ព័ត៌មានជាតិ

សហភាពសហព័ន្ធយុវជនកម្ពុជារាជធានីភ្នំពេញ ផ្តល់អាហារូបករណ៍៥០កន្លែងដល់សិស្សជាប់បាក់ឌុបឆ្នាំនេះ

បានផុស

៣ years មុន

នៅ

ថ្ងៃពុធ ៦ មករា ២០២១

ដោយ

ភ្នំពេញ ៖ សហភាពសហព័ន្ធយុវជនកម្ពុជារាជធានីភ្នំពេញក្រោមកិច្ចសហការជាមួយសាលាជាតិកសិកម្មព្រែកលាប បានផ្ដល់អាហារូបករណ៍ថ្នាក់បរិញ្ញាបត្ររងចំនួន២៥នាក់និងថ្នាក់បរិញ្ញាបត្រចំនួន២៥ នាក់ដល់សិស្សានុសិស្សដែលប្រឡងជាប់បាក់ឌុបនៅឆ្នាំ២០២០នេះ។

យោងតាមសេចក្តីជូនដំណឹងស្ដីពីការផ្ដល់អាហារូបករណ៍ឲ្យចូលសិក្សាថ្នាក់បរិញ្ញាបត្ររងថ្នាក់បរិញ្ញាបត្រសហភាពសហព័ន្ធយុវជនកម្ពុជារាជធានីភ្នំពេញ ចុះថ្ងៃទី០៦មករាឲ្យដឹងថា ដើម្បីបន្តរួមចំណែកជាមួយរាជរដ្ឋាភិបាលក្នុងការលើកកម្ពស់ការអប់រំនិងបណ្ដុះបណ្ដាលធនធានមនុស្សនៃព្រះរាជាណាចក្រកម្ពុជាក្នុងឆ្នាំសិក្សា២០២០ ២០២១នេះ សហភាពសហព័ន្ធយុវជនកម្ពុជារាជធានីភ្នំពេញក្រោមកិច្ចសហការជាមួយសាលាជាតិកសិកម្មព្រែកលាបផ្ដល់អាហារូបករណ៍ថ្នាក់បរិញ្ញាបត្ររងសិក្សារយៈពេល២ឆ្នាំចំនួន២៥នាក់ និង ថ្នាក់បរិញ្ញាបត្រសិក្សារយៈពេល៤ឆ្នាំចំនួន២៥នាក់ដល់សិស្សសែលបានប្រឡងជាប់បាក់ឌុបឆ្នាំ២០២០នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីជូនដំណឹងដដែលបានបន្តថា ចំពោះលក្ខខណ្ឌចុះឈ្មោះចូលរៀនសម្រាប់តែសិស្សានុសិស្សដែលបានប្រឡងនិងប្រឡងជាប់មធ្យមសិក្សាទុតិយភូមិឆ្នាំ២០២០តែប៉ុណ្ណោះ និងត្រូវមានឯកសារបញ្ជាក់ពីមន្ទីរ ឬ ក្រសួងអប់រំយុវជននិងកីឡាអំពីការបានប្រឡងនិងប្រឡងជាប់មធ្យមសិក្សាទុតិយភូមិឆ្នាំ២០២០នេះ។

ជាមួយគ្នានោះដែរ បេក្ខជនបេក្ខនារីត្រូវមកស្នើសុំបំពេញទម្រង់បែបបទសុំអាហារូបករណ៍នៅទីស្នាក់ការសហភាពសហព័ន្ធយុវជនកម្ពុជារាជធានីភ្នំពេញ ដែលមានអាសយដ្ឋានវិថីវិចិត្រសិល្បៈភូមិព្រែកលាបសង្កាត់ព្រែកលាប ខណ្ឌជ្រោយចង្វាររាជធានីភ្នំពេញ ឬ ទំនាក់ទំនងទូរសព្ទលេខ០១៦៨៣១៣៩៧និង០១២៩០៦០០៦ចាប់ពីថ្ងៃជូនដំណឹងនេះរហូតដល់ថ្ងៃទី១៨ខែមករាឆ្នាំ២០២១៕

ដោយ ៖ សំអឿន