​កូរ៉េខាងជើង​​គាំទ្រ​​​​រុស្ស៊ី​ឥតងាករេ​​ក្នុងសង្គ្រាម​នៅ​អ៊ុយក្រែន​ ក្នុង​​ជំនួប​​​មន្ត្រី​កំពូលរុស្ស៊ី

ប្រព័ន្ធផ្សព្វផ្សាយរដ្ឋកូរ៉េខាងជើង បានឲ្យដឹងថា មេដឹកនាំកូរ៉េខាងជើងលោក Kim Jong Un បានសម្តែងនូវការគាំទ្រឥតងាករេ​ចំពោះសង្គ្រាមរបស់រុស្ស៊ីនៅអ៊ុយក្រែន ក្នុង​អំឡុងពេលជួបជាមួយមន្ត្រីសន្តិសុខកំពូលរុស្ស៊ីនៅទីក្រុងព្យុងយ៉ាង។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២២ខែមីនានេះ។

បើតាមភ្នាក់ងារស៊ើបការណ៍សម្ងាត់ជាតិរបស់កូរ៉េខាងត្បូង ជំនួបកាលពីថ្ងៃសុក្ររវាងលោក Kim និងលោក Sergei Shoigu លេខាធិការក្រុមប្រឹក្សាសន្តិសុខរុស្ស៊ី កូរ៉េខាងជើងទំនងជាបានបញ្ជូនកងទ័ពបន្ថែមទៅរុស្ស៊ី បន្ទាប់ពីកងកម្លាំងរបស់ខ្លួនបានទទួលរងគ្រោះយ៉ាងធ្ងន់ធ្ងរក្នុងការប្រយុទ្ធគ្នាក្នុងសង្គ្រាមរុស្ស៊ី-អ៊ុយក្រែន ទោះបីអ៊ុយក្រែន និងរុស្ស៊ីបានព្រមព្រៀងគ្នាជាគោលការណ៍កាលពីថ្ងៃពុធចំពោះបទឈប់បាញ់ដែលមានកម្រិតក៏ដោយ។

ប្រព័ន្ធផ្សព្វផ្សាយរដ្ឋរបស់កូរ៉េខាងជើង និងរុស្ស៊ី បាននិយាយថា លោក Kim និង Shoigu បានពិភាក្សាគ្នាអំពីបញ្ហាជាច្រើន រួមទាំងសង្គ្រាមរបស់រុស្ស៊ីនៅអ៊ុយក្រែន ការសន្ទនារបស់ទីក្រុងម៉ូស្គូជាមួយរដ្ឋបាល Trump និងស្ថានភាពសន្តិសុខនៅឧបទ្វីបកូរ៉េ។ ពួកគេបានអះអាងសារជាថ្មីអំពីឆន្ទៈរបស់មេដឹកនាំប្រទេសទាំងពីរក្នុងការរក្សា «ដោយគ្មានលក្ខខណ្ឌ» នូវសន្ធិសញ្ញាការពារទៅវិញទៅមកដ៏សំខាន់មួយដែលបានឈានដល់ក្នុងកិច្ចប្រជុំកំពូលកាលពីឆ្នាំមុនក្នុងទីក្រុងព្យុងយ៉ាងសន្យាផ្តល់ជំនួយទៅវិញទៅមក ប្រសិនបើប្រទេសទាំងពីរប្រឈមមុខនឹងការឈ្លានពាន។

លោក Kim ក្នុងអំឡុងពេលកិច្ចប្រជុំបាននិយាយថា រដ្ឋាភិបាលរបស់លោកនឹង «គាំទ្ររុស្ស៊ីជានិច្ចក្នុងការតស៊ូដើម្បីការពារអធិបតេយ្យភាពជាតិ បូរណភាពទឹកដី និងផលប្រយោជន៍សន្តិសុខ»។

ចំណែក លោក Shoigu បានប្រាប់សារមួយពីប្រធានាធិបតីរុស្ស៊ី លោក Vladimir Putin ដែលបានស្វាគមន៍លោក Kim និងបានប្តេជ្ញាថានឹងផ្តល់ «ការយកចិត្តទុកដាក់បំផុត» ដល់ការអនុវត្តកិច្ចព្រមព្រៀងដែលសម្រេចបាននៅក្នុងកិច្ចប្រជុំកំពូលនាពេលថ្មីៗនេះរបស់ពួកគេ និងបានសម្តែងការដឹងគុណចំពោះ «សាមគ្គីភាពជាមួយជំហររបស់រុស្ស៊ី» របស់កូរ៉េខាងជើងលើបញ្ហាភូមិសាស្ត្រនយោបាយសំខាន់ៗទាំងអស់ ជាពិសេសលើបញ្ហាអ៊ុយក្រែន។

បើតាមប្រព័ន្ធផ្សព្វផ្សាយកូរ៉េខាងជើង និងរុស្ស៊ីមិនបាននិយាយថាថាតើកិច្ចព្រមព្រៀងថ្មីណាមួយត្រូវបានសម្រេចមុនពេល Shoigu ចាកចេញពីទីក្រុងព្យុងយ៉ាងនោះទេ។

យោងតាមមន្ត្រីចារកម្មអាមេរិក កូរ៉េខាងត្បូង និងអ៊ុយក្រែន បានឱ្យដឹងថា ប្រទេសកូរ៉េខាងជើងបានផ្គត់ផ្គង់សព្វាវុធសាមញ្ញជាច្រើនដល់ប្រទេសរុស្ស៊ី ហើយកាលពីរដូវស្លឹកឈើជ្រុះឆ្នាំមុន វាបានបញ្ជូនទាហានប្រហែល ១០០០០ទៅ១២០០០ នាក់ទៅកាន់ប្រទេសរុស្ស៊ីផងដែរ។ នៅក្នុងសេចក្តីថ្លែងការណ៍របស់ខ្លួនកាលពីថ្ងៃទី ២៧ខែកុម្ភៈ ភ្នាក់ងារស៊ើបការណ៍សម្ងាត់ជាតិរបស់កូរ៉េខាងត្បូងបាននិយាយថា ខ្លួនកំពុងព្យាយាមកំណត់ឱ្យច្បាស់ថាតើចំនួនទាហានបន្ថែមទៀតដែលកូរ៉េខាងជើងបានដាក់ពង្រាយទៅកាន់ប្រទេសរុស្ស៊ី។

លើសពីនេះកូរ៉េខាងត្បូង សហរដ្ឋអាមេរិក និងអ្នកផ្សេងទៀតសង្ស័យថា កូរ៉េខាងជើងកំពុងទទួលបានជំនួយផ្នែកសេដ្ឋកិច្ច និងយោធាពីរុស្ស៊ី ជាថ្នូរនឹងការផ្តល់អាវុធ និងកងទ័ព។ អ្នកជំនាញជាច្រើនបាននិយាយថា កូរ៉េខាងជើងទំនងជានឹងបង្កើនការគាំទ្ររបស់ខ្លួនចំពោះរុស្ស៊ី ដើម្បីទទួលបានផលប្រយោជន៍ជាច្រើនតាមតែអាចធ្វើទៅបានពីរុស្ស៊ី មុនពេលសង្គ្រាមបញ្ចប់៕

អត្ថបទ៖ ប៊ុន សុភាព