បុរសទះកំផ្លៀងយុវតីម្នាក់នៅខណ្ឌសែនសុខ  ត្រូវបានចាប់ខ្លួនហើយ

បុរសដែលទះកំផ្លៀងនារីម្នាក់ពាក់ព័ន្ធនឹងបញ្ហាជិះម៉ូតូសាចទឹក ពេលធ្វើដំណើរតាមដងផ្លូវ កាលពីថ្ងៃទី២៥ ខែសីហា ត្រូវបានសមត្ថកិច្ចឃាត់ខ្លួ​នបានហើយនៅថ្ងៃនេះ និងកំពុងសាកសួរនៅអធិការដ្ឋានខណ្ឌសែនសុខ។ នេះបើតាមការឱ្យដឹងរបស់ លោក សាន សុខសីហា​ អ្នកនាំពាក្យស្នងការនគរបាលរាជធានីភ្នំពេញ។

លោក​ សាន​ សុខ សីហា បានឱ្យកម្ពុជាថ្មីដឹងថា៖ “ ករណីបុរសម្នាក់ប្រើអំពើហិង្សា ទះកំផ្លៀងស្រ្តីម្នាក់ នៅខណ្ឌសែនសុខ ត្រូវបានសមត្ថកិច្ចឃាត់ខ្លួនបាន ខណៈកំពុងសាកសួរនៅអធិការដ្ឋាននគរបាលខណ្ឌសែនសុខ”។

សូមរំលឹកថា​ បើតាមឃ្លីបវីដេអូមួយ ដែលបានចែកចាយលើបណ្ដាញសង្គមហ្វេសប៊ុក កាលពីថ្ងៃទី២៥ ខែសីហា មានមនុស្សប្រុស-ស្រី៣នាក់ បានឈ្លោះប្រកែកគ្នារឿងជិម៉ូតូសាចទឹក នៅពេលធ្វើដំណើរលើដងផ្លូវ។ ប៉ុន្តែ អ្វីគួរឱ្យចាប់អារម្មណ៍នោះ គឺគ្រាន់តែសាចទឹកដាក់គ្នាបន្តិចបន្តួច បែជាបុរសម្នាក់ហ៊ានលើកដៃទះមនុស្សស្រី ហើយបង្កឱ្យមានការប្រតាយប្រតប់គ្នា៕