ជួបកងទ័ពក្នុងស្រុកគិរីវង់ រដ្ឋមន្ត្រីការពារជាតិ ណែនាំឱ្យបង្កើនកិច្ចសហការល្អជាមួយប្រទេសជិតខាង

ចុះជួបកម្លាំងកងទ័ពឈរជើងតាមបន្ទាត់ព្រំដែនកម្ពុជា-វៀតណាម ស្ថិតក្នុងស្រុកគិរីវង់ ខេត្តតាកែវ រដ្ឋមន្ត្រីក្រសួងការពារជាតិ នាយឧត្តមសេនីយ៍ ទៀ សីហា បានណែនាំឱ្យកងទ័ពបង្កើនកិច្ចសហប្រតិបត្តិការជិតស្និទ្ធជាមួយប្រទេសជិតខាង សំដៅកសាងបាននូវព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។

ការណែនាំរបស់រដ្ឋមន្ត្រីក្រសួងការពារជាតិ បានធ្វើឡើងនៅក្នុងឱកាសដឹកនាំប្រតិភូក្រសួងការពារជាតិ និងអគ្គបញ្ជាការដ្ឋានកងយោធពលខេមរភូមិន្ទ ចុះសួរសុខទុក្ខ និងជួបសំណេះសំណាលជាមួយកងកម្លាំងកងវរសេនាតូចលេខ ៣៣៣ តំបន់ប្រតិបត្តិការសឹករងតាកែវ យោធភូមិភាគទី៣ នាថ្ងៃ​ទី២៥ ខែមីនា ឆ្នាំ២០២៥។ ដំណើរអញ្ជើញចុះសួរសុខទុក្ខនេះ គឺក្នុងគោលបំណងដើម្បីលើកទឹកចិត្តដល់កងកម្លាំងជួរមុខ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ តួយ៉ាងនាយ​ទាហាន​ នាយទាហានរង និងពលទាហានតាមខ្សែបន្ទាត់ព្រំដែនកម្ពុជា-វៀតណាម នៃទិសយោធភូមិភាគទី៣ នាពេលនេះ។

បន្ថែមពីការបន្តធ្វើកិច្ចការល្អជាមួយប្រទេសជិតខាង លោកនាយឧត្តមសេនីយ៍ ទៀ សីហា បានជំរុញឱ្យនាយទាហាន នាយទាហានរង និងពលទាហាននៃវរសេនាតូចលេខ ៣៣៣ បន្តយកចិត្តទុកដាក់លើការងារហ្វឹកហ្វឺនរៀនសូត្រ គ្រប់មុខជំនាញផងដែរ។

បើតាមការគូសបញ្ជាក់របស់លោកវរសេនីយ៍ឯក ម៉ែន ចាន់ឌា មេបញ្ជាការកងវរសេនាតូចលេខ ៣៣៣ សភាពការណ៍នៅតាមខ្សែបន្ទាត់ព្រំដែនកម្ពុជា-វៀតណាម មានភាពល្អប្រសើរ ក្រោមកិច្ចសហប្រតិបត្តិការល្អជាមួយអជ្ញាធរមូលដ្ឋាន ភូមិ ឃុំ ស្រុក ខេត្ត ដែលស្ថិតនៅជាប់នឹងព្រំដែន។ លោកវរសេនីយ៍ឯក បញ្ជាក់បន្ថែមថា អង្គភាពបានបន្តខិតខំដោះស្រាយរាល់បញ្ហាប្រឈមនានា ស្របតាមគោលការណ៍ឯកភាពគ្នា ​និងបានទប់ស្កាត់ការលួចឆ្លងដែនដោយខុសច្បាប់ បទល្មើសសេដ្ឋកិច្ច ប្រឆាំងភេរវកម្ម ឧក្រិដ្ឋកម្មឆ្លងដែន និងបានរួមគ្នាដោះស្រាយបញ្ហាផ្សេងៗ ពិសេសការបង្កលក្ខណៈងាយស្រួលជូនប្រជាពលរដ្ឋដែលរស់នៅតាមបន្ទាត់ព្រំដែន ប្រកបមុខរបរទទួលទានបានល្អប្រសើរ កសាងបានព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។

នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងបំពេញភារកិច្ចការពារអធិបតេយ្យ បូរណភាពទឹកដី និងការពារសន្តិសុខជូនប្រជាពលរដ្ឋក្នុងភូមិសាស្ត្រទទួលខុសត្រូវ ប្រកបដោយភាពម៉ឺងមាត់។ ភ្ជាប់នឹងការសរសើរ លោកឧបនាយករដ្ឋមន្ត្រី ក៏បានអំពាវនាវដល់កងកម្លាំងកងវរសេនាតូចលេខ ៣៣៣ ត្រូវបន្តចូលរួមការពារសន្តិភាពឱ្យបានគង់វង្សទៅថ្ងៃអនាគត។

លោក ក៏បានក្រើនរំលឹកដល់នាយទាហាន ពលទាហានទាំងអស់ ត្រូវជៀសឱ្យឆ្ងាយពីគ្រឿងញៀន និងចូលរួមទប់ស្កាត់គ្រឿងញៀន។

ជាការកត់សម្គាល់ នាយឧត្តមសេនីយ៍ ទៀ សីហា ព្រមទាំងប្រតិភូអមដំណើរ ក៏បានអញ្ជើញទៅពិនិត្យមើលច្រកព្រំដែន ភ្នំដិន ដែលជាច្រកទ្វាអន្តរជាតិឆ្លងកាត់ព្រំដែនរវាងកម្ពុជា និងវៀតណាមផងដែរ។ ច្រកព្រំដែនភ្នំដិន បានបម្រើឱ្យវិស័យសេដ្ឋកិច្ច និងទេសចរណ៍រវាងកម្ពុជា និងវៀតណាម ហើយបច្ចុប្បន្នច្រកព្រំដែននេះមានសកម្មភាពមមាញឹកក្នុងការផ្លាស់ប្តូរទំនិញ និងទេសចរណ៍រវាងប្រទេសទាំងពីរ ក៏ដូចជាការចេញចូលទៅវិញទៅមករវាងប្រជាជននៅជាប់ព្រំដែន ក្នុងការប្រកបមុខរបររកស៊ីចិញ្ចឹមជីវិត​៕