ជប៉ុនផ្តល់ហិរញ្ញប្បទានឥតសំណង ៣០,៦លានដុល្លារ ដើម្បីពង្រីកប្រព័ន្ធផ្គត់ផ្គង់ទឹកស្អាតនៅស្វាយរៀង

ស្អែកនេះ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងលោក តាកេ ហ្សុឺនសឹកិ (TAKEI Shunsuke) រដ្ឋលេខាធិការ នៃក្រសួងការបរទេសជប៉ុន នឹងចុះហត្ថាលេខាលើលិខិតប្តូរសារ ស្តីពីការហិរញ្ញប្បទាន ឥតសំណង ដើម្បីពង្រីកប្រព័ន្ធផ្គត់ផ្គង់ទឹកស្អាតនៅខេត្តស្វាយរៀង នាទីស្តីការក្រសួង។
នេះបើតាមសេចក្តីប្រកាសព័ត៌មានរបស់ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២២ ខែកុម្ភៈ ឆ្នាំ២០២៣។

ជប៉ុន នឹងផ្តល់ហិរញ្ញប្បទានឥតសំណង ដែលមានទំហំទឹកប្រាក់ចំនួន ៣.៩៨៦ លានយ៉េន (ប្រមាណ ៣០,៦លាន ដុល្លារ​អាមេរិក) ដើម្បីអនុវត្ត «គម្រោងពង្រីកប្រព័ន្ធផ្គត់ផ្គង់ទឹកស្អាតនៅខេត្តស្វាយរៀង» តាមការធ្វើវិសោធនកម្ម លើចំនួន​ទឹកប្រាក់​ដែលបានចែង ក្នុងលិខិតប្តូរសារដែលបានចុះហត្ថាលេខារួច នៅថ្ងៃទី០២ ខែមីនា ឆ្នាំ២០២២ កន្លងមក។

ទាំងអស់នេះ គឺជាកាចូលរួមចំណែកយ៉ាងសំខាន់ដល់កិច្ចខិតខំប្រឹងប្រែងអភិវឌ្ឍន៍សេដ្ឋកិច្ច-សង្គម ជាបន្តបន្ទាប់របស់ រាជរដ្ឋាភិបាលកម្ពុជា និងជួយពង្រឹងចំណងមិត្តភាពរវាងកម្ពុជា-ជប៉ុន កាន់តែល្អប្រសើរឡើងថែមទៀត និងក្នុងកិច្ចសហប្រតិបត្តិការ​ដែលកំពុងលូតលាស់លើគ្រប់វិស័យ៕