ព័ត៌មានជាតិ

លោកបណ្ឌិត គិន ភា ប្រាប់មូលហេតុដែលនាំ អ៊ុយក្រែន ចង់ចូល ណាតូ

បានផុស

១ year មុន

នៅ

ថ្ងៃចន្ទ ៣០ មករា ២០២៣

ដោយ

លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា និងជាអ្នកវិភាគ បានលើកឡើងថា មិនមែននៅសុខៗ ប្រទេសអ៊ុយក្រែន ចង់ចូលក្នុងអង្គការសន្ធិសញ្ញាអាត្លង់ទិចខាងជើង (ណាតូ) ទេ ដោយវាមានកត្តាខាងក្នុង និងកត្តាខាងក្រៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកម្មវិធីកិច្ចពិភាក្សា រៀបចំឡើងដោយសារព័ត៌មានកម្ពុជាថ្មី ស្ដីពី តើសង្គ្រាមរុស្ស៊ី-អ៊ុយក្រែន អាចនឹងបញ្ចប់ដោយរបៀបណា? កាលពីថ្ងៃសុក្រ សប្ដាហ៍មុន លោកបណ្ឌិត គិន ភា បានរំលឹកថា ក្រោយពេលដួលរលំ នៃអតីតសហភាពសូវៀត គឺ រុស្ស៊ី និង អ៊ុយក្រែន រស់នៅជាមួយគ្នាដោយសុខដុមរមនាទេ។ ប៉ុន្តែបន្តិចម្ដងៗ លោកខាងលិច ដែលដឹកនាំដោយ សហរដ្ឋអាមេរិក បានព្យាយាមបញ្ចុះបញ្ចូល អ៊ុយក្រែន ដើម្បីឲ្យស្ថិតនៅក្រោមឥទ្ធិពលរបស់ខ្លួន។

ដូច្នេះដើម្បីឲ្យ អ៊ុយក្រែន ស្ថិតក្រោមឥទ្ធិពលរបស់ខ្លួន សហរដ្ឋអាមេរិក បានខិតខំដាក់ចេញនូវការខិតខំប្រឹងប្រែង ៣ ចំណុច ដូចជា ៖

ទី១-ធ្វើយ៉ាងណារុញ អ៊ុយក្រែន ឲ្យក្លាយទៅជាសមាជិក EU សហភាពអឺរ៉ុប។ ទី២- រុញ អ៊ុយក្រែន ឲ្យចូលជាសមាជិក ណាតូ។ ទី៣-ឲ្យ អ៊ុយក្រែន ក្លាយជាប្រទេសមួយដែលគាំទ្រលទ្ធិប្រជាធិបតេយ្យសេរីបែបលោកខាងលិច។ ៣ ចំណុចនេះ ជាកត្តាដែលជំរុញឲ្យ អ៊ុយក្រែន ចង់ចូល ណាតូ។ ហើយតាមរយៈ ៣ ចំណុចនេះ គឺរុញចូលទៅដល់នយោបាយផ្ទៃក្នុងរបស់ អ៊ុយក្រែន តែម្ដង។ នេះជាការមើលឃើញរបស់លោកបណ្ឌិត គិន ភា។

អ្នកវិភាគរូបនេះ បានលើកឡើងដែរថា «យើងឃើញរាល់ពេលប្រធានាធិបតី អ៊ុយក្រែន ដែលមាននិន្នាការ រុស្ស៊ី តែងតែមានកុបកម្ម និងបដិវត្ត។ យើងឃើញបដិវត្តទឹកក្រូច នៅអ៊ុយក្រែននេះ គឺមិនមែនរឿងកត្តាផ្ទៃក្នុងតែឯងទេ។ គឺការលូកដៃខាងក្រៅ អញ្ចឹងទេ ខ្ញុំគិតថា អ៊ុយក្រែន ដែលចង់ចូល ណាតូ នោះ គឺមានការរុញពីកត្តាខាងក្រៅនោះជាកត្តាកំណត់។ រីឯកត្តាខាងក្នុងនោះក៏មានដែរ មិនអតទេ។ នៅពេលគេឃើញ សហព័ន្ធរុស្ស៊ី កាន់តែពង្រីកឥទ្ធិពលរបស់ខ្លួន ជាពិសេសពង្រីកដែនសន្តិសុខរបស់ខ្លួនកាន់តែខ្លាំងឡើង អញ្ចឹងគឺរដ្ឋជាអតីតសហភាពសូវៀត ដែលនៅអឺរ៉ុបខាងកើតភាគច្រើន បានចូលជាសមាជិកណាតូ សូម្បីរដ្ឋនៅបាល់តិក ក៏បានចូលជាសមាជិកណាតូដែរ។

ដូច្នេះគឺជាការរុញឲ្យប្រជាជនអ៊ុយក្រែនមួយចំនួន មិនមាននិន្នាការគាំទ្រ រុស្ស៊ី ដែលមាននិន្នាការលោកខាងលិចខ្លាំងនោះ គឺរុញឲ្យមានចរន្ត នៃការប៉ុនប៉ងចង់ចូលជាសមាជិកណាតូ របស់ អ៊ុយក្រែន ដែលគេចាត់ទុកថា ណាតូ គឺជាខែលសន្តិសុខដ៏មានឥទ្ធិពលដើម្បីទប់ទល់ជាមួយនឹងរុស្ស៊ី»៕

អត្ថបទ ៖ ពិសី