សម្តេច ហ៊ុន សែន ឲ្យត្រៀមមន្ទីរពេទ្យទាហាននិងមន្ទីពេទ្យផ្សេងទៀតដាក់អ្នកជំងឺកូវី១៩ ខណៈមានអ្នកឆ្លងកើនឡើងយ៉ាងគំហុក

សម្តេចតេជោហ៊ុនសែននាយករដ្ឋមន្ត្រី នៃរាជរដ្ឋាភិបាលកម្ពុជាបានណែនាំឲ្យសម្តេចពិជ័យសេនា ទៀ បាញ់ ពិនិត្យ ពិនិត្យមើលមន្ទីរពេទ្យយោធា ដើម្បីដាក់អ្នកជំងឺកូវីដ១៩ដោយសារមានអ្នកឆ្លងមានកំណើនយ៉ាងគំហុករហូតដល់ជាង៥០នាក់ក្នុងរយៈពេលតែ២ថ្ងៃ។

តាមរយៈសារសម្លេងតាមតេឡេក្រាមនៅថ្ងៃនេះ សម្តេច ហ៊ុន សែន បានមានប្រសាសន៍ថា ព្រឹកមិញរកឃើញ១៧នាក់ក្នុងនោះសហគមន៍មានចំនួន១៥នាក់តែថ្ងៃនេះរកឃើញ១៤នាក់ទៀតឃើញថា មានការកើនឡើងយ៉ាងគំហុក។

សម្តេចបានណែនាំឲ្យរដ្ឋមន្ត្រីក្រសួងសុខាភិបាលសូមពិនិត្យមើលមន្ទីរពេទ្យផ្សេងទៀត ដើម្បីដោះស្រាយបញ្ហានេះពិសេសពេទ្យចារ៉ីជាពេទ្យឯកជនដែលមានអគារនៅសល់ច្រើនដោយសារអ្នកជំងឺនៅតិចព្រោះសភាពការណ៍នេះមិនធម្មតាពេកទេ។ ត្រូវដើរមួយជំហានមុនដើម្បីគ្រប់គ្រងសភាពការណ៍នេះឲ្យបានល្អ។

យ៉ាងណាក៏ដោយសម្តេចណែនាំឲ្យពិនិត្យមើលពេទ្យទាហានសិនដើម្បីត្រៀមដាក់មនុស្ស និងសម្ភារដាក់គ្រូពេទ្យយើងសម្រាប់ព្យាបាលដល់អ្នកជំងឺកូវីដ១៩ ដែលពីមុនមិនមានបញ្ហាចោទទេ តែឥឡូវដោយសារតែ២ថ្ងៃនេះមានអ្នកឆ្លងជំងឺកូវិដ១៩ជាង៥០នាក់។ សម្តេចបញ្ជាក់ថាចំពោះបញ្ហាយកសំណាកអ្នកជំងឺវិញមិនមានជាចំណោទនោះទេ៕

សំអឿន