ក្រសួងការពារជាតិ ​នឹង​រៀប​ចំ​ពិធី​បុណ្យ​ទក្ខិណានុប្បទាន ដើម្បី​​ឧទ្ទិស​កុសល​ជូន​វិញ្ញាណ​ក្ខន្ធ​កម្មាភិបាល​យុទ្ធជន​ ពលីជីវិតក្នុងសម័យសង្គ្រាម – Kampuchea Thmey Daily
Connect with us
Helistar Cambodia - Helicopter Charter Services

ព័ត៌មានជាតិ

ក្រសួងការពារជាតិ ​នឹង​រៀប​ចំ​ពិធី​បុណ្យ​ទក្ខិណានុប្បទាន ដើម្បី​​ឧទ្ទិស​កុសល​ជូន​វិញ្ញាណ​ក្ខន្ធ​កម្មាភិបាល​យុទ្ធជន​ ពលីជីវិតក្នុងសម័យសង្គ្រាម

Published

on

គណៈ​កម្មការសាងសង់-ជួសជុលទីលានផ្លូវយុទ្ធជន នៃក្រសួងការពារជាតិ ​​និងរដ្ឋបាលខេត្តកោះកុង ​គ្រោង​ការរៀបចំពិធីបុណ្យទក្ខិណានុប្បទាន ដើម្បីឧទ្ទិសកុសល ជូនដល់ដួងវិញ្ញាណក្ខន្ធ កម្មាភិបាលយុទ្ធជន ដែលបានពលីជីវិតក្នុងសម័យសង្គ្រាម​​ នៅថ្ងៃទី​២២-២៣ ខែកុម្ភៈ​ ខាងមុខ ហើយនៅក្នុងឳកាសនោះដែរ ក៏នឹងមានពិធី​បញ្ចុះបឋមសិលាបើកការដ្ឋានសាងសង់​-ជួសជុលទីលានផ្លូវយុទ្ធជន​ នៅខេត្តកោះកុងនោះផងដែរ​ នេះបើតាមការបញ្ជាក់ពីប្រធានគណៈ​កម្មការសាងសង់​។

លោកឧត្តមសេនីយ៏ យន្ត មីន ដែលជាប្រធានគណៈ​កម្មការសាងសង់​​បាន​បញ្ជាក់​ថា គណៈកម្មការសាងសង់​-ជួសជុល​ទីលានផ្នូរ​យុទ្ធជន និងរដ្ឋបាលខេត្តកោះកុង នឹងរៀបចំពិធីបុណ្យទក្ខិណានុប្បទានឧទ្ទិសកុសល​ជូនដល់ដួងវិញ្ញាណក្ខន្ធកម្មាភិបាល យុទ្ធជន ដែលបានពលីជីវិតក្នុងសម័យសង្គ្រាមចាប់ពីឆ្នាំ១៩៧៩ ដល់ចុងឆ្នាំ១៩៩៨ និងបានបញ្ចុះនៅទីនេះចំនួន៤៤៧​សព ដែលមានស្រុកកំណើតមកពី១៨ រាជធានី ខេត្ត ព្រមទាំងឧទ្ទិសកុសលដល់ដួងវិញ្ញាណក្ខន្ធបុព្វការីជន វីរជនស្នេហាជាតិទាំងអស់ ដែលបានពលីជីវិតក្នុងបុព្វហេតុជាតិ។

​បើតាមលោកឧត្តមសេនីយ៏ យន្ត មីន ​នៅក្នុងឳកាសនោះ នឹងមាន​ពិធីបញ្ចុះបឋមសិលាបើកការដ្ឋានសាងសង់​-ជួសជុលទីលានផ្លូវយុទ្ធជន ខេត្តកោះកុង ក្រោមអធិបតីភាពដ៏ខ្ពង់ខ្ពស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន​ក្រុមការងាររាជរដ្ឋាភិបាលចុះមូលដ្ឋានខេត្តកោះកុង និងលោកជំទាវ។

កម្មវិធីនោះ នឹងប្រព្រឹត្តទៅរយៈពេល២ថ្ងៃគឺ ថ្ងៃចន្ទ-អង្គារ១១-១២កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី​២២-២៣ ខែកុម្ភៈ ឆ្នាំ២០២១ នៅទីលានផ្លូវយុទ្ធជនខេត្តកោះកុង (សពយុទ្ធជន) ស្ថិតនៅក្នុងភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ហើយ​បើតាមកម្មវិធិ នៅរសៀលថ្ងៃទី២២ ខែកុម្ភៈ ឆ្នាំ២០២១ វេលាម៉ោង១៤ និង៣០នាទី រៀបចំពិធីក្រុងពាលី និងនិមន្តព្រះសង្ឃចម្រើន​ព្រះបរិត្ត សម្តែងព្រះធម៌ទេសនា​។ លុះ​នៅព្រឹកថ្ងៃទី២៣ ខែកុម្ភៈ ឆ្នាំ២០២១ វេលាម៉ោង​៨​ព្រឹក ព្រះសង្ឃ មន្ត្រីរាជការ កងកម្លាំងប្រ​ដាប់អាវុធ ប្រជាពលរដ្ឋជួបជុំនៅកន្លែងប្រារព្ធពិធី​ ហើយនៅម៉ោង៨ និង៣០នាទីព្រឹក គណៈអធិបតី ភ្ញៀវកិត្តិយស អញ្ជើញដល់កន្លែងប្រារព្ធពិធី ហើយម៉ោង៩ ព្រឹក ពិធីសំណេះ​សំណាល និងប្រគេន និងប្រគល់ជូនប័ណ្ណថ្លែងអំណរគុណដល់សប្បុរសជន ដែលបានបរិច្ចាគថវិកាចូលរួមជួយឧបត្ថម្ភដល់ការសាងសង់-ជួសជុលទីលានផ្លូវយុទ្ធជនខេត្តកោះកុង ក្រោមអធិបតីភាព ដ៏ខ្ពង់ខ្ពស់សម្តេចពិជ័យសេនា ទៀ បាញ់​។​

សូមបញ្ជាក់ថា ទីលានផ្នូរសពអតីតយុទ្ធជន គឺមានទំហ៊ុដី​ជាង៩,៥០០​​ម៉ែត្រការ៉េ ក្នុងចំណុចសពយុទ្ធជន ស្ថិតនៅភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ហើយទីលាន​ផ្នូរសពអតីតយុទ្ធនេះ គឺត្រូវសាងសង់ឡើងតាមរចនាបទខ្មែរសុទ្ធសាធ​ និងកែលម្អបន្ថែមទៀត នូវរចនាបទអង្គរ​​។​

នៅក្នុងកិច្ចប្រជុំពិភាក្សាមួយ កាលពីខែវិច្ឆិកា ឆ្នាំ​២០២០ ​នាយឧត្តមសេនីយ៍ យន្ត មីន រដ្ឋលេ​ខា​ធិការ​​ក្រសួងការពារជាតិ និង​ជា​ប្រធានគណៈកម្មការក្រុមការងារសាងសង់​​​បាន​អះអាងថា ទីលានផ្នូរសពអតីតយុទ្ធជន​នេះ ត្រូវធ្វើយ៉ាងណាឱ្យការសាងសង់ ជួលជុលទីលានផ្នូរយុទ្ធជនឱ្យបានលឿន និងឆាប់រហ័ស ហើយការស្ថាបនា​ត្រូវធ្វើបណ្តើរ និងកៀងគររកមូនិធិសប្បុរសជនបណ្តើរ ប៉ុន្តែការសាង់សង់ជុសជុលទីលានផ្នូរយុទ្ធជន មិនឱ្យហួសពី​៣ឆ្នាំនោះឡើយ។

បើតាមនាយឧត្តមសេនីយ៍ យន្ត មីន ​ការសាងសង់ និងជួសជុលទីលានផ្នូរអតីតយុទ្ធជននាពេល​នេះ គឺជាកិច្ចតបស្នងសងគុណយុទ្ធមិត្ត ជានាយទាហាន ពលទាហាន ដែល​បាន​លះបង់ អាយុជីវិតក្នុងសម័យសង្គ្រាម ដើម្បី​​បូរណ​ភាពទឹកដី ការពារ​ប្រទេសជាតិ មាតុភូមិ និងការពារអាយុជីវិត​ប្រ​ជា​ពលរដ្ឋ ដើម្បីឈានរកសន្តិភាពជូនប្រទេសជាតិ និងប្រជាពលរដ្ឋដោយមិនគិត ពីការបូរជាអាយុជីវិតរបស់ខ្លួននោះឡើយ។ លោកថា ក្នុងសម័យសង្រ្គាមនាយទាហាន ពលទាហានបានលះបង់អាយុជីវិតច្រើនណាស់ ដើម្បីការពារប្រទេសជាតិឱ្យបានគង់វង្ស ដូច្នេះ ដើម្បីតបស្នងសងគុណ និងគោរពនូវវិញ្ញាណក្ខ័ន្ធដល់យុទ្ធជនដ៏អង់អាចក្លាហាន ដែលហ៊ានលះបង់អាយុជីវិត ហើយដើម្បីអនុវត្តន៍នូវអនុសាសន៍របស់សម្តេចតេជោ ហ៊ុន សែន ​ និង​ការចង្អុល​បង្ហាញរបស់សម្តេចពិជ័យសេនា ទៀ បាញ់ ​នឹងស្ថាបនាតំបន់មួយនេះ ឱ្យសាកសម ​ជាតំបន់ដឹងគុណនូប្បការៈ អតីតសពយុទ្ធជន​នៃយើង​៕

កោះកែវ

India in Cambodia (Embassy of India, Phnom Penh)
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services