៧ខែ ឆ្នាំនេះ កម្ពុជា ទទួលបានទេសចរអន្តរ​ជាតិជាង ៧៤ម៉ឺននាក់

បើទោះជាចរន្តភ្ញៀវទេសចរចេញដំណើរកម្សាន្តនៅទាំងប្រទេស មានការឡើងចុះទៅតាមសប្តាហ៍យ៉ាងណាក្តី ក៏រយៈពេល ៧ខែ ឆ្នាំ ២០២២នេះ កម្ពុជា ទទួលបានទេសចរអន្តរជាតិប្រមាណជាង ៧៤ម៉ឺននាក់ ពោលគឺកើនឡើង ៥៦០% បើធៀបនឹងរយៈពេលដូចគ្នាឆ្នាំ២០២១។ នេះបើតាមការបញ្ជាក់របស់លោក ថោង ខុន រដ្ឋមន្រ្តីក្រសួង​ទេសចរណ៍ នៅក្នុងពិធីបើកវគ្គបណ្ដុះបណ្ដាលដល់អ្នកជំនាញទេស​ចរណ៍ នៅខេត្តសៀមរាប។

លោករដ្ឋមន្រ្តី បានលើកឡើងថា ក្រសួងទេសចរណ៍បានគិតគូរ និងយកចិត្តទុកដាក់ខ្ពស់លើការពង្រឹងគុណភាព សេវាកម្មប្រកបដោយគុណភាព និងសុវត្ថិភាពជូនភ្ញៀវទេសចរតាមគន្លងថ្មី និងបន្តជំរុញផ្សព្វផ្សាយទាក់ទាញទេសចរណ៍ ទាំងទេសចរណ៍អន្តរជាតិ និងទេស​ចរណ៍ក្នុងស្រុក ដែលជាទិសដៅយុទ្ធសាស្រ្តក្នុងដំណាក់កាលទី២ នៃផែនការស្តារ និងអភិវឌ្ឍវិស័យទេសចរណ៍ ក្នុងនិងក្រោយដំណាក់កាលកូវីដ-១៩ ឆ្នាំ២០២០-២០២៥។

ការបើកដំណើរការសេដ្ឋកិច្ច សង្គមឡើងវិញ បានជំរុញឱ្យភ្ញៀវទេសចរចេញកម្សាន្ត នៅតាមគោលដៅទេសចរណ៍​សំខាន់ៗ ដូចជាក្នុងខេត្តសៀមរាប រាជធានីភ្នំពេញ ខេត្តព្រះសីហនុ និងគោលដៅទេសចរណ៍មួយចំនួនទៀត មានសកម្មភាពទេសចរណ៍ជាច្រើនឡើងវិញ។

ក្រសួងទេសចរណ៍ បានបង្ហាញតួលេខភ្ញៀវទេសចរ ដែលចេញកម្សាន្តថ្ងៃចុងសប្តាហ៍ ថ្ងៃទី ២០-២១ ខែ សីហា ​មានភ្ញៀវបរទេសផ្ទៃក្នុងប្រមាណ ២២,២០៨នាក់៕