សម្ដេច ហ៊ុន ម៉ាណែត ៖ ពលរដ្ឋជឿទុកចិត្តថា មានតែការបោះឆ្នោតទេជាមធ្យោបាយដែលល្អ ក្នុងការជ្រើសរើសមេដឹកនាំ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ប្រជាពលរដ្ឋដ៏ច្រើនលើសលប់ បានទៅបោះឆ្នោតជ្រើសតាំង តំណាងរាស្រ្ដ នីតិកាលទី ៧ កាលពីថ្ងៃទី ២៧ ខែកក្កដា ឆ្នាំ ២០២៣កន្លងទៅនេះ បង្ហាញឲ្យឃើញថា ពួកគាត់ជឿជាក់ថា មានតែការបោះឆ្នោតទេជាមធ្យោបាយដែលល្អ ក្នុងការជ្រើសរើសមេដឹកនាំប្រទេស មិន មែនតាមរយៈការធ្វើបាតុកម្ម បង្កចលាចលក្នុងសង្គមនោះទេ។

ការលើកឡើងនេះ បានធ្វើឡើងក្នុងពិធីសំណេះសំណាល ជាមួយកម្មករ-និយោជិតចំនួន ១២.០៦០នាក់ នៅតាមបណ្តា រោងចក្រ សហគ្រាស ដែលមានមូលដ្ឋានស្ថិតនៅក្នុងស្រុកព្រៃឈរ និងស្រុកកំពង់សៀម ខេត្តកំពង់ចាម នាព្រឹកថ្ងៃទី ២៥ ខែតុលា ឆ្នាំ ២០២៣។

សម្ដេចនាយករដ្ឋមន្ត្រី មានប្រសាសន៍បែបនេះថា «នៅទូទាំងប្រទេសជាង ៨លាន ២សែននាក់ ៨៤.៥៩ភាគរយ បានអញ្ជើញទៅបោះឆ្នោតបំពេញកាតព្វកិច្ច ជឿទុកចិត្តទៅលើការបោះឆ្នោតថា មានតែការបោះឆ្នោតតាមរដ្ឋធម្មនុញ្ញទេ ដែលជាមធ្យោបាយដែលមានសុវត្ថិភាព ស្ថេរភាព ដើម្បីរើសមេដឹកនាំ មិនមែនតាមការអំពាវនាវដុតប្រទេស បាតុកម្ម ធ្វើរដ្ឋប្រហារ នោះទេ»៕