អគ្គនាយកសហព័ន្ធសន្តិភាពសកល អបអរសាទរចំពោះសម្ដេចតេជោ ដែលរៀបចំដឹកនាំកិច្ចប្រជុំកំពូលអាស៊ាន ប្រកបដោយជោគជ័យ

អគ្គនាយកសហព័ន្ធសន្តិភាពសកល ​បានសម្ដែងការអបអរសាទរជូនចំពោះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ ដែលបានរៀបចំ និងដឹកនាំកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ ប្រកបដោយជោគជ័យ។

ការសម្ដែងការអបអរសាទរនេះ គ្រាដែលសម្តេចតេជោ ហ៊ុន សែន បានអនុញ្ញាតឲ្យលោកបណ្ឌិត Yun Young-ho អគ្គនាយកសហព័ន្ធសន្តិភាពសកល ចូលសម្ដែងការគួរសម និងពិភាក្សាការងារ នៅព្រឹកថ្ងៃទី ២០ ខែធ្នូ ឆ្នាំ ២០២២ នេះ។

នៅក្នុងជំនួបនេះលោកបណ្ឌិត Yun Young-ho បានសម្ដែងការអបអរសាទរជូនចំពោះសម្ដេចតេជោ ដែលបានរៀបចំ និងដឹកនាំកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ ព្រមទាំងកិច្ចប្រជុំអាស៊ាន-អឺរ៉ុប ដែលទើបបញ្ចប់នាពេលថ្មីៗនេះ ប្រកបដោយជោគជ័យ។

លើសពីនេះទៀតលោកបណ្ឌិត Yun Young-ho ក៏បានគោរពរាយការណ៍ជូនសម្ដេចតេជោ អំពីដំណើរការកៀរគរការគាំទ្រធម្មនុញ្ញសន្តិភាពពិភពលោក និងគម្រោងសួនសន្តិភាពមេគង្គ ហើយក៏បានគោរពស្នើសុំអ​នុសាសន៍របស់សម្ដេច តេជោ ក្នុងករណីនេះផងដែរ។

ជាការឆ្លើយតបសម្ដេចតេជោ ហ៊ុន សែន បានថ្លែងអំណរគុណជូនលោកអគ្គនាយកសហព័ន្ធសន្តិភាពសកល ចំពោះការអបអរសាទរនៃកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ។

សម្ដេចតេជោ ហ៊ុន សែន មានប្រសាសន៍ថា កិច្ចប្រជុំអាស៊ាននៅឆ្នាំ ២០២២នេះ គឺមានបញ្ហាចាក់ស្រះយ៉ាងច្រើន តែទោះជាយ៉ាងណាក៏ដោយ ក៏ប្រទេសកម្ពុជា បានដោះស្រាយបានទាំងអស់ ហើយបានចេញឯកសារចំនួន ១០១ឯកសារ ដោយមិនមានការរាំងស្ទះឡើយ។

ជាមួយគ្នានេះ សម្ដេចតេជោ ហ៊ុន សែន បានផ្ដល់អ​នុសាសន៍ជូនលោកបណ្ឌិត Yun Young-ho ដែលឲ្យជំរុញការគាំទ្រតាមទម្រង់យូភីហ្វែប បូកអែក នោះគឺតាមរយៈការគាំទ្រពីតូចទៅធំ។ រីឯគម្រោងសួនសន្តិភាពមេគង្គវិញ សម្ដេច តេជោ ហ៊ុន សែន ស្នើឲ្យធ្វើការងារនេះបន្ថែមទៀត៕