ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បានឈរឈ្មោះជាបេក្ខជនតំណាងរាស្ត្រពេញសិទ្ធិមណ្ឌលខេត្តកំពង់ចាម។ នេះបើតាមបញ្ជីបេក្ខជនឈរឈ្មោះផ្លូវការរបស់គណបក្សសំបុកឃ្មុំសង្គមប្រជាធិបតេយ្យ ដែលទទួលស្គាល់ដោយគណៈកម្មាធិការជាតិរៀបចំការបោះឆ្នោត។

កាលពីថ្ងៃទី៨ ខែឧសភា ឆ្នាំ២០២៣ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសទទួលស្គាល់ជាផ្លូវការលើពាក្យសុំចុះបញ្ជីរបស់គណបក្សសំបុកឃ្មុំសង្គមប្រជាធិបតេយ្យ និងបញ្ជីបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រ នៅ៦មណ្ឌលរាជធានី-ខេត្តប៉ុណ្ណោះ ក្នុងចំណោមណ្ឌលបោះឆ្នោតចំនួន២៥ ទូទាំងប្រទេសកម្ពុជា។

បើតាមសេចក្ដីប្រកាសរបស់ គ.ជ.ប គឺរយៈពេល១៥ថ្ងៃ មានគណបក្សនយោបាយចំនួន២០ បានដាក់ពាក្យសុំចុះបញ្ជីគណបក្សឈរឈ្មោះ និងបញ្ជីបេក្ខជនឈរឈ្មោះក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ខាងមុខ។ ក្នុងនោះ គណបក្សចំនួន១១ ត្រូវបាន គ.ជ.ប សម្រេចទទួលស្គាល់ជាផ្លូវការ ខណៈគណបក្សចំនួន៩ផ្សេងទៀត កំពុងស្ថិតក្នុងការពិនិត្យ។

គណបក្សសំបុកឃ្មុំសង្គមប្រជាធិបតេយ្យ ជាគណបក្សនយោបាយមួយនៅកម្ពុជាដែលត្រូវបានបង្កើតឡើងក្នុងឆ្នាំ២០១៥ ក្រោមការដឹកនាំដោយលោក ម៉ម សូណង់ដូ។ កាលពីឆ្នាំ២០១៨ គណបក្ស​នេះ​ ក៏បានចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី៦ ម្ដងរួចមកហើយ ប៉ុន្តែជាលទ្ធផលមិនទទួលបានអាសនៈនៅក្នុងរដ្ឋសភាឡើយ។

នៅក្នុងឆ្នាំ២០២០ គណបក្ស​សំបុកឃ្មុំ​សង្គមប្រជាធិបតេយ្យ​ ក៏បានសម្រេចចង​ស​ម្ព័ន្ធ​ភាព​ជាមួយ​គណបក្ស​ខ្មែរ​រួបរួម​ជាតិ​ ​និង​គណបក្ស​ខ្មែរ​តែមួយ​ ដែលមានឈ្មោះ​ថា​​«​ស​ម្ព័ន្ធ​ភាព​អ្នក​ប្រជាធិបតេយ្យ​ខ្មែរ​»។ មិនយូរប៉ុន្មាន សម្ព័ន្ធភាពនេះ ក៏ត្រូវបានបែកបាក់ទៅវិញ បន្ទាប់ពីគណបក្សខ្មែររួបរួមជាតិរបស់លោក ញឹក ប៊ុនឆៃ បានប្រកាសរួមគ្នាជាមួយគណបក្សកម្ពុជានិយមរបស់លោក យ៉ែម បុញ្ញារិទ្ធ។ តែយ៉ាងណា បច្ចប្បន្ននេះ លោក ម៉ម សូណង់ដូ ក្នុងនាមជាប្រធានគណបក្ស​សំបុកឃ្មុំ​សង្គមប្រជាធិបតេយ្យ កំពុងមានមុខតំណែងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ឋានៈស្មើទេសរដ្ឋមន្ត្រី៕

ដោយ៖ ធឿន វ៉ាន់សុង