សម្ដេចតេជោ ហ៊ុន​ សែន ប្រកាសប្លុកតេលេក្រាមចំពោះបុគ្គលណា នាំរឿងមកឲ្យសម្ដេចរាល់ថ្ងៃ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសប្លុកតេលេក្រាមរបស់បុគ្គលណា ដែលភ្ជាប់ជាមួយសម្ដេច ហើយនាំរករឿងមកឲ្យសម្ដេចរាល់ថ្ងៃ។

ការប្រកាសរបស់សម្ដេចតេជោ ហ៊ុន សែន ខាងលើនេះ បានធ្វើឡើងក្នុងពិធីសម្ពោធទីតាំងថ្មី នៃសាកលវិទ្យាល័យភូមិន្ទវិចិត្រសិល្បៈ ដែលស្ថិតក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ និង ពិធីប្រគល់សញ្ញាបត្រជូនដល់និស្សិត នៃសាកលវិទ្យាល័យភូមិន្ទវិចិត្រសិល្បៈ នៅព្រឹកថ្ងៃទី ២៤ ខែឧសភា ឆ្នាំ ២០២៣។

សម្ដេចតេជោ ហ៊ុន សែន ថ្លែងបែបនេះថា «អ្នកខ្លះអ៊ែតចូលក្នុងតេលេក្រាមរបស់ខ្ញុំ ហើយនាំរឿងមក ខ្ញុំសុំលុបចោលហើយ ម្សិលមិញលុបចោលមួយ បើសិនជាអ៊ែតចូលមកជាមួយខ្ញុំ ខ្ញុំមិនអនុញ្ញាតឲ្យអ៊ែតទេ ក៏ប៉ុន្តែអ្នកខ្លះដែលបានអ៊ែតហើយ កុំនាំរឿងមកឲ្យខ្ញុំ ខ្ញុំមានការច្រើនណាស់»។

សម្ដេចតេជោ ហ៊ុន សែន ថ្លែងទៀតថា សម្ដេច នឹងប្លុកចោលអ្នកភ្លាប់តេលេក្រាមជាមួយសម្ដេច ដែលនាំរឿងមកឲ្យសម្ដេច។ «អញ្ចឹងសុំប្រកាស សុំទោសទុកជាមុន ខ្ញុំនឹងលុបចោល គេហៅថា ប្លុក​វាចោល ចំពោះអ្នកណាក៏ដោយ ដែលភ្ជាប់ចូលមកជាមួយយើង ហើយនាំរឿងមកឲ្យយើង»។ នេះជាការប្រកាសរបស់សម្ដេចតេជោ ហ៊ុន សែន។

សម្ដេចតេជោ ហ៊ុន សែន លើកឡើងដែរថា សម្ដេចយល់ចំពោះបុគ្គលមួយចំនួនដែលចង់រកយុត្តិធម៌ តែបើពលរដ្ឋមួយប្រទេស ផ្ដល់រឿងឲ្យនាយករដ្ឋមន្ត្រីដោះស្រាយទាំងអស់ ថាតើដោះស្រាយរបៀបម៉េច? សម្ដេចតេជោ ហ៊ុន សែន បានបញ្ជាក់ទៀតថា សម្ដេច នឹងបន្តប្លុកអ្នកណាដែលនាំរឿងមកឲ្យសម្ដេចបន្តទៀត៕