ប្រមុខការពារជាតិអាស៊ាននឹងជួបគ្នានៅម៉ាឡេស៊ី ជជែកពីបញ្ហាតំបន់ ពាក់ព័ន្ធការពង្រឹងសន្តិសុខ និងវិបុលភាពអាស៊ាន

បណ្ដារដ្ឋមន្ត្រីការពារជាតិអាស៊ាន នឹងជួបគ្នានៅប្រទេសម៉ាឡេស៊ី ដើម្បីជជែកពីបញ្ហាក្នុងតំបន់ ដែលពាក់ព័ន្ធនឹងការពង្រឹងសន្តិសុខ និងវិបុលភាពរបស់អាស៊ាន។ រដ្ឋមន្ត្រីការពារជាតិកម្ពុជា នាយឧត្តមសេនីយ៍ ទៀ សីហា ក៏បានចាកចេញពីភ្នំពេញហើយ ដើម្បីទៅចូលរួមកិច្ចប្រជុំនេះ។

តបតាមការអញ្ជើញរបស់រដ្ឋមន្ត្រីការពារជាតិម៉ាឡេស៊ី និងជាប្រធានកិច្ចប្រជុំរដ្ឋមន្ត្រីការពារជាតិអាស៊ាន នាព្រឹកថ្ងៃទី២៥ ខែកុម្ភៈនេះ លោកនាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានដឹកនាំគណៈប្រតិភូយោធាជាន់ខ្ពស់កម្ពុជា អញ្ជើញចូលរួមកិច្ចប្រជុំរដ្ឋមន្ត្រីការពារជាតិអាស៊ាននិងកិច្ចប្រជុំចង្អៀតរដ្ឋមន្ត្រីការពារជាតិអាស៊ាន ដែលនឹងប្រព្រឹត្តទៅចាប់ពីថ្ងៃទី២៥ ដល់ថ្ងៃទី២៧ ខែកុម្ភៈ ឆ្នាំ២០២៥ នៅទីក្រុងប៉េណាំង ប្រទេសម៉ាឡេស៊ី។

យោងតាមសេចក្ដីប្រកាសរបស់ក្រសួងការពារជាតិ កិច្ចប្រជុំចង្អៀតរដ្ឋមន្ត្រីការពារជាតិអាស៊ាន ឆ្នាំ២០២៥ នឹងប្រព្រឹត្តទៅក្រោមមូលបទ «ការឯកភាពអាស៊ាន ដើម្បីសន្តិសុខ និងវិបុលភាព» ដោយនឹងផ្តោតលើកិច្ចពិភាក្សាផ្លាស់ប្តូរទស្សនៈស្តីពីការពង្រឹងឯកភាពអាស៊ាន និងជំរុញកិច្ចសហប្រតិបត្តិការតំបន់ដើម្បីដោះស្រាយបញ្ហាប្រឈមផ្នែកសន្តិសុខ ដែលកំពុងកើតមាន ព្រមទាំងគិតគូលើការពង្រឹងមជ្ឈភាពអាស៊ាន និងការធ្វើឱ្យកាន់តែមានប្រសិទ្ធិភាពកិច្ចសហប្រតិបត្តិការជាក់ស្តែងក្រោមយន្តការកិច្ចប្រជុំរដ្ឋមន្ត្រីការពារជាតិអាស៊ាន (ADMM) និង ADMM-Plus។

តាមការគ្រោងទុក រដ្ឋមន្ត្រីការពារជាតិអាស៊ាន ក៏នឹងអនុម័តសេចក្តីថ្លែងការណ៍រួមស្តីពីកិច្ចសហប្រតិបត្តិការក្នុងវិស័យបញ្ញាសិប្បនិម្មិតក្នុងវិស័យការពារជាតិផងដែរ។

ដោយឡែក ក្នុងឱកាសនៃកិច្ចប្រជុំចង្អៀតនេះ ឧបនាយករដ្ឋមន្ត្រី រដ្ឋមន្ត្រីការពារជាតិ ក៏គ្រោងនឹងមានជំនួបពិភាក្សាទ្វេភាគីជាមួយសមភាគីអាស៊ានមួយចំនួន ដើម្បីជំរុញកិច្ចសហប្រតិបត្តិការពារជាតិដែលជាផលប្រយោជន៍រួម ទាំងក្នុងក្របខណ្ឌទ្វេភាគី និងពហុភាគី៕