អាជ្ញាធរស្រុកកំពង់ត្រាច ចុះពិនិត្យប្រភពទឹក ៣ ឃុំ ត្រៀមសង្គ្រោះស្រូវរដូវប្រាំង​

មកដល់ ថ្ងៃទី០៦ ខែមករា ឆ្នាំ២០២៤ នេះ អាជ្ញាធរស្រុកកំពង់ត្រាច បានដឹកនាំក្រុមការងារចុះពិនិត្យទីតាំងប្រភពទឹក ដើម្បីត្រៀមសង្គ្រោះស្រូវនារដូវប្រាំងសម្រាប់ប្រជាកសិករ ៣ឃុំ ខណៈប្រព័ន្ធទឹកមានកម្រិតអាចផ្ដល់​ក្នុងតំបន់សម្រាប់ផ្ទៃដីធ្វើស្រែវស្សា ប៉ុន្តែមួយរយៈចុងក្រោយនេះ ប្រព័ន្ធប្រឡាយធារាសាស្ត្រមិនមានអំណោយផលដល់ប្រជាកសិករធ្វើស្រែប្រាំង។ ឃុំទាំង៣ មានដូចជា ឃុំព្រែកកឹស ឃុំភ្នំប្រាសាទ និងឃុំបឹងសាលាខាងជើង ស្ថិតនៅក្នុង ស្រុកកំពង់ត្រាច ខេត្តកំពត។

អាជ្ញាធរស្រុកកំពង់ត្រាច បានឱ្យដឹងថា ជារៀងរាល់ឆ្នាំ បរិមាណទឹកមានសម្រាប់តែផ្ទៃដីដែលប្រជាកសិករធ្វើស្រែរដូវប្រាំងមានតិចហិកតាដែរ ប៉ុន្តែអាចប្រឈមនឹងខ្វះខាតទឹកប្រើប្រាស់។

ក្នុងករណីបងប្អូនប្រជាកសិករនៅតែបន្តធ្វើស្រែក្នុងរដូវប្រាំងក្នុងចំនួនដ៏ច្រើន លើសពីបរិមាណទឹកនោះ អាជ្ញាធរកំពុងខ្នះខ្នែងស្វែងរកប្រភពទឹកដើម្បីស្រោចស្រពស្រូវរដូវប្រាំងជូនប្រជាកសិករ។

ជាមួយគ្នានេះ អាជ្ញាធរបញ្ជាក់ថា ករណីដែលប្រជាកសិករបន្តបង្កបង្កើនផលស្រូវនៅរដូវប្រាំងនោះ ដោយសារ ឆ្នាំនេះតម្លៃស្រូវមានការកើនឡើងខ្ពស់។

ប្រជាកសិករលើកឡើងថា ប្រព័ន្ធប្រឡាយធារាសាស្រ្តអាចប្រឈមនឹងការខ្វះខាតទឹកប្រើប្រាស់ប្រចាំថ្ងៃ ខ្វះទឹកសម្រាប់សត្វពាហនៈ និងអាចធ្វើពួកគាត់ខាតបង់ថវិកាផងដែរ។

អត្ថបទ៖ សឹង រ៉ាត់