អ្នកនាំពាក្យការពារជាតិច្រានចោលព័ត៌មានដែលថាថៃបំពានដែនអាកាសកម្ពុជា

អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាត បានច្រានចោលព័ត៌មានដែលថាមានយន្តហោះចម្បាំងរបស់កងទ័ពថៃហោះចូលដែនអាកាសកម្ពុជាកាលពីចុងសប្ដាហ៍មុន​។ លោកថាការព្យាយាមបង្កើតព័ត៌មានមិនពិតដើម្បីវាយប្រហាររដ្ឋាភិបាលគឺជាការញុះញង់ និងមិនបានផ្ដល់ផលជូនជាតិ និងប្រជាជននោះទេ។

លោក ឈុំ សុជាត បានប្រាប់កម្ពុជាថ្មីនៅថ្ងៃទី១៧ ខែមីនានេះថាពុំមានការរាយការណ៍ពីកងការពារព្រំដែនចំពោះករណីដែលថាមានយន្តហោះចម្បាំងថៃហោះចូលដីខ្មែរដូចបណ្ដាញសង្គមមួយចំនួនបានផ្សព្វផ្សាយនោះទេ។

លោកថា៖ «អ្នកជ្រុលនិយម​តែងតែបង្ករឿងឱ្យពួកគេចំណេញនយោបាយ គ្មានជួយអីដល់ប្រទេសជាតិបានទេ។ [..] យកតែបណ្ដាញសង្គមមកនិយាយនេះគឺមិនបានដោះស្រាយបញ្ហាបាននោះទេក្រៅពីបង្កើតនូវអំពើហិង្សាការគុំគួន បង្កទំនាស់រវាងពលរដ្ឋនិងពលរដ្ឋ បង្កការលំបាកដល់រដ្ឋាភិបាលយើងដោះស្រាយទៅវិញទេ»។

ជាមួយគ្នានេះលោកក៏បានបញ្ជាក់ថារដ្ឋាភិបាលកម្ពុជារក្សាការពារអធិបតេយ្យភាពដែនដីប្រទេស និងមិនឱ្យប្រទេសជិតខាងណារំលោភបំពានបានឡើយ។

ការឆ្លើយតបរបស់អ្នកនាំពាក្យក្រសួងការពារជាតិនេះគឺបន្ទាប់ពីមានការផ្សព្វផ្សាយព័ត៌មាននៅលើបណ្ដាញសង្គមកាលពីចុងសប្ដាហ៍មុនដែលថាមានយន្តហោះចម្បាំងថៃ F-16 ៤គ្រឿងហោះចូលដែនអាកាសខ្មែរអាចជាការគម្រាមកម្ពុជាពីជម្លោះប្រាសាទតាមាន់ធំ ដោយអួតនិងសម្ញែងយន្តហោះចំបាំងទំនើបរបស់ថៃដែលទិញពីសហរដ្ឋអាមេរិក។

ព័ត៌មាននៃយន្តហោះចម្បាំងដែលហោះចូលនេះមិនមានប្រភពពេលវេលា ទីកន្លែងច្បាស់លាស់នោះទេ ហើយក៏គ្មានសារព័ត៌មានថៃណាមួយបានចុះផ្សាយដែរ ខណៈមានការលើកឡើងពីបណ្ដាញសង្គមថៃថាកន្លងទៅថៃមានតែបញ្ជូនយន្តហោះចម្បាំង F-16 ទៅកាន់ព្រំដែនជាប់មីយ៉ាន់ម៉ាប៉ុណ្ណោះក្នុងពេលដែលស្ថានការព្រំដែនជាមួយមីយ៉ាន់ម៉ាមានការប្រឈមខ្លាំង។

មួយរយៈចុងក្រោយនេះក្រុមអ្នកជាតិនិយមជ្រុលមួយចំនួនតែងតែងបង្កើតព័ត៌មានព្រំដែនជាមួយប្រទេសថៃដើម្បីញុះញង់ឱ្យមានការប្រឈមមុខគ្នារវាងរដ្ឋាភិបាលកម្ពុជានិងថៃ។ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានថ្លែងជារឿយៗថាបញ្ហាព្រំដែនមិនអាចដោះស្រាយដោយគ្រាន់តែស្រែកលើបណ្ដាញសង្គមនោះទេវាជាការងារបច្ចេកទេស ផ្លូវច្បាប់អន្តរជាតិ ការចរចារដោយសន្ដិវិធី និងកិច្ចសហការ ទោះជាយ៉ាងណាកម្ពុជាត្រៀមខ្លួនឆ្លើយតបជានិច្ចប្រសិនជាមានការប្រើប្រាសកម្លាំងប្រដាប់អាវុធឈ្លានពានកម្ពុជា៕

អត្ថបទដោយ ហ៊ុន សិរីវឌ្ឍន៍