លោកស្រី ឃួន សុដារី ណែនាំឱ្យឯកអគ្គរាជទូតថ្មីរបស់កម្ពុជា ត្រូវគិតប្រយោជន៍ជាតិជាធំ

លោកស្រី ឃួន សុដារី ប្រធានរដ្ឋសភា បានណែនាំដល់ឯកអគ្គរាជទូតនៃព្រះរាជាណាចក្រកម្ពុជា ទើបតែងតាំងថ្មី ចំនួន៧រូប ឱ្យគិតផលប្រយោជន៍ជាតិជាធំ ក្នុងពេលបំពេញបេសកម្មការទូតនៅក្រៅប្រទេស។  

ក្នុងឱកាសទទួលជួបជាមួយឯកអគ្គរាជទូតថ្មីចំនួន៧រូប នារសៀលថ្ងៃទី២៨ ខែសីហា ឆ្នាំ២០២៣ នៅវិមានរដ្ឋសភា លោកស្រី​ ឃួន សុដារី បានណែនាំឱ្យឯកអគ្គរាជទូតដែលទើបនឹងតែងតាំងថ្មី ត្រូវគិតផលប្រយោជន៍ជាតិជាធំ និងធ្វើជាតំណាងរបស់ជាតិយ៉ាងក្លៀវក្លា ជាមួយនឹងការប្រកាន់ខ្ជាប់នូវតម្លៃរបស់ប្រទេសជាតិ។

លោកស្រីបានបន្តថា ស្ថិតក្នុងកាលៈទេសៈដែលពិភពលោក កំពុងមានការកើនឡើងនៃភាពស្មុគស្មាញសកល ការប្រែប្រួល និងហានិភ័យ វិស័យការទូតដើរតួនាទីយ៉ាងសំខាន់ ដើម្បីឈរជាមូលដ្ឋានគ្រឹះក្នុងការរក្សាសន្តិភាពពិភពលោក និងការជំរុញនូវភាពរុងរឿង។

លោកស្រីបានបន្តណែនាំថា ក្នុងអាណត្តិនេះ ចំណុចសំខាន់ គឺត្រូវផ្តោតទៅលើដំណើរការកំណែទម្រង់សេដ្ឋកិច្ច និងស្ថាប័ន ស្របទៅតាម “យុទ្ធសាស្ត្របញ្ចកោណ”។ ក្នុងន័យនេះ លោកស្រីសង្កត់ធ្ងន់ទៅកាន់ឯកអគ្គរាជទូតថា  ទំនាក់ទំនងការទូតសេដ្ឋកិច្ចមានសារៈសំខាន់ក្នុងការសម្រេចបាន ទាំងគោលបំណងផ្នែកសេដ្ឋកិច្ច និងតម្រូវការសន្តិសុខជាតិ។

លោកស្រី ឃួន សុដារី ក៏ណែនាំពីចំណុចសំខាន់នៃការទូតរបស់កម្ពុជា គឺការលើកកម្ពស់ការផ្លាស់ប្តូរផ្នែកអប់រំ និងវប្បធម៌ជាមួយបណ្តាប្រទេសនានា។ កិច្ចខិតខំប្រឹងប្រែងការទូតរបស់កម្ពុជា រួមមាន ការទូតរបស់រាជរដ្ឋាភិបាល ការទូតសភា ការទូតបក្ស និងការទូតប្រជាជន។ ការធ្វើការទូតរួមនៅគ្រប់ផ្នែកទាំងអស់គឺជាការចាំបាច់ក្នុងការសម្រេចបាននូវផលប្រយោជន៍ជាតិជាធំ។

 សម្រាប់ឯកអគ្គរាជទូតទាំង៧រូប ដែលត្រូវទៅបំពេញបេសកកម្មការទូតនៅប្រទេសជាមិត្តរួមមាន៖

១/លោក  លុយ ដាវីត ឯកអគ្គរាជទូតកម្ពុជាប្រចាំនៅប្រទេស បារាំង អ៊ីតាលី ព័រទុយហ្កាល់ ម៉ាល់តា អេស្បាញ បូរីក្សត្រអង់ដ័រនិងបូរីក្សត្រម៉ូណាកូ ដែលមាននិវេសនដ្ឋាននៅទីក្រុងប៉ារីស ជំនួសលោក កេត សោផាន់ ។ ២/លោក ឡាយ សំកុល ជាឯកអគ្គរាជទូតកម្ពុជាប្រចាំនៅចក្រភពអង់គ្លេស អៀរឡង់ ដាណឺម៉ាក ស៊ុយអែត ន័រវែស និងហ្វាំងឡង់ ដែលមាននិវេសនដ្ឋាននៅទីក្រុងឡុងដ៍ ជំនួសលោក កាន់ ផារិទ្ធ។

 ៣/ លោក សុក ជា ត្រូវទៅបំពេញបេសកកម្មជាឯកអគ្គរាជទូតកម្ពុជាប្រចាំប្រទេស តួកគី តាហ្ស៊ីគីស្ថាន អាស៊ែបៃហ្សង់ កាហ្សាក់ស្ថាន ហ្សកហ្ស៊ី កៀហ្ស៊ីស៊ីស្ថាន ប៉ាគីស្ថាន និងអ៊ីស្រាអែល ដែលមាននិវេសនដ្ឋាននៅរដ្ឋធានីអង់ការ៉ា ជំនួសលោក មាស គឹមហេង។៤/ លោក ទាន សំណាង ត្រូវទៅបំពេញអាណត្តិការទូតនៅហ្សាកាតា ក្នុងនាមជាឯកអគ្គរាជទូតកម្ពុជាប្រចាំនៅប្រទេសឥណ្ឌូនេស៊ី និងប្រទេសទីម័រខាងកើត ជំនួសលោក អ៊ីវ ហ៊ាង។

៥/លោក ហ៊ុលក្រង ផាណង ត្រូវតែងតាំងជាឯកអគ្គរាជទូតកម្ពុជាប្រចាំប្រទេស ឡាវ ជំនួសលោកស្រី ថោង សុគន្ធារី។៦/លោក ឈាង ធីរ៉ា ត្រូវទៅធ្វើជាឯកអគ្គរាជទូតកម្ពុជាប្រចាំនៅសហព័ន្ធអាល្លឺម៉ង់ ប៉ូឡូញ សាធារណរដ្ឋឆែក ក្រូអាត ហុងគ្រី ស្លូវ៉ាគី ស្លូវេនី និងប្រទេសអ៊ុយក្រែន ជំនួសលោកស្រី ផែន សាវនី។៧/លោក តាន់ ប៊ុនប៉ា ជាឯកអគ្គរាជទូតកម្ពុជាប្រចាំស៊ែប៊ី ជំនួស លោក តាន់ វុដ្ឋា៕

ដោយ៖ ង៉ិល ណារ៉ាត់