សម្ដេចធិបតី អញ្ជើញជួបប្រជុំជាមួយបណ្ដាគណបក្សនៃឧត្តមក្រុមប្រឹក្សាពិគ្រោះ និងផ្ដល់យោបល់

នៅវិមានសន្តិភាព នាព្រឹកថ្ងៃទី២៤ ខែឧសភា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញជាអធិបតីភាពដឹកនាំនូវកិច្ចប្រជុំប្រចាំឆមាសជាមួយបណ្ដាប្រតិភូគណបក្សនៃឧត្តមក្រុមប្រឹក្សាពិគ្រោះ និងផ្ដល់យោបល់។

កិច្ចប្រជុំប្រចាំឆមាសនៃឧត្តមក្រុមប្រឹក្សាពិគ្រោះ និងផ្ដល់យោបល់ នាព្រឹកថ្ងៃនេះ មានការថ្លែងសុន្ទរកថាបើកកិច្ចប្រជុំ ដោយសម្ដេចធិបតី ហ៊ុន ម៉ាណែត ដោយផ្ដោតលើសារៈប្រយោជន៍នៃការរួមចំណែករបស់បណ្ដាប្រតិភូគណបក្សនៃឧត្តមក្រុមប្រឹក្សាពិគ្រោះ និងផ្តល់យោបល់។

បើតាមលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្ដល់យោបល់ សម្ដេចធិបតី ក៏បានអនុញ្ញាតឱ្យបណ្ដាប្រធានប្រតិភូគណបក្សនីមួយៗចូលរួមមតិអំពីការរួមចំណែកផ្តល់ធាតុចូលក្នុងន័យស្ថាបនាពាក់ព័ន្ធនឹងកិច្ចការរបស់រាជរដ្ឋាភិបាល អំពីបច្ចុប្បន្នភាពសង្គមរយៈពេល៦ខែកន្លងមក និងចក្ខុវិស័យនៃការរំពឹងទុក។

ក្រោយបញ្ចប់កិច្ចប្រជុំ លោក ឈឹម ផលវរុណ រដ្ឋមន្ត្រីប្រតិភូអមនាយករដ្ឋមន្ត្រិ និងជាប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្ដល់យោបល់​ ក៏នឹងធ្វើសន្និសីទសារព័ត៌មានស្ដីពីលទ្ធផលនៃកិច្ចប្រជុំនេះ។

នេះជាលើកទី២ ដែលសម្ដេចធិបតី បានជួបប្រជុំជាមួយឧត្ដមក្រុមប្រឹក្សាពិគ្រោះ និងផ្តល់យោបល់ ដែលជាយន្តការប្រមូលផ្តុំពហុគំនិតជូនរាជរដ្ឋាភិបាលក្រៅក្របខណ្ឌសភា ក្នុងគោលដៅលើកស្ទួយប្រជាធិបតេយ្យ និងប្រសិទ្ធភាពការងារ ដើម្បីជាប្រយោជន៍ជូនប្រជាជន និងសង្គមជាតិ៕