មេទ័ពអ៊ុយក្រែន ថា ទាល់តែ ១ខែកែនទាហានបាន ៣០ ០០០នាក់ ទើបតតាំងជាមួយរុស្ស៊ីបាន

ថ្លែងក្នុងបទសម្ភាសជាមួយជាមួយសារព័ត៌មាន IB.ua ដែលចេញផ្សាយកាលពីថ្ងៃពុធទី៩ខែមេសាឆ្នាំ២០២៥ មេទ័ពអ៊ុយក្រែនលោក Aleksandr Syrsky និយាយថា ទីក្រុងកៀវ ចាំបាច់ត្រូវតែកែនទាហានឲ្យបាន ៣០ ០០០នាក់ក្នុងមួយខែ បើចង់តតាំងជាមួយរុស្ស៊ីបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសដែលយកមកផ្សាយបន្តដោយសារព័ត៌មាន RT, មេបញ្ជាការកងទ័ពអ៊ុយក្រែនរូបនេះ លើកឡើងថា «តាំងពីផ្ទុះសង្គ្រាមក្នុងឆ្នាំ២០២២មក រុស្ស៊ីបានពង្រីកកម្លាំងទ័ពធំជាងមុនដល់ទៅ៥ដង។ មួយខែពួកគេពង្រីកកម្លាំងទ័ពពី ៨ ០០០ទៅ៩ ០០០នាក់និងមួយឆ្នាំពី១២០ ០០០ទៅ១៣០ ០០០នាក់»។

តាមសម្តីលោក Syrsky, រុស្ស៊ីអាចចល័តទ័ពដែលទទួលបានការបណ្តុះបណ្តាលនិងពោរពេញដោយបទពិសោធរហូតដល់៥លាននាក់ ជាមួយនឹងកម្លាំងសក្តានុពល ២០លាននាក់ឯណោះ។ នេះជាគម្លាតដ៏ឆ្ងាយបើធៀបនឹងទាហានអ៊ុយក្រែន ទាំងដែលឥឡូវកំពុងប្រយុទ្ធតស៊ូយ៉ាងស្វិតស្វាញនៅសមរភូមិ។

ពាក់ព័ន្ធនឹងកម្លាំងទ័ពរុស្ស៊ី, កាលពីសប្តាហ៍មុន លោកប្រធានាធិបតី វ៉្លាឌីមៀរ ពូទីន ​បានចេញបញ្ជា​ឲ្យ​កែនទ័ព​​​ថ្មី​​១៦ម៉ឺន​នាក់​បន្ថែម​ទៀត ​ដាក់​ជា​កាតព្វកិច្ច​ហោធា​​សម្រាប់​ការ​ធ្វើ​​​សង្រ្គាម​ជាមួយ​អ៊ុយក្រែន។

​ការ​កែនប្រជាជន​​​​សម្រាប់​កាតព្វកិច្ច​​យោធា​របស់​រុស្ស៊ី​​​នាពេលនេះ​ គឺ​​​​សម្រាប់​បុរសដែលមានអាយុពី១៨ទៅ៣០ឆ្នាំ ហើយបទបញ្ជាថ្មីនេះ នឹងចាប់ផ្តើម​​អនុវត្ត​ពីថ្ងៃទី១​ខែមេសា និងត្រូវបញ្ចប់ត្រឹមថ្ងៃទី ១៥​​ខែកក្កដា៕

អត្ថបទ៖ សុខ សុវណ្ណ

ចុចអាន៖ ចិន ឆ្លើយតប​រឿង​ដែល​អ៊ុយក្រែន​ចាប់​បាន​ជនជាតិ​ចិន​២​នាក់ដែល​ប្រយុទ្ធ​ឲ្យ​រុស្ស៊ី