ព័ត៌មានជាតិ

SCG ប្រកាសលទ្ធផលប្រតិបត្តិការឆ្នាំ ២០២២ ព្រមជាមួយយុទ្ធសាស្ត្រ ដើម្បីដោះស្រាយការកើនឡើងនូវតម្លៃថាមពល

បានផុស

២ years មុន

នៅ

ថ្ងៃចន្ទ ៦ កុម្ភៈ ២០២៣

ដោយ

ក្រុមហ៊ុន អេសស៊ីជី (SCG) បានប្រកាសពីលទ្ធផលប្រតិបត្តិការឆ្នាំ ២០២២ ដែលបង្ហាញឲ្យឃើញពីការកើនឡើងនូវប្រាក់ចំណូលពីការលក់ ប៉ុន្តែប្រាក់ចំណេញមានការធ្លាក់ចុះ ដែលបណ្ដាលមកពីការចំណាយលើថ្លៃថាមពលមានការកើនឡើងខ្លាំង បញ្ហាអតិផរណា និងដំណើរធ្លាក់ចុះ នៃសេដ្ឋកិច្ចរបស់ប្រទេសចិន និងបញ្ហាវិបត្តិគីមីឥន្ធនៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការឆ្លើយតប អេសស៊ីជី បានបង្កើនការពង្រីកលើអាជីវកម្មថ្មីៗ ហើយផ្ដល់អាទិភាពលើផលិតផលបៃតង ដើម្បីបំពេញតាមតម្រូវការជានិន្នាការធំ និងចាប់យកឱកាសអំឡុងពេលសេដ្ឋកិច្ចងើបឡើងវិញ ក៏ដូចជាទ្រទ្រង់ដល់កំណើន នៃការលូតលាស់។ អាជីវកម្មថាមពលកកើតឡើងវិញរបស់ខ្លួន បានកើនឡើង ៧៨% ហើយក្នុងនោះ ការលក់ប៉ូលីមែរបៃតងបានកើនឡើងលើស ១៤០.០០០ តោន និងបានកើនឡើង ៥ ដង។ ទន្ទឹមនឹងនោះ ដំណោះស្រាយសន្សំសំចៃថាមពលបានទីផ្សារទទួលការស្វាគមន៍ប្រកបដោយភាពវិជ្ជមាន ដោយបានកើនឡើង ៤០% ហើយកំពុងបង្កើននវានុវត្តន៍សម្រាប់ការវេចខ្ចប់ប្រកបដោយនិរន្តរភាព។ កាលពីពេលថ្មីៗ LSP ត្រូវបានត្រៀមរៀបចំចាប់ផ្ដើមផលិតកម្ម និងផ្គត់ផ្គង់លើទីផ្សារនៅពាក់កណ្ដាលឆ្នាំ ២០២៣។ ក្រុមហ៊ុន អេសស៊ីជី ធានាបាននូវហិរញ្ញវត្ថុរឹងមាំ តាមរយៈការរក្សាឲ្យបានមុតមាំនូវសន្ទនីយភាព ការកាត់បន្ថយការចំណាយ និងការវិនិយោគដោយប្រុងប្រយ័ត្នស្របតាមយុទ្ធសាស្ត្ររបស់ខ្លួន។

លោក រ៉ុងរ៉ូត រង្ស៊ីយ៉ូផាស (Roongroote Rangsiyopash) ជាប្រធាន និងជាអគ្គនាយកប្រតិបត្តិ នៃក្រុមហ៊ុន អេសស៊ីជី មានប្រសាសន៍ថា “នៅក្នុងលទ្ធផលប្រតិបត្តិការរបស់ អេសស៊ីជី ឆ្នាំ ២០២២ ប្រាក់ចំណូលគឺមានទំហំទឹកប្រាក់ ៦៦.៤២៣ ពាន់លានរៀល (១៦.២៤៤ លានដុល្លារសហរដ្ឋអាមេរិក) គឺបានកើនឡើង ៧% ធៀបនឹងឆ្នាំមុន។ ប្រាក់ចំណេញសម្រាប់ឆ្នាំ ២០២២ គឺ ២.៤៨៦ ពាន់លានរៀល (៦១០ លានដុល្លារ) គឺបានធ្លាក់ចុះ ៥៥% ដោយសារតែដំណើរធ្លាក់ចុះ នៃសេដ្ឋកិច្ច វិបត្តិគីមីឥន្ធនៈ និងចំណាយលើថាមពលកើនឡើង។ ទន្ទឹមនឹងនេះ សម្រាប់ត្រីមាសទី ៤ នៃឆ្នាំ ២០២២ ប្រាក់ចំណេញ មានចំនួន ១៨ ពាន់លានរៀល (៤ លានដុល្លារ)។ ទាំងអស់នេះ ក៏ដោយសារតែវិបត្តិជាច្រើនដែលកើតចេញពីសង្គ្រាមរុស្ស៊ី និងអ៊ុយក្រែន ការកើនឡើងយ៉ាងគំហុកនូវតម្លៃធ្យូងថ្ម និងអគ្គិសនី បញ្ហាអតិផរណា ដំណើរប្រែប្រួលខ្លាំង នៃតម្លៃប្រាក់បាតថៃ ការធ្លាក់ចុះ នៃសេដ្ឋកិច្ចប្រទេសចិន និងបញ្ហាវិបត្តិគីមីឥន្ធនៈធំបំផុតក្នុងរយៈកាល ២០ ឆ្នាំមកនេះ”។

លោក ធម្មស័ក សេដ្ឋាឧត្ដម (Thammasak Sethaudom) អនុប្រធានប្រតិបត្តិ នៃក្រុមហ៊ុន អេសស៊ីជី មានប្រសាសន៍ថា “ ដោយសារតែវិបត្តិដែលកើតឡើងចេញពីការកើនឡើងយ៉ាងគំហុក នៃតម្លៃធ្យូងថ្ម និងអគ្គិសនី ធ្វើឲ្យ អេសស៊ីជី ត្រូវចូលទៅប្រើប្រាស់វិស័យថាមពលកកើតឡើងវិញ ដោយមានសមត្ថភាពផលិតបាន ២៣៤ មេហ្គាវ៉ាត់ ក្នុងឆ្នាំ ២០២២ គឺកើនឡើង ៧៨% បើធៀបនឹងមួយឆ្នាំកន្លងទៅ ដោយមានបណ្ដាញផ្គត់ផ្គង់វៃឆ្លាត សម្រាប់អគារឧស្សាហកម្ម និងបណ្ដាញរោងចក្រឧស្សាហកម្ម សណ្ឋាគារ និងមន្ទីរពេទ្យ។ គម្រោងនេះ ត្រូវបានដំឡើងកាលពីពេលថ្មីៗ នៅក្រុមហ៊ុន Saha-Union Group នៅសង្កាត់ បាងផាកង ដោយបានភ្ជាប់ថាមពលកកើតឡើងវិញសម្រាប់ ១០ ក្រុមហ៊ុន កាត់បន្ថយការចំណាយលើថាមពលបាន ៣០% និងកាត់បន្ថយការបំភាយឧស្ម័នផ្ទះកញ្ចក់កាបូនិចបាន ៣.៦៧០ តោន ក្នុងមួយឆ្នាំៗ។ អាជីវកម្មនេះប្រើប្រាស់ជំនាញថាមពលកកើតឡើងវិញរបស់ អេសស៊ីជី ដើម្បីកាត់បន្ថយហេតុប៉ះពាល់ពីការកើនឡើងនូវថ្លៃថាមពល ដែលបង្កឡើងដោយដំណើរឡើងចុះ នៃតម្លៃថាមពលលើទីផ្សារពិភពលោក។ ក្នុងឆ្នាំ ២០២២ អេសស៊ីជី បានបង្កើនការប្រើប្រាស់ឥន្ធនៈជំនួសពី ២៦% ដល់ ៣៤% បើធៀបនឹងមួយឆ្នាំមុន ហើយបង្កើនសមត្ថភាពផលិតថាមពលព្រះអាទិត្យពី ១៣០ មេហ្គាវ៉ាត់ ទៅដល់ ១៩៤ ម៉ែហ្គាវ៉ាត់ បើធៀបនឹងមួយឆ្នាំមុន”។

លោក តាន់ណាវង្ស អារីរ៉ាត់ឆាគុល ជានាយកប្រតិបត្តិ និងជាប្រធានក្រុមហ៊ុន SCG Chemicals ឬ SCGC មានប្រសាសន៍ថា “SCGC បន្តអភិវឌ្ឍន៍ប៉ូលីមែរបៃតងដែលមានភាពនវានុវត្តន៍របស់ខ្លួន ឈ្មោះថា ‘SCGC GREEN POLYMERTM’ ដែលបានទទួលការគាំទ្រច្រើនពីទីផ្សារសកលលោក ដោយក្នុងនោះ លក់បានរហូតដល់ទៅ ១៤០.០០០ តោន ដែលបានកើនឡើង ៥ ដង ធៀបនឹងមួយឆ្នាំមុន។ បន្ថែមលើនេះ ក្រុមហ៊ុន បានពង្រីកវិសាលភាពទៅជាអាជីវកម្មកែច្នៃផ្លាស្ទិកពេញលេញ តាមរយៈការទិញយកនូវក្រុមហ៊ុន Kras/Recycling Holding Volendam B.V. ដែលជាក្រុមហ៊ុនគ្រប់គ្រងកាកសំណល់ឈានមុខគេរបស់ប្រទេសហូឡង់។ ការទិញយកក្រុមហ៊ុននេះ នឹងជួយពង្រីកសមត្ថភាពរបស់ក្រុមហ៊ុននៅក្នុងការស្តុក ការញែក និងការផលិតជ័រ PCR (Post-Consumer Recycled Resin) សម្រាប់ការប្រើប្រាស់ក្នុងក្រុមគ្រួសារ និងឧស្សាហកម្ម។ ‘SCGC GREEN POLYMERTM’ ត្រូវបានផ្ដល់វិញ្ញាបនកម្មស្តង់ដារអន្តរជាតិ ពីបណ្ដាស្ថាប័នឈានមុខគេមួយចំនួននៅលើពិភពលោក ដូចជា EuCertPlast មកពីអឺរ៉ុប ដែលបានបញ្ជាក់ថា ប្រភពវត្ថុធាតុដើមសម្រាប់ផលិតកម្មជ័រ PCR គឺបានមកពីកាកសំណល់ប្លាស្ទិក ដូច្នេះ ជួយកាត់បន្ថយបញ្ហាកាកសំណល់ប្លាស្ទិកនេះ។

ក្រុមហ៊ុនក៏ទទួលបានវិញ្ញាបនបត្រមកពី Recyclass សម្រាប់ការអភិវឌ្ឍជ័រស្រោបដែលជួយបង្កើនស័ក្តិសិទ្ធភាព នៃការកែច្នៃឡើងវិញ សម្រាប់ការវេចខ្ចប់ប្លាស្ទិក ដែលធ្វើឲ្យក្រុមហ៊ុន SCGC ជាក្រុមហ៊ុនដំបូងគេនៅអាស៊ាន ដែលទទួលបានវិញ្ញាបនបត្រនេះ។ ព្រមជាមួយគ្នានេះ ការបង្កើតក្រុមហ៊ុន Long Son Petrochemicals Company Limited (LSP) ដែលជារោងចក្រគីមីឥន្ធនៈនៅក្នុងប្រទេសវៀតណាម មានវឌ្ឍនភាពបានជាង ៩៨% ហើយ ហើយគ្រោងនឹងឈានចូលទីផ្សារនៅពាក់កណ្ដាលឆ្នាំនេះ”។

លោក និធិ ផាតថារ៉ាឆូក ប្រធានអាជីវកម្មស៊ីម៉ងត៍ និងសម្ភារៈសំណង់របស់ អេសស៊ីជី មានប្រសាសន៍ថា “អេសស៊ីជី កំពុងជំរុញអាជីវកម្មជីវិតរស់នៅវៃឆ្លាត ជាពិសេស គឺដំណោះស្រាយសន្សំសំចៃថាមពល ដែលកំពុងមានតម្រូវការខ្ពស់នៅលើទីផ្សារ ដោយសារតែការកើនឡើងនូវថ្លៃថាមពលអគ្គិសនី។ ក្នុងឆ្នាំ ២០២២ អាជីវកម្មនេះមានការកើនឡើងជាង ៤០%។ ជាក់ស្ដែង មានដូចជា ប្រព័ន្ធ ‘SCG Air Scrubber’ ដែលជាប្រព័ន្ធសន្សំសំចៃថាមពលសកលសម្រាប់អគារធំៗ សាលសន្និសីទ និងផ្សារទំនើបជាដើម។ ប្រព័ន្ធមានភាពស័ក្តិសិទ្ធខ្ពស់ដែលមានសមត្ថភាពសន្សំសំចៃថាមពលបានរហូតដល់ទៅ ២០-៣០% ។ ប្រព័ន្ធនេះ ត្រូវបានដំឡើងនៅតាមបណ្ដាអគារធំៗចំនួនប្រាំពីរកន្លែង រាប់បញ្ចូលទាំងសាខាអគារ Terminal 21 Pattaya និង Kloud by Kbank Siam Square ផងដែរ”។

លោក វីចាន់ ជិតភូកឌី (Wichan Jitpukdee) នាយកប្រតិបត្តិ SCG Packaging Public Company Limited ឬ SCGP មានប្រសាសន៍ថា “ក្រុមហ៊ុន SCGP បានរៀបចំយុទ្ធសាស្ត្រអភិវឌ្ឍន៍នវានុវត្តន៍បន្ថែមដំណោះស្រាយលើការវេចខ្ចប់ និងបានលើកថវិកាវិនិយោគ និងការចំណាយលើការស្រាវជ្រាវ និងការអភិវឌ្ឍដែលមានទំហំទឹកប្រាក់សរុប ៨០០ លានបាត សម្រាប់ឆ្នាំ ២០២៣ ដោយអភិវឌ្ឍន៍នូវ ‘Nanocellulose Fibres’ ចេញពីកាកសំណល់កសិកម្ម ដែលប្រើជាវត្ថុធាតុដើមនៅក្នុងការផលិតក្រដាសវេចខ្ចប់ និងការវេចខ្ចប់ចំណីអាហារ។ ក្រុមហ៊ុនក៏បានត្រៀមលក្ខណៈពង្រីកការងាររបស់ខ្លួនឲ្យបានដល់ឧស្សាហកម្មសុខាភិបាល និងឧស្សាហកម្មសមាសធាតុ ក៏ដូចជាអភិវឌ្ឍន៍ជំនាញបណ្ដុះកោសិការបស់ខ្លួន លើការដាំកសិផល និងដំណាំដែលមានតម្លៃខ្ពស់។ បន្ថែមលើនេះ ខ្លួនក៏មានបំណងធ្វើបរិវត្តកម្មសារធាតុសំណល់ពីដំណើរការផលិតកម្មឲ្យក្លាយជាថាមពលកកើតឡើងវិញថែមទៀតផង។”។

លោក រ៉ុងរ៉ូត រង្ស៊ីយ៉ូផាស (Roongroote Rangsiyopash) ជាប្រធាន និងជាអគ្គនាយកប្រតិបត្តិ នៃក្រុមហ៊ុន អេសស៊ីជី មានប្រសាសន៍ថា “លទ្ធផលប្រតិបត្តិការមុនសវនកម្មរបស់ក្រុមហ៊ុនសម្រាប់ឆ្នាំ ២០២២ គឺទទួលបានប្រាក់ចំណូលពីការលក់ជាទឹកប្រាក់ ៦៦.៤២៣ ពាន់លានរៀល (១៦.២៤៤ លានដុល្លារសហរដ្ឋអាមេរិក) គឺបានកើនឡើង ៧% ធៀបនឹងមួយឆ្នាំមុន ដោយសារតែអាជីវកម្មវេចខ្ចប់ និងស៊ីម៉ងត៍ -សម្ភារៈសំណង់។ ប្រាក់ចំណេញសម្រាប់ឆ្នាំ ២០២២ គឺ ២.៤៨៦ ពាន់លានរៀល (៦១០ លានដុល្លារ) គឺបានធ្លាក់ចុះ ៥៥% បើធៀបនឹងមួយឆ្នាំមុនដោយសារតែការធ្លាក់ចុះ នៃការលក់សារធាតុគីមី ចំណាយលើថាមពលកើនឡើង និងការធ្លាក់ចុះនូវចំណែកប្រាក់ចំណូលមកពីក្រុមហ៊ុនបុត្រសម្ព័ន្ធ។

ប្រាក់ចំណូលពីការលក់ សរុបទទួលបាន ១៣.៨៧១ ពាន់លានរៀល (៣.៣៥៩ លានដុល្លារ) ក្នុងត្រីមាសទី ៤ ឆ្នាំ ២០២២ ដែលបានធ្លាក់ចុះ ១៤% បើធៀបនឹងត្រីមាសទីបួនមួយឆ្នាំមុន ដោយសារតែការធ្លាក់ចុះនូវតម្លៃ និងចំនួន នៃការលក់ផលិតផលគីមី ពីព្រោះតម្រូវការទីផ្សារថមថយ។

ប្រាក់ចំណេញក្នុងត្រីមាសទី ៤ ឆ្នាំ ២០២២ គឺទទួលបាន ១៨ ពាន់លានរៀល (៤ លានដុល្លារ) ដែលបានធ្លាក់ចុះ ៩៤% បើធៀបនឹងត្រីមាសដូចគ្នាកាលពីឆ្នាំមុន ដោយសារតែការចែកចាយផលិតផលគីមីធ្លាក់ចុះ ក៏ដូចជាការកើនឡើងនូវការចំណាយលើធ្យូងថ្ម និងថាមពលអគ្គិសនី។

ក្នុងឆ្នាំ ២០២២ អេសស៊ីជី នៅកម្ពុជា បានប្រគល់អាហារូបករណ៍ ដែលមានតម្លៃទឹកប្រាក់សរុប ១០០.០០០ ដុល្លារ ដល់សិស្សវិទ្យាល័យ និងនិស្សិតសាកលវិទ្យាល័យចំនួន ២៧០ រូប តាមរយៈកម្មវិធី “អេសស៊ីជី ចែករំលែកក្ដីសុបិន”។ សរុបរយៈពេល ៩ ឆ្នាំ ចំនួនសិស្ស និងនិស្សិតអាហារូបករណ៍ពីកម្មវិធីទំនួលខុសត្រូវសង្គមផ្នែកអប់រំមួយនេះ បានកើនឡើងដល់ជាង ១.៥០០ នាក់។ ទន្ទឹមនឹងនេះ អេសស៊ីជី កម្ពុជា បានសហការជាមួយនឹងក្រសួងការងារ និងបណ្ដុះបណ្ដាលវិជ្ជាជីវៈ គាំទ្រជាសម្ភារៈសំណង់គិតជាទឹកប្រាក់ ៥.០០០ ដុល្លារ សម្រាប់ផ្គត់ផ្គង់ដល់កម្មវិធីប្រកួតជំនាញថ្នាក់ជាតិលើកទី ៨ ផងដែរ៕