កីឡា

កីឡាករ ពេជ្រ អាទិទេព ប្ដេជ្ញាចិត្តមិនធ្វើឲ្យអ្នកគាំទ្រខកបំណងពេលប៉ះម៉ាឡេស៊ីសប្ដាហ៍នេះ

បានផុស

២ ខែ មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

អ្នកលេងគុនខ្មែរ ពេជ្រ អាទិទេព ប្ដេជ្ញាចិត្តនឹងខំប្រឹងប្រែងឲ្យអស់ពីសមត្ថភាព និងមិនធ្វើឲ្យអ្នកគាំទ្រខកបំណងឡើយក្នុងការប្រកួតទី២ ប៉ះម៉ាឡេស៊ី អ៊ូម៉ា រេដ វូហ្វ ដំណើរឆ្ពោះទៅដណ្ដើមខ្សែក្រវាត់អូដ្ឋ ទម្ងន់ ៥៧ នៅសង្វៀនបាយ័នសប្ដាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាទិទេព និងដៃគូ

ថ្លែងក្នុងកិច្ចសម្ភាសកីឡាករ អាទិទេព បានឲ្យដឹងថា បានហ្វឹកហាត់ត្រៀមខ្លួនរួចរាល់សម្រាប់ការប្រកួតសន្សំពិន្ទុលើកទី២ នៅសៅរ៍សប្ដាហ៍នេះ។ ទាំងសុខភាព និងក្បាច់ស្នៀតល្អគ្រប់គ្រាន់រង់ចាំតែថ្ងៃប្រកួតមកដល់ប៉ុណ្ណោះ។

ឃួន ឡាំងកូស៊ីន និងដៃគូ

កីឡាករកំពុងឡើងកូដរូបនេះបន្ថែមទៀតថា បើទោះជាគ្រូធំរបស់ខ្លួននៅឆ្ងាយក៏មិនជាបញ្ហាសម្រាប់រូបគេនោះទេ ពោលការហ្វឹកហាត់នៅតែបានល្អដដែល។ អាទិទេព ថាខ្លួនដឹងពីសមត្ថភាព អ៊ូម៉ា រេដ វូហ្វ ជាកីឡាករល្អមួយរូប និងធ្លាប់ឈ្នះកីឡាករកម្ពុជាច្រើនរូបរួចមកហើយដែរ។ ចំពោះស្នៀត ឬយុទ្ធសាស្ត្រវាយយ៉ាងណានោះចាំមើលជាក់ស្ដែងលើសង្វៀន។ កូនសិស្សលោក ពេជ្រ សុផាន់ រូបនេះប្ដេជ្ញាចិត្តថានឹងធ្វើឲ្យបានល្អមិនឲ្យអ្នកគាំទ្រខកបំណងមកលើខ្លួនឡើយ។

គូខ្សែក្រវាត់

បញ្ជាក់ដែរថា នៅថ្ងៃសៅរ៍ ទី១២ ខែមេសា ឆ្នាំ២០២៥ នេះការប្រកួតដណ្ដើមខ្សែក្រវាត់ស៊ីម៉ង់អូដ្ឋរបស់សង្វៀនបាយ័ន ឈានដល់ប្រកួតទី២ ហើយក្នុងនោះកីឡាករ ពេជ្រ អាទិទេព ប៉ះ អ៊ូម៉ា រេដ វូហ្វ ឃួន ឡាំងកូស៊ីន ប៉ះ ថងបាង សឿភុម។ ក្រៅតែពីគូខ្សែក្រវាត់ហើយនោះក៏មានគូឯក ចាន់ ប៊ុនហឿន ប៉ះកីឡាករថៃ និងមិត្តភាពជាតិ និងជាតិជាច្រើនគូទៀត៕