លោក ស៊ុន ចាន់ថុល បញ្ជាក់ពីមូលហេតុដែល​ត្រូវដាក់បណ្ណបើកបរច្បាប់ដើមតាមខ្លួន

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ប្រជាពលរដ្ឋគ្រប់រូប ត្រូវតែដាក់បណ្ណបើកបរច្បាប់ដើមតាមខ្លួនជានិច្ច រាល់ពេលបើកបរ ដើម្បីជៀសវាងការផាកពិន័យរបស់មន្រ្តីពាក់ព័ន្ធ។ លោកថ្លែងបែបនេះ នៅក្នុងកិច្ចប្រជុំបូកសរុបការងារសុវត្ថិភាពចរាចរណ៍ផ្លូវគោក ប្រចាំឆមាសទី១ និងលើកទិសដៅការងារឆមាសទី២ ឆ្នាំ ២០២២ នៅថ្ងៃទី ១៨ សីហា នេះ។

រដ្ឋមន្ត្រីក្រសួងសាធារណការ និងដឹកជញ្ជូន បញ្ជាក់មូលហេតុដូច្នេះថា «បានជាយើងតម្រូវឱ្យដាក់បណ្ណបើកបរច្បាប់​ដើមតាមខ្លួន គឺបង្ការពេលមានគ្រោះថ្នាក់ចរាចរណ៍ណាមួយ ក្រោមឥទ្ធិពលគ្រឿងញៀន ឬគ្រឿងស្រវឹង អាជ្ញាធរ អាចដកហូតទុកបណ្ណបើកបរ បានភ្លាមៗ ជាបណ្តោះអាសន្នទៅតាមច្បាប់កំណត់របស់ប្រទេស»។

ទាក់ទិននឹងបញ្ហានេះ លោកសង្កត់ធ្ងន់ថា បើសិនជាប្រជាពលរដ្ឋដាក់បណ្ណបើកបរថតចម្លងតាមខ្លួន នោះវាគ្មានន័យអ្វីនោះឡើយ។

ទោះយ៉ាងណា លោករដ្ឋមន្រ្តី បញ្ជាក់ថា ចំពោះឈៀក និងបណ្ណសំគាល់យានយន្ត គឺអនុញ្ញាតឱ្យប្រើប្រាស់ច្បាប់ថត​ចម្លងដាក់តាមខ្លួនបាន ដោយសារក្រសួងមាន QR កូដសម្រាប់ស្កេន ដូច្នេះអ្នកបើកបរមិនចាំបាច់ដាក់ឈៀក និងបណ្ណសម្គាល់យានយន្តតាមខ្លួន ក៏បានដែរ តែគ្មានការលើកលែងឡើយ ចំពោះបណ្ណបើកបរថតចម្លង៕

អត្ថបទ៖ នាង រតនៈ