សម្តេច ទៀ បាញ់ ៖ ការអូសបន្លាយសង្រ្គាមរុស្ស៊ី-អ៊ុយក្រែន ជាការគំរាមកំហែងសន្តិភាពក្នុងតំបន់ និងពិភពលោក

សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានអះអាងថា ការអូសបន្លា​យនៃសង្គ្រាមរវាងរុស្ស៊ី និងអ៊ុយក្រែន បញ្ហានុយក្លេអ៊ែរកូរ៉េខាងជើង និងភាពតានតឹងនៃការប្រកួតប្រ​ជែង​ភូមិសាស្ត្រនយោបាយរវាងមហាអំណាច នៅតែបន្តបង្កការគំរាមកំហែងចំពោះសន្តិភាព និងការអភិវឌ្ឍន៍​ប្រក​បដោយចីរភាពនៅក្នុងតំបន់ និងពិភពលោកទាំងមូល។ សម្តេច ទៀ បាញ់ បានអះអាងដូច្នេះនៅក្នុងកិច្ចប្រជុំចង្អៀតរដ្ឋមន្រ្តីការពារជាតិអាស៊ាន (ADMM Retreat)នៅខេត្តសៀមរាប នៅព្រឹកថ្ងៃទី ២២ ខែវិច្ឆិកា ឆ្នាំ២០២២ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះមុខរដ្ឋមន្ត្រីការពារជាតិនៃប្រទេសជាសមាជិកអាស៊ាន សម្តេចពិជ័យសេនា ទៀ បាញ់ បានលើកឡើងថា នៅក្នុងរយៈពេល១៦ឆ្នាំកន្លងមកនេះ កិច្ចប្រជុំចង្អៀតរដ្ឋមន្រ្តីការពារជាតិអាស៊ាន (ADMM Retreat)បានក្លាយជាវេទិកាដ៏មានសារៈប្រយោជន៍សម្រាប់កិច្ចសន្ទនាជាយុទ្ធសាស្ត្រ ការកសាងទំនុកចិត្ត និងកិច្ចសហប្រតិបត្តិការក្នុងតំបន់ ដើម្បីរក្សាសន្តិភាព សន្តិសុខ ស្ថិរភាព និងវិបុលភាពរបស់អាស៊ាន។ បើតាមសម្តេចប្រមុខការពារជាតិកម្ពុជា គឺនៅខណៈពេលដែលតំបន់អាស៊ាន បាន និងកំពុងប្រឹងងើបឡើងវិញពីវិបត្តិកូវីដ១៩ និងឈានទៅរកប្រក្រតីភាពបែបថ្មីមួយ ស្ថានភាពសន្តិសុខនាពេលបច្ចុប្បន្ននៅក្នុងតំបន់ ក៏ដូចជានៅក្នុងពិភពលោកទាំងមូល នៅតែមានភាពផុយស្រួយ និងកាន់តែមិនច្បាស់លាស់ឡើង។

សម្តេចពិជ័យសេនា បានបន្តថា ជារៀងរាល់ឆ្នាំ ចាប់តាំងពីការបង្កើតឡើងមក កិច្ចប្រជុំចង្អៀត ADMM តែងតែប្រឈមមុខនឹងបញ្ហាមួយចំនួន។ នៅក្នុងឆ្នាំនេះ ក៏មិនខុសពីបណ្តាឆ្នាំមុនដែរ មានបញ្ហាជាច្រើនដែលគំរាមកំហែងយ៉ាងធ្ងន់ធ្ងរដល់សន្តិសុខ និងភាពសុខដុមរមនារបស់តំបន់ និងប្រជាជន។ បញ្ហាប្រឈមទាំងអស់នេះ បង្ហាញពីតម្រូវការខ្ពស់សម្រាប់កិច្ចខិតខំប្រឹងប្រែងរួម និងស្មារតីសាមគ្គីភាពដ៏រឹងមាំរបស់វិស័យការពារជាតិរបស់អាស៊ាន ដើម្បីរួមគ្នាដោះស្រាយ។ សម្តេច បញ្ជាក់ថា ច្បាស់ណាស់ថា គ្មានប្រទេសណាអាចដោះស្រាយបញ្ហាប្រឈមរបស់ពិភពលោកតែម្នាក់ឯងបានទេ។

សូមជម្រាបជូនថា កិច្ចប្រជុំចង្អៀតរដ្ឋមន្រ្តីការពារជាតិអាស៊ាន (ADMM Retreat) និងកិច្ចប្រជុំពាក់ព័ន្ធផ្សេងទៀតនៅឆ្នាំនេះ ធ្វើឡើងក្រោមប្រធានបទ​៖ “សាមគ្គីភាព ដើម្បីសន្តិសុខប្រកបដោយភាពសុខដុម”។ តាមរយៈប្រធានបទនេះ គឺបានបញ្ជាក់សារជាថ្មីនូវការប្តេជ្ញាចិត្តក្នុងការឆ្លើយតបរបស់អាស៊ានចំពោះបញ្ហាប្រឈមរួមនៅក្នុងតំបន់ ដោយផ្តោតលើសាមគ្គីភាព និងភាពស្អិតល្មួតរបស់កិច្ចប្រជុំចង្អៀតADMM ដែលជាយន្តការគន្លឹះក្នុងការដោះស្រាយបញ្ហាប្រឈមផ្នែកសន្តិសុខរួមរបស់អាស៊ាន ជាពិសេស ក្តីកង្វល់លើសន្តិសុខមិនមែនជាប្រពៃណី ដូចជា គ្រោះធម្មជាតិ និងជំងឺរាតត្បាតសកល៕

ដោយ៖ គឿនវេត