លោក តាន់ ហ្សង់-ហ្វ្រង់ស័រ៖ ជួយប្រជាជនមានជីវភាពលំបាក ជាអាទិភាពរបស់ឯកឧត្តម ហ៊ុន ម៉ាណែត

លោក តាន់ ហ្សង់-ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការ ការបរទេស និងសហប្រតិបត្តិការអន្តរជាតិ បានលើកឡើងថា ការជួយប្រជាជនដែលមានជីវភាពលំបាកជាងគេ គឺជាអាទិភាពរបស់ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តីនៃកម្ពុជា។ លោក តាន់ ហ្សង់-ហ្វ្រង់ស័រ បានលើកឡើងដូច្នេះ នៅលើគណនីហ្វេសប៊ុករបស់លោកនៅថ្ងៃទី៣០ ខែសីហា ឆ្នាំ២០២៣ នេះ។

លោក តាន់ ហ្សង់-ហ្វ្រង់ស័រ បានបញ្ជាក់ថា គ្រាបច្ចុប្បន្ន នៅក្នុងស្ថានការណ៍មួយដុនដាបខ្លាំងនៃសេដ្ឋកិច្ចពិភពលោក តំបន់ និងជាតិ រាជរដ្ឋាភិបាលដឹកនាំដោយឯកឧត្តមកត្តិទេសាភិបាលបណ្ឌិត ហ៊ុន ម៉ាណែត នៅតែបន្តដាក់ចេញនូវ «គោលដៅកាត់បន្ថយភាពក្រីក្រក្នុងអត្រាទាបជាង១០%» បង្រួមវិសមភាព សេដ្ឋកិច្ចនិងសង្គម រក្សាកំណើនសេដ្ឋកិច្ច និងពង្រឹងប្រព័ន្ធសន្តិសុខសង្គម ដោយគិតគូរជាពិសេសដល់អ្នកដែលមានជីវភាពលំបាកលំបិនជាងគេ។

លោកថា មានប្រជាជនតិចណាស់ដែលចាប់អារម្មណ៍ទៅលើពាក្យ «យុទ្ធសាស្ត្រត្រីកោណ» «យុទ្ធសាស្ត្រចតុកោណ» និងចាប់ពីពេលនេះតទៅ «យុទ្ធសាស្ត្របញ្ចកោណ» ដែលជាផែនទីចង្អុលផ្លូវរបស់រាជរដ្ឋាភិបាលថ្មីដឹកនាំដោយនាយករដ្ឋមន្ត្រីថ្មី ឯកឧត្តមកត្តិទេសាភិបាលបណ្ឌិត ហ៊ុន ម៉ាណែត។

លោក តាន់ ហ្សង់-ហ្វ្រង់ស័រ បានបន្ថែមថា សមិទ្ធផលធំៗបច្ចុប្បន្ន (កម្ពុជាអធិបតេយ្យនិងឯករាជ្យ កម្ពុជាក្នុងសមាហរណកម្មតំបន់និងសកល សុខសន្តិភាព ការចាកផុតពីភាពក្រីក្រសម្រាប់ខ្មែររាប់លាននាក់បើប្រៀបធៀបទៅនឹងស្ថានភាពកាលពី២៥ឆ្នាំមុន…) សុទ្ធតែបានមកពីការអនុវត្តយុទ្ធសាស្ត្រត្រីកោណ និងយុទ្ធសាស្ត្រចតុកោណ ព្រមទាំងការអនុវត្តនយោបាយឈ្នះ-ឈ្នះរបស់សម្តេចតេជោ ហ៊ុន សែន។ ក្នុងន័យនេះ យុទ្ធសាស្ត្របញ្ចកោណ គឺជា«គម្ពី»ទី៣ ដែលតាមគោលការណ៍ និងតាមទ្រឹស្តី ត្រូវនាំកម្ពុជាទៅកាន់ដំណាក់កាលថ្មី នៅក្នុងអភិក្រមនៃការកសាងជាតិ។

រហូតដល់ឆ្នាំ២០៥០ យុទ្ធសាស្ត្របញ្ចកោណនេះត្រូវឆ្លងកាត់ ៥ដំណាក់កាល។ គោលដៅចុងក្រោយសម្រាប់រយៈកាលវែង គឺ«លើកស្ទួយមោទនភាពជាតិឲ្យឈានកាន់តែខ្ពស់ឡើង តាមរយៈការកសាងជាតិមួយឲ្យរឹងមាំ រស់រវើក រុងរឿង ក្លាយជាប្រទេសមានចំណូលខ្ពស់ នៅត្រឹមឆ្នាំ២០៥០។ ដំណាក់កាលទី១ គឺជាអ្វីដែលរាជរដ្ឋាភិបាល «ជំនាន់ថ្មី ឈាមថ្មី និងថាមពលថ្មី» ក្រោមការដឹកនាំរបស់ឯកឧត្តមបណ្ឌិត ហ៊ុន ម៉ាណែត ត្រូវអនុវត្ត ពីពេលនេះតទៅ និងសម្រាប់រយៈកាលខ្លី ពី៥ទៅ៧ឆ្នាំខាងមុខ។

នៅក្នុងចំណោមវិធានការគន្លឹះនៃយុទ្ធសាស្ត្របញ្ចកោណដំណាក់កាលទី១ គឺការយកចិត្តទុកដាក់ទៅលើប្រជាជន «អ្នកលំបាក» ជាងគេ គឺជាអាទិភាពចំបង។ ជាក់ស្តែង ដូចដែលឯកឧត្តមបណ្ឌិត នាយករដ្ឋមន្ត្រី បានលើកឡើងនៅកាលពីពេលថ្មីៗនេះថា រាជរដ្ឋាភិបាលនឹងប្រឹងប្រែងតាមរយ:គ្រប់មធ្យោបាយ និងគ្រប់លទ្ធភាព ដើម្បីពង្រឹងកំណើនសេដ្ឋកិច្ច, ពង្រឹងសន្ទុះនៃការបង្កើតការងារឲ្យបានច្រើន, ពង្រឹងសមធម៌សង្គម, ពង្រឹង គុណភាពនៃវិស័យអប់រំនិងសុខភិបាល ពិសេសនៅតាមទីជនបទដាច់ស្រយាល។

ទាំងនេះ គឺស្តែងឲ្យឃើញនូវនយោបាយដែលមានលក្ខណៈសង្គមខ្លាំង នៃរាជរដ្ឋាភិបាលរបស់ឯកឧត្តមបណ្ឌិត ហ៊ុន ម៉ាណែត។ ទាំងនេះក៏ស្តែងឲ្យឃើញប្រកែកមិនបានដែរ នូវសន្តានចិត្តដ៏ល្អរបស់ប្រមុខរាជរដ្ឋាភិបាលថ្មីរូបនេះ ចំពោះ អ្នកដែលនៅក្នុងសង្គម មានជីវភាពលំបាកជាងគេ រួមមានដូចជាកម្មករ-កម្មការនី និងបណ្តាអាជីវករនៃសេដ្ឋកិច្ចក្រៅប្រព័ន្ធ៕