តារាកំប្លែង​កូរ៉េ Park Na Rae បាត់របស់របរមានតម្លៃខ្ទង់លាន ប៉ូលិសសង្ស័យ​អ្នកជិតស្និទ្ធ​​

​ករណី​បាត់​​របស់របរ​សម្ភារៈ​មាន​តម្លៃ​​​​របស់​តារាកំប្លែងកូរ៉េ​ខាង​ត្បូង​ដ៏ល្បីឈ្មោះ​ម្នាក់​ក​ញ្ញា Park Na Rae ត្រូវ​បាន​​ប៉ូលិស​​ដាក់​ការ​​​សង្ស័យ​​លើ​​​អ្នក​ជិត​ស្និទ្ធ​​​របស់​នាង​ជាអ្នក​ប្រព្រឹត្ត​ ដោយសារ​តែ​គ្មានបន្សល់​ស្លាកស្នាម​អ្វី​គួរឲ្យ​សង្ស័យ​ពីខាងក្រៅ​​។ នេះបើយោងតាមរបាយការណ៍របស់ SPOTV News កាលពីថ្ងៃទី​៩ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាស្រី Park Na Rae បានបាត់បង់របស់របរមានតម្លៃ​មួយ​ចំនួន​នៅក្នុងផ្ទះ​​ កាលពីនៅថ្ងៃទី០៧ខែមេសា និងបានរាយការណ៍​ករណីបាត់​នេះ​ទៅ​កាន់​​ប៉ូលិសនៅថ្ងៃបន្ទាប់។ របស់របរដែល​បាន​បាត់​បង់​​នាពេលនោះ​​ រួមមាន ទំនិញមានតម្លៃខ្ពស់ ដូចជា គ្រឿងអលង្ការ​ ជាមួយនឹងការខូចខាតគិតជាទឹកប្រាក់រាប់សិបលានវ៉ុន។

ទោះជាយ៉ាងណា ដោយសារតែមានការលំបាកក្នុងការកំណត់ពេលវេលា និងទំហំ​ខូច​ខាត​​នៃចោរកម្ម ព័ត៌មានលម្អិតបន្ថែមទៀតនឹងលេច​ចេញ​តាមរយៈការស៊ើបអង្កេតរបស់ប៉ូលិស។

បន្ទាប់ពី​ទទួល​របាយការណ៍របស់តារាកំប្លែងរួចមក ប៉ូលិសដែលកំពុងស៊ើបអង្កេតករណីនេះ ជឿថា វាអាច​កើត​ឡើង​ដោយសារ​មនុស្សជិតស្និទ្ធ ព្រោះមិនមានសញ្ញានៃការឈ្លានពានពីខាងក្រៅ​នោះ​ទេ។ ទោះ​ជាបែប​ណា​ ប៉ូលិស​​នឹង​​នៅតែពង្រឹង​ការស៊ើបអង្កេតបន្ថែមទៀតដើម្បីស្វែង​រក​ចាប់​ជនសង្ស័យឲ្យទាល់តែបាន។

ពាក់ព័ន្ធនឹងឧបទ្ទវហេតុចោរកម្មនៅក្នុងផ្ទះ ​តារា​កំប្លែង​​ Park Na-rae បាន​ប្រាប់សារព័ត៌មាន OSEN ថា ខ្លួន​បានលុបចោល​​​ភ្លាម​ៗ​ចំពោះ​​ការបង្ហាញខ្លួនដែលបានកំណត់​នៅក្នុងកម្មវិធីផ្សាយបន្តផ្ទាល់ «Son Tae Jin’s Trot Radio» របស់ស្ថានីយ៍វិទ្យុ MBC កាលពីថ្ងៃទី៨មេសា​​​ មួយថ្ងៃ​ក្រោយ​កើត​ហេតុ​​។

គួរបញ្ចាក់ថា Park Na-rae គឺជាតារាសិល្បៈដ៏មានប្រជាប្រិយមួយរូប ដែលរកចំណូលបានខ្ពស់តាមរយៈការបង្ហាញខ្លួន​ជាទៀងទាត់ក្នុងកម្មវិធីផ្សេងៗ។ នៅឆ្នាំ២០២១ ក្នុង​វ័យ​៣០​ឆ្នាំ តារាស្រី​​​​​​​ដ៏​មានទេព​កោសល្យ​​​ប្រើប្រាស់​វោហារសព្វរូបនេះ បា​នប្រកាសបញ្ចប់ការជួលផ្ទះ​ស្នាក់​នៅ​​ ​ជំនួស​​មក​វិញ​​ដោយ​​ផ្ទះផ្ទាល់ខ្លួន​ដែល​បាន​ទិញ​វិញ។ នាងបានក្លាយជាម្ចាស់​ផ្ទះផ្ដាច់មុខដ៏ប្រណិតមួយតម្លៃជាង ៥.៥​ពាន់លានវ៉ុន តាមរយៈការដេញថ្លៃមួយនៅក្នុងទីក្រុង Itaewon-dong, Yongsan-gu, ទីក្រុងសេអ៊ូល។

ជារឿយៗ​ តារាកំប្លែងមុខស្ងួតរូបនេះ បានចែករំលែកជីវិតប្រចាំថ្ងៃនៅផ្ទះផ្ទាល់ខ្លួនពាក់ព័ន្ធនឹងទំហំផ្ទះ និងបង្ហាញឲ្យឃើញគន្លុកគន្លៀតផ្ទះមានបន្ទប់ក្រោមដី មានរចនាសម្ព័ន្ធធំទូលាយ ព្រមទាំងបន្ទប់ប្រាំដាច់ដោយឡែក។ ផ្ទះនេះច្រើនតែលេចឡើងនៅលើកម្មវិធី I Live Alone’ របស់ MBC ដែលធ្វើឲ្យអ្នកទស្សនាតាមដានយ៉ាងជក់ជិតបំផុត។ យ៉ាង​ណា​មិញ ដោយ​មាន​ការ​លាត​ត្រដាង​ពី​ទីតាំង​ផ្ទះខ្លាំងពេក តួកំប្លែងកូរ៉េបាន​រង​នូវ​ការ​ឈ្លាន​ពាន​ឯកជនភាពមករហូត៕

អត្ថបទ៖ សាង ស្រីល័ក្ខ

ចុចអាន៖ឆ្ងល់ឬអត់! ម្ដេចតួកុនកូរ៉េភាគច្រើន មាន​ទេព​កោសល្យ​សម្ដែងប៉ិនប្រសប់ រកកន្លែងទាស់គ្មាន