កម្ពុជាអាចនឹងមានភ្លៀងធ្លាក់ និងខ្យល់កន្ត្រាក់ពេញមួយសប្តាហ៍

នៅព្រឹកថ្ងៃទី ០៩ ខែឧសភា ឆ្នាំ ២០២៣នេះ ក្រសួងធនធានទឹក និងឧតុនិយម បានចេញសេចក្តីជូនដំណឹង ស្តីពី ស្ថានភាពអាកាសធាតុ ដោយក្នុងអំឡុងមួយសប្តាហ៍ខាងមុខនេះ ព្រះរាជាណាចក្រកម្ពុជានឹងទទួលនូវឥទ្ធិពលជ្រលងសម្ពាធទាបពីភាគខាងជើងប្រទេស និងខ្យល់មូសុងនិរតី ក្នុងកម្រិតខ្សោយ ដោយតាមតំបន់មួយចំនួននឹងមានភ្លៀងធ្លាក់ចាប់ពីថ្ងៃទី១០​ ដល់ថ្ងៃទី១៦ ខែឧសភា ឆ្នាំ២០២៣។

យោងតាមស្ថានភាពអាកាសធាតុខាងលើ ធ្វើឲ្យតំបន់ទំនាបកណ្តាលមានសីតុណ្ហភាពអប្បបរមាពី ២៥-២៧°C និងសីតុណ្ហភាពអតិបរមាមានពី ៣៤-៣៦°C។ អាចមានភ្លៀងធ្លាក់រាយប៉ាយក្នុងកម្រិតពិតិចទៅបង្គួរ និងអាចច្រើនដោយផ្នែកខ្លះលាយឡំដោយផ្គរ រន្ទះ និងខ្យល់កន្ត្រាក់

តំបន់ខ្ពង់រាបមានសីតុណ្ហភាពអប្បបរមាពី ២៤-២៦°C និងសីតុណ្ហភាពអតិបរមា មានពី ៣៤-៣៦°C អាចមានភ្លៀងធ្លាក់ក្នុងកម្រិតពិតិចទៅបង្គួរ និងអាចច្រើនដោយផ្នែកខ្លះលាយឡំដោយផ្គរ រន្ទះ និងខ្យល់កន្ត្រាក់។ តំបន់មាត់សមុទ្រមានសីតុណ្ហភាពអប្បបរមាពី ២៤-២៦°C និងសីតុណ្ហភាពអតិបរមា មានពី ៣៣-៣៥°C។ អាចមានភ្លៀងធ្លាក់ក្នុងកម្រិតពិតិចទៅមធ្យម លាយឡំដោយផ្គរ រន្ទះ និងខ្យល់កន្ត្រាក់។

ដោយយោងតាមស្ថានភាពខាងលើ ក្រសួងធនធានទឹក និងឧតុនិយម បានអំពាវនាវដល់ប្រជាពលរដ្ឋបង្កើនការប្រុងប្រយ័ត្នចំពោះបាតុភូតធម្មជាតិ ដែលអាចកើតមានឡើងជាយថាហេតុ៕