ព័ត៌មានជាតិ
ក្រុមយុវជនសំរាម បើកយុទ្ធនាការថ្មី សាងសង់សាលាសហគមន៍ នៅស្រុកឱរ៉ាល់
យុទ្ធនាការប្រមូលថវិកាសង់សាលាក្នុងសហគមន៍ស្រែកិន ស្រុកឱរ៉ាល់ កំពុងចាប់ផ្ដើមនៅដើមឆ្នាំ២០២៤ នេះ ដោយក្រុមយុវជនសំរាម។ លោក សាន ដារ៉ាវីត ស្ថាបនិកក្រុមយុវជនសំរាម បានឱ្យ “កម្ពុជាថ្មី” ដឹងនៅរសៀលនេះថា មុនចាប់ផ្ដើមគម្រោងសង់សាលាសហគមន៍នេះ ពីមុនក្រុមរបស់លោកបានប្រមូលរបស់ចាស់ៗ យកមកកែច្នៃ និងចែកចាយបន្តដល់សិស្សខ្វះខាតនៅតែភ្នំពេញទេ។ ប៉ុន្តែក្រោយពេលវិបត្តិកូវីដបានធូរស្បើយ ក្រុមរបស់លោកបានឃើញកម្មករសំណង់មកពីតាមបណ្ដាខេត្តមួយចំនួនបានមកធ្វើការវិញ ដោយមាននាំកូនៗមកជាមួយដែរ។
លោក សាន ដារ៉ាវីត បានឱ្យដឹងបន្ថែមថា៖ “យើងក៏ប្រមូលក្មេងៗទាំងនោះមករៀន ៦ ៧នាក់។ ក្រោយមក ក៏មានកម្មករបញ្ជូនកូនគាត់មករៀនជាបន្តបន្ទាប់ យើងក៏បើថ្នាក់បង្រៀនដោយឥតគិតថ្លៃ ដែលមកដល់ពេលនេះ មានក្មេងៗចូលរៀនប្រហែលជិត ៧០នាក់”។
ស្ថាបនិកក្រុមយុវជនសំរាមខាងលើ បានឱ្យដឹងទៀតថា តាមរយៈការចូលសិក្សារបស់កូនកម្មករសំណង់ទាំងនោះ ធ្វើឱ្យក្រុមរបស់លោកបានមានឃើញការលំបាកនៅតាមខេត្តដាច់ស្រយាលមួយចំនួនក្នុងការរៀនសូត្រ និងប្រកបរបរជាដើម ទើបក្រុមរបស់លោកបានសម្រេចមកសិក្សា បង្កើតសាលាសហគមន៍ នៅទីតាំងនៅភូមិស្រែកិន ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ។
លោក សាន ដារ៉ាវីត បញ្ជាក់ថា៖ “យើងកំពុងសង់ថ្នាក់រៀនពីឆ្អឹងដែក ដែលមានគម្រោង ៥ថ្នាក់ ព្រមទាំងផ្ទះគ្រូស្ម័គ្រចិត្ត អ្នកបច្ចេកទេសជាដើម។ យើងចង់ផ្សារភ្ជាប់សហគមន៍មួយនេះ ទៅមណ្ឌលយើងនៅភ្នំពេញ គឺយើងចង់ផ្សារភ្ជាប់គ្នារវាងទីក្រុង និងខេត្តដាច់ស្រយាល ដែលគាត់មានកសិផលហើយ មិនដឹងលក់នៅណា”។
យុវជនវ័យ ៣៤ ឆ្នាំរូបនេះ បានឱ្យដឹងថា មកដល់ថ្ងៃនេះ ក្រុមលោកបានសាងសង់ផ្ទះមួយចំនួន និងបន្ទប់ទឹក ព្រមទាំងកំពុងចាប់ផ្ដើមធ្វើថ្នាក់រៀនចំនួន១ ដែលមានទំហំ ៤ម៉ែត្រ គុណ ៧ម៉ែត្រ។ ចំពោះគម្រោងក្នុងការចំណាយ ពី ៨ពាន់ ទៅ ១ម៉ឺនដុល្លារ ដោយលោកទទួលបានជំនួយបានប៉ុន្មាន គឺធ្វើប៉ុណ្ណឹងជាបន្តបន្ទាប់។ មកដល់ពេលនេះក្រុមលោកទើបទទួលបានជំនួយប្រហែល ២ ពាន់ដុល្លារ។
លោក សាន ដារ៉ាវីត បានបញ្ជាក់ថា៖ “ខ្ញុំកំពុងសិក្សាលើគម្រោងសាងសង់សាលាសហគមន៍ ហើយប្រសិនជាជោគជ័យ និងមានជំនួយលើសគម្រោងនេះ ខ្ញុំចង់ធ្វើនៅតាមបណ្ដាខេត្តផ្សេងៗទៀត ដើម្បីជួយបណ្ដុំបណ្ដាលធនធានក្នុងស្រុកមានស្រាប់ កុំឱ្យពួកគាត់ទៅធ្វើពលករចំណាកស្រុក ពិសេសពលករខុសច្បាប់ និងចាប់បោកមេខ្យល់។
ស្ថាបនិកវ័យក្មេងនេះ បានឱ្យដឹងថា ដោយសារអត់មានបទពិសោធន៍ការងារបង្កើតសាលាសហគមន៍ តាំងពីការងារជាមួយក្មេង និងគ្រូស្ម័គ្រចិត្តជាដើម នាំឱ្យការងារដំបូង ក្រុមរបស់លោកត្រូវបានចំណាយអស់ច្រើន ប៉ុន្តែពេលជួបបញ្ហាមួយ គឺដោះស្រាយមួយ។ ជាក់ស្ដែង សាលានៅភ្នំពេញមានគ្រូ ៤រូប ប៉ុន្តែនៅឱរ៉ាល់នេះ មិនទាន់មានគ្រូទេ ដែលក្រុមលោកកំពុងដោះស្រាយបញ្ហានេះដែរ។
លោក សាន ដារ៉ាវីត លើកឡើងថា៖ “ខ្ញុំសង្ឃឹមថា គម្រោងនេះ នឹងមានការលើកទឹកចិត្តពីមហាជន ព្រមទាំងគាំទ្រឱ្យមានការបង្កើតសាលាតាមសហគមន៍ផ្សេងទៀត។ បើយើងចង់ឱ្យប្រទេសជាតិរីកចម្រើន យើងត្រូវខិតខំកែច្នៃធនធានយើងដែលមានស្រាប់ ហើយយើងព្យាយាមជួយគាត់ ជំរុញគាត់ លើកទឹកចិត្តគាត់ ដើម្បីទទួលបានលទ្ធផលល្អទាំងអស់គ្នា ក៏ដូចជាការភ្ជាប់គ្នារវាងទីក្រុង និងតំបន់ដាច់ស្រយាល”។
គួរបញ្ជាក់ថា ក្រុមយុវជនសម្រាម ត្រូវបានគេទទួលស្គាល់តាមរយៈសកម្មភាពប្រមូលសម្រាមនៅលើប្រឡាយទឹកស្អុយបឹងត្របែក ស្ថិតនៅប៉ែកខាងត្បូង រាជធានីភ្នំពេញ។ ការសម្រេចលូកដៃចូលក្នុងសកម្មភាពប្រមូលសម្រាមដែលមានក្លិនស្អុយជាប់ខ្លួននេះ គឺដោយសារឈឺចាប់នឹងពាក្យរិះគន់ពីមិត្តភក្តិបរទេស ហើយបានប្តេជ្ញាបន្តធ្វើសកម្មភាពនេះរហូតដល់ប្រទេសកម្ពុជាស្អាត។ ជាមួយគ្នានេះ ក៏ត្រូវការការសហការចូលរួមពីប្រជាពលរដ្ឋ និងភាគីពាក់ព័ន្ធ ទាំងកម្លាំងកាយ ចិត្ត និងថវិកាសប្បុរសធម៌ ផងដែរ៕
អត្ថបទ៖ ច័ន្ទ វីរៈ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៨ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង