តាមការអញ្ជើញរបស់ភាគីវៀតណាម ប្រមុខការទូតកម្ពុជានឹងទៅចូលរួមវេទិកាអនាគតអាស៊ាន នៅទីក្រុងហាណូយ

តបតាមការអញ្ជើញរបស់សមភាគីវៀតណាម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា នឹងអញ្ជើញចូលរួមវេទិកាអនាគតអាស៊ាន លើកទី២ នៅទីក្រុងហាណូយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីប្រកាសព័ត៌មានរបស់ក្រសួងការបរទេស គឺលោកឧបនាយករដ្ឋមន្ត្រី ប្រាក់ សុខុន នឹងអញ្ជើញចូលរួមក្នុងវេទិកាអនាគតអាស៊ាន លើកទី២ នៅទីក្រុងហាណូយ នៅថ្ងៃទី២៥ ដល់ថ្ងៃទី២៦ ខែ កុម្ភៈ ឆ្នាំ២០២៥ តបតាមការអញ្ជើញរបស់លោក BUI Thanh Son ឧបនាយករដ្ឋមន្ត្រី រដ្ឋមន្ត្រីការបរទេសវៀតណាម។

វេទិកាដែលនឹងប្រព្រឹត្តទៅក្រោមមូលបទ «ការកសាងអាស៊ានប្រកបដោយការរួបរួម បរិយាបន្ន និងភាពធន់ ក្នុងបរិបទនៃបរិវត្តកម្មសាកល» នឹងប្រមូលផ្តុំថ្នាក់ដឹកនាំរដ្ឋាភិបាល អ្នកតាក់តែងគោលនយោបាយ អ្នកជំនាញ និងអ្នកអនុវត្ត ចូលរួមក្នុងកិច្ចសន្ទនាកម្រិតខ្ពស់ ដើម្បីពិភាក្សាលើបញ្ហាដែលមានសារៈសំខាន់ជាយុទ្ធសាស្ត្រសម្រាប់អនាគតរបស់អាស៊ាន។

ឧបនាយករដ្ឋមន្រ្តី ប្រាក់ សុខុន នឹងថ្លែងសុន្ទរកថានៅសម័យប្រជុំលើកទី២ នៃវេទិកានេះ លើប្រធានបទ «ការពិនិត្យឡើងវិញនូវគោលការណ៍គ្រឹះរបស់អាស៊ាន៖ ការត្រៀមលក្ខណៈសម្រាប់ការ ប្រឈមនាពេលអនាគត»។

ក្នុងឱកាសចូលរួមវេទិកានេះ លោកឧបនាយករដ្ឋមន្ត្រី គ្រោងមានជំនួបទ្វេភាគីដាច់ដោយឡែកជាមួយសមភាគីអាស៊ានមួយចំនួន ដើម្បីពិភាក្សាអំពីការធ្វើឱ្យទំនាក់ទំនង និងកិច្ចសហប្រតិបត្តិការទ្វេភាគីកាន់តែស៊ីជម្រៅថែមទៀត៕