​កសិករថា ផ្លែមៀនផ្ដើមឡើងថ្លៃវិញ​ ក្រោយធ្លាក់ចុះរយៈពេល២ខែកន្លងមក​

លោក​ សួន ជុំ អនុប្រធានសមាគមមៀនប៉ៃលិន បានឱ្យដឹងនៅថ្ងៃទី ៣១ ខែតុលា ឆ្នាំ ២០២៣នេះថា តម្លៃផ្លែមៀនប៉ៃលិនហាក់មាន​ភាព​ល្អប្រសើឡើងវិញ ​បន្ទាប់ពីតម្លៃធ្លាក់ចុះរយៈពេល ២ ខែកន្លងមកនារដូវប្រមូលផលឆ្នាំនេះ។​

លោក​ សួន ជុំបញ្ជាក់ថា តម្លៃប្រែប្រួលចុះឡើងទៅតាមទីផ្សារនៅប្រទេសចិន ​ខណៈចូលខែ ១១ នេះ ស្ថានភាព​ការកុម្ម៉ង់ទិញរបស់ក្រុមហ៊ុននាំចេញទៅចិន​ផ្ដើមមានភាពល្អប្រសើរវិញ។

លោកថា តម្លៃល្អ​គឺថ្លៃជាង ៣ ០០០ រៀល/គីឡូក្រាម ខណៈតម្លៃទាបត្រឹមតែជាង ២ ពាន់រៀលប៉ុណ្ណោះក្នុងមួយគីឡូ។ ​អនុប្រធានសមាគមមៀនប៉ៃលិនរូបនេះ បញ្ជាក់ថា ​បច្ចុប្បន្នសម្រាប់ទីផ្សារមៀនប៉ៃលិនគឺពឹងផ្អែក​ខ្លាំងតែទីផ្សារនៅប្រទេស​ចិន ខណៈទីផ្សារក្នុងស្រុកមានតិចតួចប៉ុណ្ណោះ។

​របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបង្ហាញថា គិតចាប់ពីខែមករា ដល់ថ្ងៃទី ២៧ ខែតុលា ឆ្នាំ ២០២៣នេះ កម្ពុជាបាននាំផ្លែមៀនស្រស់ជាង ១ ម៉ឺន​តោន (១១ ៤០៣) ទៅកាន់ទីផ្សារប្រទេសចិន។

នៅក្នុងរយៈពេលមួយឆ្នាំកន្លងនេះ អគ្គនាយកដ្ឋានកសិកម្មបានចុះបញ្ជីចម្ការមៀន និងរោង​ចក្រវេច​ខ្ចប់​សម្រាប់នាំ​ចេញផ្លែមៀនស្រស់កម្ពុជាទៅកាន់ប្រទេសចិន​បានចំនួន ៩៧ក្រុមហ៊ុន/ម្ចាស់​ចម្ការ និង១២រោង​ចក្រវេចខ្ចប់ និងទទួលបានការអនុម័តទទួល​ស្គាល់ជាផ្លូវ​ការពីអគ្គរដ្ឋបាលគយ​នៃសាធារណ​រដ្ឋ​ប្រជាមានិតចិន (GACC)។

​ចាប់ពីថ្ងៃទី២៧ ខែតុលា ឆ្នាំ២០២២ ដល់ថ្ងៃទី២៧ ខែតុលា ឆ្នាំ២០២៣ ការនាំចេញផ្លែមៀនស្រស់​កម្ពុជាទៅប្រទេសចិន មានចំនួនសរុប ១៤ ៣៤៥,៧៤តោន ក្នុងនោះ នៅឆ្នាំ២០២២ (ថ្ងៃទី២៧ ខែតុលា ដល់ដំណាច់ខែធ្នូ ឆ្នាំ២០២២) កម្ពុជាបាននាំចេញផ្លែមៀនស្រស់ទៅប្រទេសចិន មានចំនួន ២ ៩៤២,៥១តោន ខណៈនៅឆ្នាំ២០២៣ (ចាប់ពីខែមករា ដល់ថ្ងៃទី២៧ ខែតុលា ឆ្នាំ២០២៣)​ កម្ពុជាបាននាំចេញផ្លែមៀនស្រស់ទៅប្រទេសចិនមានចំនួន ១១ ៤០៣,២៣តោន។

កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម​រុក្ខា ប្រមាញ់ និងនេសាទ ក្រៅពីការនាំចេញទៅកាន់ទីផ្សារប្រទេសចិន សហគ្រាសនៅកម្ពុជាកំពុងកែច្នៃផ្លែមៀនស្រស់​របស់ខ្មែរ ទៅជាដំណាប់មៀន ផ្លែមៀនកំប៉ុង ទឹកមៀនកៀប និងស្រាមៀន។

ក្រសួងកសិកម្ម រុក្ខាប្រមាញ់ និងនេសាទ​ បន្តលើកទឹកចិត្ត និងគាំទ្រសហគ្រាសទាំងអស់ចំពោះ​កិច្ចខិតខំប្រឹងប្រែងនៅក្នុងការកែច្នៃផលិតផលកសិកម្មខ្មែរឲ្យមានតម្លៃបន្ថែមខ្ពស់ ហើយក្រសួងនឹង​សហការជាមួយភាគីពាក់ព័ន្ធដើម្បីផ្សព្វផ្សាយ និងរុញផលិតផលដែលមានគុណភាពទាំងអស់នេះ ទៅកាន់ទីផ្សារពិភពលោក៕