មកដឹងដំណោះស្រាយបញ្ហាអគារជាប់គាំងនៅខេត្តព្រះសីហនុ

លោក ជា កុកហុង ប្រធានលេខាធិការដ្ឋានសម្របសម្រួលរៀបចំផែនការមេខេត្តព្រះសីហនុឱ្យប្រែក្លាយទៅជាតំបន់​សេដ្ឋកិច្ចពិសេសពហុបំណង នៃក្រសួងសេដ្ឋកិច្ច បានលើកឡើងថា នៅខែតុលា ឆ្នាំ ២០២២ រាជរដ្ឋាភិបាល បានចេញ ស.ជ.ណ មួយចង្អុលបង្ហាញដល់ក្រសួងសេដ្ឋកិច្ច ក្រសួងរៀបចំដែនដី ក្រសួងយុត្តិធម៌ និងក្រសួងទេសចរណ៍ ឱ្យបង្កើត​គណៈកម្មាធិការ សិក្សារៀបចំដំណោះស្រាយជាកញ្ចប់ ទៅលើបញ្ហាជាប់គាំងអគារជាង ១ពាន់នៅខេត្តព្រះសហនុ។

បើតាមលោក ជា កុកហុង គិតមកដល់ពេលនេះ ស្ថាប័នពាក់ព័ន្ធ បានធ្វើការដោះស្រាយតាមលំដាប់លំដោយ ដូចជា ច្បាប់សាងសង់ វិវាទក្រៅប្រព័ន្ធតុលាការ លើកទឹកចិត្តពន្ធដារ ដើម្បីយកទៅអភិវឌ្ឍអគារដែលកំពុងជាប់គាំងទាំងអស់ និងទាក់ទាញអ្នកធុរកិច្ចផ្សេងៗ។ មន្រ្តីជាន់ខ្ពស់រូបនេះ បានបញ្ជាក់ថា ក្រុមការងារបាននិងកំពុងទាក់ទាញអ្នក​វិនិយោគិន​ថ្មីឱ្យចូលទៅអភិវឌ្ឍនៅខេត្តព្រះសីហនុ។ លោក ជា កុកហុង លើកឡើងបែបនេះ តាមការចង្អុលបង្ហាញ​របស់លោក វង្សី វិស្សុត នៅក្នុងវេទិកាសាធារណៈស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២៣ កាលពីថ្ងៃទី ២៥ មករា។

នៅក្នុងវេទិកានេះ លោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានសង្កត់ធ្ងន់ថា ការជាប់គាំងអគារជាច្រើននៅខេត្តព្រះសីហនុនេះ កើតឡើងដោយសារការវិនិយោគ​ពុំមានក្របខណ្ឌស្ថាប័នគ្រប់គ្រងច្បាស់លាស់។ លោកបន្តដូច្នេះថា« ទោះជាការវិនិយោគរបស់ឯកជនក៏ដោយ ប៉ុន្តែនៅពេលមានបញ្ហា មិនមែនឯកជនមកដោះស្រាយឯណា គឺរដ្ឋជាអ្នកដោះស្រាយ…ឥឡូវនេះ យើងយកបន្ទុក​ទូទាំងប្រទេស ទៅដោះស្រាយបញ្ហារបស់អ្នកវិនិយោគដែលបង្កើតបញ្ហាឱ្យសង្គម បើយើងមិនដោះ​វាមិនកើត តែបើដោះប៉ះដល់ប្រជាជនដែលជាអ្នកបង់ពន្ធ ព្រោះត្រូវយកលុយរដ្ឋទៅដោះស្រាយបញ្ហាទាំងអស់នេះ»។

នៅក្នុងរឿងរ៉ាវនេះ លោក វង្សី វង្សុត មិនបាននិយាយច្រើននោះទេ ដោយលោក លើកឡើងដូច្នេះថា« ខ្ញុំមិនទាន់អះ​អាងទេ ទុកពេលបន្តិចសិន ប្រហែលជាលើកក្រោយនឹងនិយាយហើយ ព្រោះយើងទើបចូលដល់ដំណាក់កាលទី២ ហើយនៅខែកុម្ភៈខាងមុខនេះ នឹងមានកិច្ចប្រជុំដោះស្រាយ ហើយទី៣នឹងបញ្ចប់ក្របខណ្ឌផែនការមេនេះ ក្នុងនោះ​ការរៀប​ចំក្របខណ្ឌគោលនយោបាយក៏ដូចជាវិធានការគោលនយោបាយក្នុងការ​ដោះស្រាយអគារជាប់​គាំងនៅក្រុង​ព្រះសីហនុមានការគិតគូដោះស្រាយជាកញ្ចប់ទាំងមូល»។

ទាក់ទិនបញ្ហានេះដែរ លោកបណ្ឌិត គី សេរីវឌ្ឍន៍ អ្នកវិភាគសេដ្ឋកិច្ចនៃរាជបណ្ឌិត្យសភាកម្ពុជា មើលឃើញថា អគារជាប់គាំងនៅខេត្តព្រះសីហនុនេះ ជាអគាររបស់វិស័យឯកជន មានន័យថា ជាទ្រព្យរបស់ប្រជាជន​នៅក្នុងស្រុក​បានធ្វើកិច្ចសន្យាសាងសង់ជាមួយក្រុមហ៊ុនវិនិយោគរបស់ចិន។ លោកគូសបញ្ជាក់ថា បញ្ហានេះ មានតែការ​សម្រប​សម្រួល និងលើកទឹកចិត្តដល់អ្នកវិនិយោគឯកជនចូលមក ដើម្បីអភិវឌ្ឍបន្ត មិនអាចឱ្យរដ្ឋាភិបាល​ទៅចាត់ចែង​ទ្រព្យសម្បត្តិរបស់វិស័យឯកជនបានទេ។ ដោយឡែកការរំពឹងថា មានវិនិយោគិនចូលទៅ​អភិវឌ្ឍអគារទាំង​អស់នេះ នៅខេត្តព្រះសីហនុ លោកបណ្ឌិត គី សេរីវឌ្ឍ កត់សម្គាល់ឃើញថា មិនទាន់អាចទៅរួចនៅឡើយ។ ដោយលើកឡើងថា«ទី១ ខ្ញុំមិនទាន់យល់ថាចិននឹងចូលមកកម្ពុជានៅឆ្នាំ ២០២៣នេះច្រើនទេ ដោយសារតែបញ្ហា​វិបត្តិសេដ្ឋកិច្ចសកលលោក ហើយសេដ្ឋកិច្ចរបស់ចិន ក៏យើងមើលឃើញថាមានកំណើនតែ ២ភាគរយ ដែលពីមុន​មានកំណើនរហូតដល់ ៦.៥ភាគរយ ដូច្នេះហើយ ការថមថយនៃសេដ្ឋកិច្ចរបស់ចិន ក៏អាចនឹងធ្វើឱ្យចិនរួញរា ឬនៅទ្រឹង​មួយកន្លែងចំពោះការវិនិយោគក្រៅប្រទេស»។

អ្នកវិភាគសេដ្ឋកិច្ចជាន់ខ្ពស់រូបនេះ បានគូសបញ្ជាក់ថា ឆ្នាំ ២០២៣ គឺជាឆ្នាំដែលទេសចរកើនឡើង សម្រាប់ស្វែង​រកឱកាសនៃការវិនិយោគ, ឆ្នាំ ២០២៤ ឬ ២០២៥ ជាឆ្នាំដែលអាចបង្ហូរវិនិយោគ​ចិនចូលមកកម្ពុជាបន្ថែមទៀត៕