ត្រឹមជិត ២ទសវត្សរ៍ អាជ្ញាធរជាតិអប្សរា ដាំឈើប្រណីតបានជាង ២លានដើម

អាជ្ញាធរជាតិអប្សរា បាន និងកំពុងខិតខំដាំដើមឈើរាប់សិបម៉ឺនដើមក្នុង១ឆ្នាំៗ នៅក្នុងតំបន់អង្គរ ជាក់ស្ដែងគិតពីឆ្នាំ២០០៤ មកដល់បច្ចុប្បន្ន បានដាំឈើជាង ២លានដើម។ ក្នុងនោះមានដូចជា ក្រញូង បេង នាងនួន ធ្នង់ ព្រមទាំងដើមឈើប្រណីតៗ និងដើមឈើប្រើប្រាស់ប្រចាំថ្ងៃផ្សេងៗទៀតផងដែរ។

លោក ឡុង កុសល អគ្គនាយរងអាជ្ញាធរជាតិអប្សរា មានប្រសាសន៍បន្តប្រាប់ “កម្ពុជាថ្មី” នៅថ្ងៃទី២៣ ខែសីហា ឆ្នាំ២០២៣ នេះថា អាជ្ញាធរជាតិអប្សរា បានសហការជាមួយក្រុមហ៊ុនធំៗដែលរកទីតាំងដើម្បីដាំកូនឈើ។ ជាមួយគ្នានេះក៏មានទាំងស្ថាប័នការងាររដ្ឋ និងវិស័យឯកជន ព្រះសង្ឃ គ្រូ សិស្ស និស្សិត និងប្រជាពលរដ្ឋ បានចូលរួមដាំឈើក្នុងរមណីយដ្ឋានអង្គរ យ៉ាងកុះករកន្លងមក។

លោក ឡុង កុសល បញ្ជាក់ថា៖ “ដើមឈើដែលយើងដាំនៅក្នុងបរិវេណរមណីយដ្ឋានអង្គរ ដូចជានៅ មុខប្រាសាទអង្គរវត្ត មុខប្រាសាទភ្នំបាក់ខែង តំបន់អង្គរធំ នៅតាមដងផ្លូវ នៅតាមប្រព័ន្ធប្រឡាយបុរាណ នៅតាមខ្នងបារាយណ៍ នៅតាមទីតាំងមួយចំនួនផ្សេងទៀត តាមស្ថានីយ៍ដែលយើងរៀបចំតាមទីតាំងផ្សេងៗទៀត”។

ចំពោះកន្លែង ឬទីតាំងណាដែលត្រូវដាំឈើទៀតនោះ លោក ឡុង កុសល មានប្រសាសន៍ថា អាជ្ញាធរជាតិអប្សរា នៅតែបន្តដាំរហូត នៅក្នុងបរិវេណរមណីយដ្ឋានអង្គរ។ ជាមួយគ្នានេះ អាជ្ញាធរជាតិអប្សរា ក៏មានស្ថានីយ៍បណ្ដុះកូនឈើផ្ទាល់ខ្លួន ដើម្បីបណ្ដុះកូនឈើដាំខ្លួនឯងផង និងចែកចាយជូនសារធារណជន ក៏ដូចជាស្ថាប័នរដ្ឋ ឬក៏ឯកជនដែលមានតម្រូវការចង់បាន ដែលជូនដោយមិនគិតប្រាក់។

គួរបញ្ជាក់ថា រមណីយដ្ឋានអង្គរ មានទំហំ ៤០១គីឡូម៉ែត្រការ៉េ ស្ថិតនៅភាគពាយព្យ នៃខេត្តសៀមរាប បានចុះក្នុងបញ្ជីបេតិកភណ្ឌពិភពលោករបស់ អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ) ក្នុងឆ្នាំ១៩៩២។ តំបន់នេះ គឺជាគោលដៅទេសចរណ៍ពេញនិយមបំផុតនៅអាស៊ីអាគ្នេយ៍៕

អត្ថបទ៖ ច័ន្ទ វីរៈ