កម្ពស់ទឹកទំនប់វារីអគ្គិសនីសេសានជាង ៧៥ ម៉ែត្រ ​តែមិនធ្វើឱ្យប៉ះពាល់ដល់ផ្នែកខាងក្រោម

លោក សុត រស្មី រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារសម្របសម្រួលការងារគ្រប់គ្រងធនធានទឹក និងឧតុនិយមប្រចាំខេត្តក្រចេះ និងខេត្តស្ទឹងត្រែងនៅថ្ងៃទី ៥ ខែកញ្ញា ឆ្នាំ ២០២៣ បានដឹកនាំមន្ត្រីចុះពិនិត្យស្ថានភាពកម្ពស់ទឹកទំនប់វារីអគ្គិសនីសេសានក្រោម២ ស្ថិតនៅខេត្តស្ទឹងត្រែង។

យោងតាមសេចក្តីរាយការណ៍របស់ប្រធានមន្ទីរខេត្តស្ទឹងត្រែងបានបញ្ជាក់ថា កម្ពស់ទឹកនៅទំនប់វារីអគ្គិសនីសេសានក្រោម២ មានកម្ពស់ ៧៥,២៦ម៉ែត្រ ធៀបនឹងនីវូទឹកសមុទ្រដែលបង្ហាញឱ្យឃើញថា ហាក់បីដូចជាខ្ពស់បន្តិចមែន ប៉ុន្តែពុំបានបង្កឱ្យបរិមាណទឹកនៅទន្លេសេសានផ្នែកខាងក្រោមជួបនូវបញ្ហាខុសធម្មតាឡើយ។

លោកប្រធានមន្ទីរបញ្ជាក់ថា គិតមកត្រឹមថ្ងៃនេះ នៅតាមស្ថានីយជលសាស្រ្តរបស់មន្ទីរខេត្តស្ទឹងត្រែង កម្ពស់ទឹកនៅទន្លេសេសានមានត្រឹមតែ ៤,៧ម៉ែត្រ(កម្ពស់ពីបាតទន្លេ) បើធៀបទៅនឹងឆ្នាំ២០២២ ឃើញថា មានកម្ពស់ទឹកនៅទាបជាងនៅឡើយ។ ម្យ៉ាងវិញទៀត បើតាមលោកប្រធានមន្ទីរ កម្ពស់ទឹកដែលត្រូវប្រុងប្រយ័ត្នលុះណាតែបរិមាណទឹកនៅក្នុងទន្លេសេសានឡើងដល់កម្រិត ១០,៥ម៉ែត្រ និងកម្ពស់ប្រកាសអាសន្ន ១១,៥ម៉ែត្រ។

លោកប្រធានមន្ទីរបានបញ្ជាក់ថា ទាំងបរិមាណទឹកនៅទំនប់វារីអគ្គិសនីសេសានក្រោម២ និងទឹកផ្នែកខាងក្រោមទន្លេសេសាន ពុំទាន់មានបញ្ហាដែលកត់សម្គាល់បង្កផលប៉ះពាល់ដល់ ផលដំណាំ និងផ្ទះសម្បែងរបស់បងប្អូនប្រជាពលរដ្ឋនៅឡើយនោះទេ៕