់ហ្គាហ្សា បន្ទាន់

តុលាការកំពូលរបស់អង្គការសហប្រជាជាតិបានបញ្ជាឱ្យអ៊ីស្រាអែលបើកលំហូរនៃការនាំជំនួយទៅកាន់តំបន់ហ្គាហ្សា ដើម្បីបញ្ចៀសគ្រោះទុរភិក្ស។ នេះបើយោងតាមការផ្សាយរបស់សារព័ត៌មាន BBC នៅថ្ងៃទី២៩ ខែមីនា ឆ្នាំ ២០២៤ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពបានឱ្យដឹងថា នៅក្នុងការសម្រេចចិត្តជាឯកច្ឆ័ន្ទ តុលាការយុត្តិធម៌អន្តរជាតិ (ICJ) បាននិយាយថា អ៊ីស្រាអែលត្រូវតែធ្វើសកម្មភាព “ដោយគ្មានការពន្យាពេល” ដើម្បីអនុញ្ញាតឱ្យ “ការផ្តល់នៃសេវាមូលដ្ឋាន និងជំនួយមនុស្សធម៌ដែលត្រូវការជាបន្ទាន់” ។ ការសម្រេចរបស់តុលាការអង្គការសហប្រជាតិនេះ ធ្វើឡើងបន្ទាប់ពីមានការព្រមានថា ទុរ្ភិក្សអាចវាយលុកតំបន់ហ្គាហ្សាក្នុងរយៈពេលប៉ុន្មានសប្តាហ៍ខាងមុខ ខណ:ដែលអ៊ីស្រាអែលឯនោះវិញ បានចាត់ទុកថា អន្តរជាតិកំពុងមើលមកខ្លួនថា បានរារាំងជំនួយដោយគ្មានមូលដ្ឋានទាំងស្រុង ។

ជាការឆ្លើយតបរបស់ខ្លួនចំពោះដីការបស់តុលាការ ក្រសួងការបរទេសអ៊ីស្រាអែលបាននិយាយថា ខ្លួនកំពុងបន្ត “លើកកម្ពស់គំនិតផ្តួចផ្តើមថ្មី និងពង្រីកសកម្មភាពដែលមានស្រាប់” ដើម្បីអនុញ្ញាតឱ្យមានលំហូរជាបន្តបន្ទាប់នៃជំនួយទៅកាន់តំបន់ហ្គាហ្សា “តាមផ្លូវគោក ផ្លូវអាកាស និងសមុទ្រ” ដោយធ្វើការជាមួយអង្គការសហប្រជាជាតិ និងមធ្យោបាយផ្សេងទៀត។

ប្រភពដដែលបានឱ្យដឹងទៀតថា សេចក្តី សម្រេចចុងក្រោយ របស់តុលាការនៅទីក្រុងឡាអេ ធ្វើឡើងបន្ទាប់ពីប្រទេសអាហ្រ្វិកខាងត្បូងបានស្នើឱ្យខ្លួនពង្រឹង និងចាត់វិធានការទាំងអស់ដើម្បីការពារអំពើប្រល័យពូជសាសន៍នៅក្នុងតំបន់ហ្គាហ្សា។ អាហ្រ្វិកខាងត្បូងបាននិយាយថា ខ្លួនមានកាតព្វកិច្ចក្នុងការទប់ស្កាត់អំពើប្រល័យពូជសាសន៍ក្នុងនាមជាប្រទេសហត្ថលេខីនៃ អនុសញ្ញាប្រល័យពូជសាសន៍ឆ្នាំ ១៩៤៨ របស់អង្គការសហប្រជាជាតិ។ ប្រទេសនេះបានរិះគន់យ៉ាងខ្លាំងចំពោះប្រតិបត្តិការយោធារបស់អ៊ីស្រាអែលនៅតំបន់ហ្គាហ្សា ។

មួយវិញទៀត សេចក្តីសម្រេចរបស់ ICJ ក៏ធ្វើឡើងបន្ទាប់ពី របាយការណ៍មួយដោយ Integrated Food Security Phase Classification Global Initiative ដែលគ្រប់គ្រងដោយកម្មវិធីស្បៀងអាហារពិភពលោក និងកម្មវិធីផ្សេងទៀតត្រូវបានបោះពុម្ពផ្សាយកាលពីសប្តាហ៍មុន ដោយព្រមានថាស្ថានភាព “មហន្តរាយ” កំពុងវិវត្តនៅក្នុងហ្គាហ្សា ៕

ប្រែសម្រួលដោយ÷ ប៉ោ កុសល