ក្រុមប្រឹក្សារាជធានី បោះឆ្នោត រកបាន ប្រធាន-អនុប្រធាន ការិយាល័យប្រជាពលរដ្ឋ

អនុវត្តតាមសេចក្ដីណែនាំលេខ ០២៤ សណន របស់ក្រសួងមហាផ្ទៃ ស្តីពី នីតិវិធីនៃការបោះឆ្នោត ជ្រើសរើស ប្រធាន អនុប្រធាន ការិយាល័យប្រជាពលរដ្ឋរាជធានី ខេត្ត ក្រុមប្រឹក្សារាជធានីភ្នំពេញ នៅព្រឹកថ្ងៃទី៩ ខែមិថុនា ឆ្នាំ២០២៣នេះ បានធ្វើពិធីបោះឆ្នោត ជ្រើសរើសប្រធាន-អនុប្រធានការិយាល័យប្រជាពលរដ្ឋរាជធានីភ្នំពេញ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និង លោក កើត ឆែ អភិបាលរងរាជធានី តំណាង លោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ។

បេក្ខជនឈរឈ្មោះជាប្រធាន មានចំនួន ៣រូប ក្នុងនោះមាន៖ លោក សំ សេដ្ឋា លោក ឡុង រស្មី និង លោក ហ៊ី សុខនី។ ចំណែកបេក្ខជនឈរឈ្មោះជាអនុប្រធាន មានចំនួន ៣រូប រួមមាន៖ លោកស្រី ឈុន ដាលីន លោក ហេង ម៉េងលី និង លោក ថេង បញ្ញាវុធ។

ក្រោយការបោះឆ្នោត លោក សំ សេដ្ឋា បានជាប់ឆ្នោតជា ប្រធានការិយាល័យប្រជាពលរដ្ឋរាជធានីភ្នំពេញ និង លោកស្រី ឈុន ដាលីន ជា អនុប្រធានការិយាល័យប្រជាពលរដ្ឋរាជធានីភ្នំពេញ។

លោក ម៉ប់ សារិន បានណែនាំឱ្យក្រុមលេខាធិការដ្ឋានក្រុមប្រឹក្សារាជធានីភ្នំពេញ ធ្វើលិខិតស្នើសុំទៅក្រសួងមហាផ្ទៃ ដើម្បីឱ្យមានការប្រកាសជាផ្លូវការទៅតាមនីតិវិធីនៃច្បាប់។

យោងតាមសេចក្ដីណែនាំ លេខ ០២៤ សណន របស់ក្រសួងមហាផ្ទៃ ស្តីពី នីតិវិធីនៃការបោះឆ្នោត ជ្រើសរើស ប្រធាន អនុប្រធាន ការិយាល័យប្រជាពលរដ្ឋរាជធានី ខេត្ត បានកំណត់ថា ការបោះឆ្នោត ត្រូវធ្វើឡើងដាច់ដោយឡែកពីការ បោះឆ្នោតជ្រើសរើសអនុប្រធានការិយាល័យប្រជាពលរដ្ឋរាជធានី ប៉ុន្តែអាចធ្វើឡើងក្នុងកិច្ចប្រជុំជាមួយគ្នាបាន ឬក៏កិច្ចប្រជុំដាច់ដោយឡែកពីគ្នា។ ការបោះឆ្នោតត្រូវធ្វើឡើងជាសម្ងាត់៕

អត្ថបទ៖ ស្រីរ័ត្ន