សម្តេច ហ៊ុន សែន លារដ្ឋសភា ទៅកាន់តំណែងជាប្រធានព្រឹទ្ធសភា

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាតំណាងរាស្ត្រមណ្ឌលខេត្តកណ្ដាល បានប្រកាសលារដ្ឋសភាហើយនៅព្រឹកថ្ងៃទី១ ខែមេសា ឆ្នាំ២០២៤នេះ ដើម្បីត្រៀមទៅកាន់តំណែងជាប្រធានព្រឹទ្ធសភា។

តាមរយៈសំណេរក្នុងបញ្ជីវត្តមានតំណាងរាស្ត្រ ក្នុងសម័យប្រជុំលើកទី២ នីតិកាលទី៧ នៃរដ្ឋសភា នៅព្រឹកនេះ សម្តេច តេជោ ហ៊ុន សែន បានសរសេរយ៉ាងដូច្នេះថា៖ «លាហើយរដ្ឋសភា ដែលខ្ញុំអង្គុយ និងធ្វើការជាងពាក់កណ្តាលជីវិត ដំណាក់កាលទី១ ខែមិថុនា ១៩៨១ ដល់ខែឧសភា ឆ្នាំ១៩៩៣ ហើយនិងចាប់ពីថ្ងៃ១៤មិថុនា ឆ្នាំ១៩៩៣ ដល់ថ្ងៃទី២មេសា ឆ្នាំ២០២៤»។

ការប្រកាសលាចេញពីរដ្ឋសភារបស់សម្ដេចតេជោពេលនេះ បានធ្វើឡើងក្រោយពេលដែលសម្ដេច បានជាប់ឆ្នោតនៅព្រឹទ្ធសភា សម្រាប់នីតិកាលទី៥នេះ ហើយសម្ដេចតេជោ ក៏នឹងក្លាយជាប្រធានព្រឹទ្ធសភា ជំនួសសម្ដេចវិបុលសេនាភក្តី សាយ ឈុំ ផងដែរ។

តាមការគ្រោងទុក កិច្ចប្រជុំលើកដំបូងរបស់ព្រឹទ្ធសភា នីតិកាលទី៥ នឹងគ្រោងរៀបចំឡើងនៅព្រឹកថ្ងៃទី៣ ខែមេសានេះ ក្រោមព្រះរាជាធិបតីភាពរបស់ព្រះករុណ ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា៕