បន្តរកឃើញយានយន្ត១៦៨គ្រឿង និងអ្នកល្មើសជាតិស្រវឹង៦៤នាក់ ក្នុងយុទ្ធនាការរឹតបន្តឹងច្បាប់ចរាចរណ៍នៅយប់ថ្ងៃទី២៦

កម្លាំងនគរបាលនៃស្នងការដ្ឋាននគរបាលរាជធានីភ្នំពេញ បានបន្តរកឃើញយានយន្ដល្មើសច្បាប់ចរាចរណ៍សរុបចំនួន១៦៨គ្រឿង និងអ្នកល្មើសជាតិអាល់កុលសរុប៦៤នាក់ នៅក្នុងយុទ្ធនាការរឹរបន្តឹងច្បាប់ចរាចរណ៍ផ្លូវគោកទូទាំងរាជធានីភ្នំពេញ នៅយប់ថ្ងៃទី២៦ ខែមករា ឆ្នាំ២០២៤។

យោងតាមរបាយការណ៍របស់ស្នងការដ្ឋាននគរបាលរាជធានីភ្នំពេញ បានឲ្យដឹងនៅព្រឹកថ្ងៃទី២៧មករានេះថា នៅយប់ថ្ងៃទី២នៃយុទ្ធនាកការចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល កម្លាំងនគរបាលបានត្រួតពិនិត្យយានយន្តឆ្លងកាត់ចំនួន១៧៩១គ្រឿង និងបានឃាត់យានយន្តល្មើស ចំនួន១៦៨គ្រឿង ក្នុងនោះមានរថយន្តចំនួន៤៨គ្រឿង និងម៉ូតូចំនួន១២០គ្រឿង។

តាមរបាយការណ៍ ក្នុងយុទ្ធនាការនេះកម្លាំងបានរកឃើញអ្នកល្មើសជាតិស្រវឹងចំនួន៦៤នាក់ ក្នុងនោះមានកម្រិតជាតិអាល់ចាប់ពី ០.២៥ ទៅ ០.៣៩ mg/L ចំនួន២៨នាក់ និងកម្រិតជាតិអាល់ចាប់ពី ០.៤០ mg/L ឡើង មានចំនួន៣៦នាក់។ របាយការណ៍បញ្ជាក់ថា ក្នុងយុទ្ធនាការនេះ​គម្លាំងនគរបាលបានផាកពិន័យយានយន្ដសរុបចំនួន ១១៨គ្រឿង រក្សាទុកនៅអធិការខណ្ឌចំនួន ៤៧ គ្រឿង (រថយន្ត ចំនួន១៦គ្រឿង-ម៉ូតូ ចំនួន៣២គ្រឿង) និងបញ្ជូនទៅការិយាល័យចំនួន២គ្រឿង៕