​រដ្ឋសភាអនុម័តច្បាប់ថវិកាជាតិឆ្នាំ ២០២៤​ គ្រោងចំណាយ ៣៤ ៤៩៧ ប៊ីលានរៀល

រដ្ឋសភាជាតិនៅព្រឹកថ្ងៃទី ១៦ ខែវិច្ឆិកានេះ បានសម្រេចអនុម័តលើសេចក្តីព្រាងច្បាប់ថវិកាជាតិឆ្នាំ ២០២៤ ដែលមានសំឡេង ៩៥។

រដ្ឋសភាជាតិបានបន្តសម័យប្រជុំលើកទី ១ នីតិកាលទី ៧ ​ពិភ្សា និងអនុម័តលើសេចក្តីព្រាងច្បាប់ថវិកាជាតិឆ្នាំ ២០២៤ ក្រោម​អធិបតីភាព​សម្តេចមហារដ្ឋសភា​ធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា។​

សេចក្តីព្រាងច្បាប់មាន ៥ ជំពូក និង១៤ មាត្រា ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៤ រាជរដ្ឋាភិ​បាលសម្រេចចំណាយ​ថវិកាចំនួនចំនួន ៣៤ ៤៩៧ ប៊ីលានរៀល ស្មើនឹង ២៤,១៣% នៃ ផ.ស.ស ​ថយចុះ ៥,៨% ​ធៀបនឹងច្បាប់ថវិកាជាតិ ឆ្នាំ ២០២៣​ ដែលត្រូវបានបែងចែក​ចំណាយចរន្តចំនួន ២៣ ៣០៥ ប៊ីលានរៀល ចំណាយមូលធន ១០ ៦៩១ ប៊ីលានរៀល។

សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ គឺត្រូវបានតាក់តែងឡើង នៅក្នុងបរិការណ៍ ដែលរាជរដ្ឋាភិបាលនីតិកាលទី៧នៃរដ្ឋសភា បានប្រសូតចេញពីការបោះឆ្នោតដោយសេរី យុត្តិធម៌ ត្រឹមត្រូវ និងមានតម្លាភាព ស្របទៅតាមគោលការណ៍នៃលទ្ធិប្រជាធិបតេយ្យ សេរីពហុបក្ស ដែលមានប្រជាពលរដ្ឋចូលរួមបោះឆ្នោតរហូតដល់ជាង៨លាន២សែននាក់ ត្រូវជាប្រមាណ៨៤,៥៩%នៃចំនួនប្រជាពលរដ្ឋមានឈ្មោះក្នុងបញ្ជីអ្នកបោះឆ្នោត។

សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ មានគោលបំណងសំខាន់ៗ បន្តពង្រឹងសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈ បន្តធានាស្ថិរភាពម៉ាក្រូសេដ្ឋកិច្ច និងហិរញ្ញវត្ថុសាធារណៈ ជំរុញការអភិវឌ្ឍប្រព័ន្ធសុខាភិបាល ប្រព័ន្ធគាំពារសង្គម ដើម្បីលើកកម្ពស់សុខុមាលភាពសង្គម ដំឡើងប្រាក់បៀវត្សជូនមន្ត្រីរាជការស៊ីវិល និងកងកម្លាំងប្រដាប់អាវុធ ព្រមទាំងប្រាក់ឧបត្ថម្ភមន្ត្រីរដ្ឋបាលថ្នាក់ក្រោមជាតិ ក្នុងកម្រិតសមស្រប ដោយផ្អែកលើសមិទ្ធកម្ម ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ ព្រមទាំងពង្រឹងសមត្ថភាពស្ថាប័ន និងគុណភាពនៃការផ្តល់សេវាសាធារណៈជាដើម៕