ក្រសួង​អប់រំ​ណែនាំ​ឲ្យ​រៀបចំ​ទិវា​វប្បធម៌​ជាតិ​៣​មីនា​នៅ​ឆ្នាំនេះ​ឲ្យ​បាន​ទូលំទូលាយ​
Connect with us
Helistar Cambodia - Helicopter Charter Services

ព័ត៌មានជាតិ

ក្រសួង​អប់រំ​ណែនាំ​ឲ្យ​រៀបចំ​ទិវា​វប្បធម៌​ជាតិ​៣​មីនា​នៅ​ឆ្នាំនេះ​ឲ្យ​បាន​ទូលំទូលាយ​

Published

on

ក្រសួង​អប់រំ​យុវជន​និង​កីឡា​បាន​ណែនាំ​ដល់​ប្រធាន​មន្ទីរអប់រំ​យុវជន​និង​កីឡា​រាជ​ធានី​ខេត្ត​ត្រូវ​រៀប ចំ​ទិវា​វប្បធម៌​ជាតិ​៣​មីនា​ នៅ​ឆ្នាំ​២០២១​នេះ​ឲ្យ​បាន​ទូលំទូលាយ​។​ប៉ុន្តែ​ត្រូវគោរព​តាម​ស្តង់ដា​សុវត្ថិ​ភាព​ក្នុងស្ថានភាព​ជំងឺ​កូ​វីដ​១៩ ​និង​អនុវត្តតាម​ការណែនាំរបស់​ក្រសួងសុខាភិបាល​។​

យោងតាម​សេចក្តី​ជូន​ដំណឹង​របស់​ក្រសួង​អប់រំ​យុវជន​និង​កីឡា​បាន​ឲ្យ​ដឹងថា​ ក្រសួង​ស្នើឲ្យ​លោក​ស្រី​ប្រធាន​រៀបចំ​អបអរសាទរ​ទិវា​វប្បធម៌​ជាតិ​៣​មីនាឲ្យបាន​សមស្រប​ដោយគោរព​តាម​ស្តង់ដារ​សុវត្ថិភាព​ក្នុងស្ថានភាព​ជំងឺ​កូ​វីដ១៩ និងត្រូវ​អនុវត្តតាម​ការណែនាំ​របស់​ក្រសួងសុខាភិបាល​និង​ផ្សព្វ​ផ្សាយ​ខ្លឹមសារ​នៃ​ទិវា​នេះដល់​គ្រឹះស្ថានសិក្សា​រដ្ឋ​ឯកជន​និង​តាម​អង្គភាព ​នឹងត្រូវ​លើក​ទង់ជាតិ​ទង់ជ្វា​លា​ បដា​ពាក្យស្លោក​ឲ្យបាន​ព្រមៗ​គ្នា​ចាប់ពី​ថ្ងៃទី​០១​ដល់​ថ្ងៃទី០៩​ ខែមីនា​ឆ្នាំ​២០២១​ខាងមុខនេះ​។​

រាជរដ្ឋាភិបាល​កម្ពុជា​បានចេញ​សារាចរ​ស្ដីពី​ការរៀបចំ​ទិវា​វប្បធម៌​ជាតិ​៣​មីនា​លើក​ទី​២៣​ ឆ្នាំ​២០២១​ជា​ទិវា​ដ៏​មាន​សារៈសំខាន់​មួយ​សម្រាប់​ប្រជាជាតិ​ក្នុងការ​រំលឹក​ដល់​គុណូបការៈ​ចំពោះ​បុព្វបុរស​នៃ​យើង​ដែល​បាន​បន្សល់ទុក​នូវ​មរតក​វប្បធម៌​ដ៏​សម្បូរបែប​ដែល​មិនអាច​កាត់ថ្លៃ​បាន​សម្រាប់​កូនចៅ​ជំនាន់​ក្រោយ​និង​ជា​ទិវា​បំផុស​នូវ​ស្មារតី​ស្រឡាញ់​វប្ប​ធម៌ទំ​លៀម​ទម្លាប់​ប្រពៃណី​ពី​សំណាក់​ប្រជា​ពល​រដ្ឋ​ពិសេស​យុវជន​បន្តវេន​ដែលមាន​កាតព្វ​កិច្ច​ត្រូវ​ចូលរួម​ថែរក្សា​ការពារ​នូវ​សម្បត្តិ​វប្បធម៌​ជាតិ​និង​វប្បធម៌​ចម្រុះ​នៃ​សហគមន៍​ជនជាតិ​ដើម​នៅក្នុង​ព្រះរាជាណាចក្រ​កម្ពុជា​ឲ្យ​ឋិតថេរ​គង់វង្ស​ស្រប​តាម​ទិស​ស្លោក​កម្ពុជាព្រះរាជាណាចក្រ​នៃ​វប្បធម៌​។​

បើតាម​ក្រសួង​អប់រំ​ទិវា​វប្បធម៌​ឆ្នាំនេះ​ធ្វើឡើង​ក្រោម​ប្រធានបទ​«​យុវជន​ដើម្បី​វប្បធម៌​ជាតិ​»​ ក្នុង​គោល​បំណង​ជំរុញឱ្យ​ប្រជាពលរដ្ឋ​ពិសេស​យុវជន​ទូទាំងប្រទេស​ចូលរួមកាន់តែ​សកម្ម​ថែមទៀត​ក្នុងការ​ថែ​រក្សា​ការពារ​មរតក​វប្បធម៌​ជាតិ​យល់ដឹង​កាន់តែច្បាស់ពី​ភាព​សម្បូរបែប​នៃ​បេតិកភណ្ឌ​វប្បធម៌​ដែល​ជា​ប្រភព​មិនចេះ​រីងស្ងួត​ក្នុងការ​បង្កើត​ការងារ​និង​បង្កើត​កាលានុវត្តភាព​សម្រាប់​ទាញយក​ប្រាក់ចំ​ណូល​ប្រកបដោយ​ប្រសិទ្ធភាព​។​

ទន្ទឹមនេះ​លើ​កម្ពស់​មនសិការ​និង​ស្មារតី​ចូលរួម​ក្នុង​ការផ្ទេរ​ព្រមទាំង​ទទួលយក​នូវ​ចំណេះ​ដឹង​ជំនាញ​និង​បច្ចេកទេស​សិល្បៈ​វប្បធម៌​សំដៅ​ជំរុញ​ការអភិវឌ្ឍ​អភិរក្ស​និងអភិវឌ្ឍន៍​វប្បធម៌​ជាតិ​ក៏ដូចជា​វប្បធម៌​ចម្រុះ​នៃ​សហគមន៍​ជនជាតិដើម​នៅក្នុង​ព្រះរាជាណា​ចក្រ​កម្ពុជា​ឲ្យ​បាន​ស្ថិតស្ថេរ​គង់វង្ស​។​បង្កើន​ការយល់ដឹងឲ្យ​កាន់តែច្បាស់​អំពី​តម្លៃ​ពិត​នៃ​វប្បធម៌​ជាតិ​ដែលជា​ប្រភពធនធាន​មិនចេះ​រីងស្ងួត​ក្នុងការ​រួមចំណែក​អភិវឌ្ឍន៍សេដ្ឋកិច្ចសង្គម​តាមរយៈ​ការបង្កើត​នូវ​សេវា​និង​ផលិតផល​វប្បធម៌​សម្រាប់​ជា​គោលដៅពាណិជ្ជកម្ម​និង​ទេសចរណ៍។​

បង្កើន​ការងារ​និង​កាលានុវត្តភាព​ដល់​ប្រជាពលរដ្ឋ​ទាំងអស់​ជាពិសេស​យុវជន​ឲ្យ​ខិតខំ​បង្ក​បង្កើន​ស្នាដៃ​វប្បធម៌​ថ្មីៗ​ប្រកបដោយ​គុណភាព​ជាតិ​ជំរុញ​ឲ្យ​មានការ​ចូលរួម​ដោយ​មានការ​ទទួលខុសត្រូវ​របស់​យុវជន​ក្នុង​កិច្ច​អភិរក្ស​និង​អភិវឌ្ឍន៍​វប្បធម៌​ជាតិ​ប្រកប​ដោយ​និរន្តរភាព​ដោយ​មិន​ប្រកាន់​នូវ​និន្នា​ការ​នយោបាយ​ជំនឿ​សាសនា​និង​ពណ៌​សម្បុរ​៕​

អត្ថបទ ៖ សំអឿន​

India in Cambodia (Embassy of India, Phnom Penh)
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services