ក្រសួងអប់រំ សិក្សារៀបចំសេចក្តីណែនាំស្តីពីការ​ហាមមិនឱ្យគ្រូបង្រៀនគួរ​ក្នុងម៉ោងសិក្សា និងក្នុងសាលារៀន

ក្រសួងអប់រំ យុវជន និងកីឡា បាននិងកំពុងសិក្សារៀបចំសេចក្តីណែនាំស្តីពីការហាមមិនឱ្យគ្រូបង្រៀនគួរ​ក្នុងម៉ោងសិក្សានិងក្នុងសាលារៀន។

ការសិក្សារៀបចំសេចក្តីណែនាំនេះ បន្ទាប់ពីកន្លងមក មហាជនទូទៅសង្កេតឃើញថា មានគ្រូបង្រៀន​មួយចំនួនយក​ម៉ោងរដ្ឋទៅបង្រៀនគួរ ឬ ចេញវិញ្ញាសារប្រឡងប្រចាំខែ ឆមាស នូវលំហាត់ឬខ្លឹមសារដែលបង្រៀនគួររួច ដែលធ្វើ​ឱ្យប៉ះពាល់ដល់សតិអារម្មណ៍របស់សិស្សមិនបានរៀនគួរ និងជាពិសេសបង្កើតគម្លាតវិសមភាពយ៉ាងច្រើន​សម្រាប់​កុមារក្រីក្រជួបការលំបាកដែលគ្មានលទ្ធភាពរៀនគួរ។ 

លោកបណ្ឌិត កាន់ ពុទ្ធី អ្នកនាំពាក្យក្រសួងអប់រំយុវជន និងកីឡា បានមានប្រសាសន៍នៅថ្ងៃទី២០កញ្ញានេះថា កន្លងមករាជរដ្ឋាភិបាល ក៏ដូចជាក្រសួងអប់រំ យុវជន និងកីឡា បានដាក់ឱ្យអនុវត្តច្បាប់ស្តីពី​សហលក្ខន្តិក:មន្រ្តីរាជ​ការស៊ីវិល ច្បាប់ស្តីពីការអប់រំ អនុក្រឹត្យស្តីពីក្រមសីលធម៌វិជ្ជាជីវ:គ្របង្រៀន និងសេចក្តីណែនាំជាច្រើនទៀត ដើម្បីពង្រឹង​ការអនុវត្តតួនាទីភារកិច្ច និងលើកកម្ពស់ក្រមសីលធម៌វិជ្ជាជីវៈគ្រូបង្រៀន ប៉ុន្តែការអនុវត្តរបស់គ្រូបង្រៀនខ្លះ នៅមិនទាន់​បានល្អប្រសើរនៅឡើយ។

ដោយឆ្លើយតបនឹងបាតុភាពមិនប្រក្រតីនិងអសកម្មនេះ អ្នកនាំពាក្យក្រសួងអប់រំ បានគូសបញ្ជាក់ថា ក្រសួងកំពុងសិក្សា ដើម្បីរៀបចំសេចក្តីណែនាំស្តីពីការហាមមិនឱ្យគ្រូបង្រៀនគួរក្នុងម៉ោងសិក្សា និងក្នុងសាលា៕

អត្ថបទ ៖ សំអឿន