គ.ជ.ប នឹងរៀបចំសន្និបាតបូកសរុបលទ្ធផលការងារបោះឆ្នោត​​ តំណាងរាស្រ្ដ នៅពាក់កណ្ដាលខែសីហានេះ

នៅពាក់កណ្ដាលខែសីហា ឆ្នាំ ២០២៣នេះ គណៈកម្មាធិការជាតិរៀបចំការបោះឆ្នោត (គ.ជ.ប)​ នឹងរៀបចំសន្និបាតបូកសរុបលទ្ធផលការងារ​ សម្រាប់ការបោះឆ្នោតជ្រើសតាំង តំណាងរាស្រ្ដ នីតិកាលទី ៧។ តំណាងគណបក្សនយោបាយ, តំណាងអង្គការសង្គមស៊ីវិល និងអាជ្ញាធរដែនដី ជាដើម នឹងត្រូវអញ្ជើញឲ្យចូលរួមក្នុងសន្និបាតនេះ។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប បានឲ្យដឹងថា គណៈកម្មាធិការជាតិរៀបចំការបោះឆ្នោត (គ.ជ.ប)​ នឹងរៀបចំសន្និបាតបូកសរុបលទ្ធផលការងារ​ សម្រាប់ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅថ្ងៃទី ១៤ ដល់ថ្ងៃទី ១៥ ខែសីហា​ ឆ្នាំ ២០២៣ នៅឯខេត្តបាត់ដំបង។

ប្រធានបទដែលត្រូវយកទៅពិភាក្សាមានចំនួន ៥ រួមមាន៖ ១. ការពិនិត្យបញ្ជីឈ្មោះ និងការចុះឈ្មោះបោះឆ្នោត, ២. ការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោត, ៣. ការឃោ​សនាបោះឆ្នោត, ៤.​ ការបោះឆ្នោត ការរាប់សន្លឹកឆ្នោត និងការប្រកាសលទ្ធផលនៃការបោះឆ្នោត និង ៥. ការបណ្ដុះបណ្ដាល និងអប់រំអ្នកបោះឆ្នោត។

លោក សោម សូរីដា បានបញ្ជាក់ថា «ប្រធានទាំង ៥នេះ គឺជាប្រធានបទដែលដាក់ឲ្យពិភាក្សាគ្នា នៅក្នុងសន្និបាតបូកសរុបលទ្ធផល នៃការបោះឆ្នោតជ្រើសតាំង តំណាងរាស្រ្ដ»។

សម្រាប់ភាគីដែលចូលរួមក្នុងសន្និបាត នៅថ្ងៃទី​ ១៤ ដល់ថ្ងៃទី ១៥​ ខែសីហា ឆ្នាំ ២០២៣នោះ រួមមាន៖ មន្ត្រី គ.ជ.ប គ្រប់លំដាប់ថ្នាក់, តំណាងគណបក្សនយោបាយ, តំណាងអង្គការសង្គមស៊ីវិល និងអាជ្ញាធរដែនដី ដែលទទួលបន្ទុកលើផ្នែកសន្តិសុខ សម្រាប់ការបោះឆ្នោត។

ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ កាលពីថ្ងៃទី ២៣ ខែកក្កដា ឆ្នាំ ២០២៣កន្លងទៅនេះ ត្រូវបានលោក ប្រាជ្ញ ចន្ទ ប្រធាន គ.ជ.ប បានវាយតម្លៃថា បានប្រព្រឹត្តទៅដោយជោគជ័យ និងក្នុងបរិយាកាសស្ងប់ស្ងាត់ មានសន្តិសុខ សុវត្ថិភាព និងសណ្តាប់ធ្នាប់ សាធារណៈ គ្មានអំពើហិង្សា គ្មានការគំរាមកំហែង ដោយមានកិច្ចសហការល្អពីសំណាក់យន្តការ និងរចនាសម្ព័ន្ធសន្តិសុខបោះឆ្នោតគ្រប់លំដាប់ថ្នាក់ ជាមួយ គ.ជ.ប និងគណៈកម្មការរៀបចំការបោះឆ្នោតគ្រប់លំដាប់ថ្នាក់៕