អាជ្ញាធររាជធានីភ្នំពេញ ប្រមូលកំប្លោក និងសំរាមនៅតាមមាត់ទន្លេក្បែរសណ្ឋាគារសុខាភ្នំពេញ

អាជ្ញាធររាជធានីភ្នំពេញ បានប្រមូលកំប្លោក និងសំរាមនៅតាមមាត់ទន្លេក្បែរសណ្ឋាគារសុខាភ្នំពេញ ដើម្បីលើកកម្ពស់សោភ័ណ្ឌភាព អនាម័យ បរិស្ថាន ខណៈប្រទេសកម្ពុជា កំពុងរៀបចំកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ។

លោក ហួត ហៃ អភិបាលរងរាជធានីភ្នំពេញ នៅព្រឹកថ្ងៃទី ៨ ខែវិច្ឆិកានេះ បានដឹកនាំក្រុមការងារចម្រុះប្រើប្រាស់ទូក និងកម្មករក្រុមហ៊ុន 800 Super ប្រមូលកំប្លោក និងសំរាមនៅតាមមាត់ទន្លេ ដើម្បីសោភ័ណ្ឌភាព នៅរាជធានីភ្នំពេញ។ ចំណែកឯរដ្ឋបាលខណ្ឌជ្រោយចង្វារ នៅព្រឹកថ្ងៃអង្គារនេះដែរ ក៏បានបានប្រើប្រាស់រថយន្តបាញ់លាងសម្អាតផ្លូវមាត់ទន្លេ និងជុំវិញសណ្ឋាគារសុខាភ្នំពេញផងដែរ។

សូមជម្រាបថា ប្រទេសកម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ ចាប់ពីថ្ងៃទី ១០ ដល់ថ្ងៃទី ១៣ ខែវិច្ឆិកា ឆ្នាំ ២០២២ ដោយមានការចូលរួមពីមេដឹកនាំអាស៊ាន និងមេដឹកនាំពិភពលោកមួយចំនួនទៀត៕